للصدق ثوب ولبس غيره مية ثوب=تبلى ويبقى الصدق ثوبٍ و ستـرا

[صالح الغباري]

جاتك مراسيلي على خط مكتـوب=مكتوب من دون أزرق الحبر يِقرا
ساعي بريده صفحة الشعر مندوب=فيه أعذب القيفـان شعـرٍ ونثـرا
فيه الكلام أحلى من السكر يـذوب=في وسط برّادٍ غلا فـوق جمـرا
معه أختلط شاهي بوزنه ومصبوب=صبّت كريم ما نوى فيـه غـدرا
رتبتها بأطيب عبارات وأسلـوب=يِذهب صواب القلب منّـه ويبـرا
وردت ذودي ورث ما هو بمسلوب=على حيـاضٍ للمعازيـب تطـرا
في ثجةٍ ترعى بها كل خرعـوب=ماها وفير و خدّهـا دوم خضـرا
لا ماتورد سوق جالب و مجلـوب=ولا عرّضت للسوم ولا هي بتشرا
سقفٍ تماري بالدلع كل عـذروب=مصيونةٍ ما بين حمـرا و صفـرا
عندي غلاها يا ذهب سِك مسكوب=زايد على مال جمع فيـه كِسـرا
ونا إحمد الله سكتي كلهـا دروب=سهل و جبل مسراح ولاّ بمسـرا
مامشي طريقٍ قالت الناس مذروب=وش لي طريقٍ فيه بيضا و سمرا
للصدق ثوب ولبس غيره مية ثوب=تبلى ويبقى الصدق ثوبٍ و سِتـرا