سهرتنا البارحه ..والأرهاب !!

[فيافي]

ادري العنوان غريب شويه .. لكن حبيت اناقشكم بموضوع البارحه سولفنا فيه وانا متأكده ان اغلب البيوت يدور فيها نفس الموضوع ..

(( اعذروني لكن بتكلم بالعاميه ))

كنا قاعدين والمجلس ضايق وكلن يسولف بجهه ,, ودخل علينا خالي وهو اصغر واحد بخوالي وماشاء الله عليه ملتزم وفي حاله ولا به يوم مر واحد شكى منه ,, المهم قعدت خالتي تحن عليه (( ياخي والله انها بنت ناس وملتزمه وخلنا نفرح بك ))

وفجأه الا وتدخل وحده من البنات بينهم وتقول (( ياخالي والله انك مزيون بس لو تشيل هاللحيه كأنك أرهابي مخربه عليك والله استايل قديم )) مجرأها << بغت تحذفها بالدله ..

لكن جاتها نظره من خالي سنعتها ~ اكره النظره ذي ودي لو انها كف ههههه ~

رد عليها وقال ( ذي تمنعني من اشياء واجد )؟؟!! قلت له مثل وشو الا لحيه وياكثرهم اللي لحاهم على الفاضي ياخال .. رد وقال / ادري بس بالنسبه لي تردني من اماكن واجد ووجودها ... .. ويكفي انها سنه النبي صلى الله عليه وسلم .

مدري انتوا وش رايكم ؟؟!! بس اكيد كلا له راي ( هل اللحيه تمنع الرجال من المعاصي وتذكره بالعلوم الطيبه ؟؟ )

واليوم تذكرت بعد برنامج شفته لفنانه امريكيه اسمها تايرا كانت عارضه ازياء مشهوره وكانت تلبس كل يوم زي غير ببرامجها ،، الين مره لبست العبايه .. تعرفون وشو كان شعورها وشو قالت للجماهير يوم ناظروها بنظرات غريبه ؟؟!

قالت انها اول مره تحس انها ارهابيه ؟! تقول نظراتكم غريبه ليه؟ انا وش لابسه ترا عباه عاديه وانا لابسه ماركات تحتها يعني ماحرمت نفسي من شي ولا سويت شي غلط .. ( واعترفت تايرا بوحده من المجلات وقالت بعد ماناقشوها عن هالحلقه وقالت // حسبت ان بنات المسلمين مقيدين لكن شفت شي ثاني الملابس السوداء ستر وغطاء لجمالهم ومايمنعهم من لبس احلى واجمل الماركات )

ادري طولت عليكم بس ودي اعرف اللحيه للرجل والعباه الأسلاميه السوداء ( مو مثل اللي هابين فيها اللحين ) ارهاب ؟! واللحيه وش تعني لشبابنا ؟!

ان شاء الله ماكون ثقلت عليكم ومن كان وده يعلق ياليت يعلق بكل صراحه ..


أختكم // فيافــــــي