يقولون مايسرك عم ولا خالي
ولاتسر ناسً هرجها طيب بألسنها
اعرف الحقيقه نوب مدري يورالي
ولاينفعك بالضيق من كان خاينها
طرتلي طواري تو ماجت على بالي
ونفسي من الهوجاس والغيض شاحنها
ترى اللي جلس في لاهب القيض بظلالي
مايدري عن اللي بالرماضي مداهنها
وانا ماتعرض واحد بالخطا عالي
أجنب عن الغلطات وأترك مخادنها
وانا ماأدخل الا وعارف قبل مدخالي
واخلّي الرطينه عند ماكان يرطنها
ومن طب وسط السوق عينه على الغالي
بخيص المعرفه كل سلعه يثمنها
وأنا مارخص الطيب ليا من تهيالي
ولا أهين نفسي عند من كان هاينها
وأنا في طبيعه ماأرغب القيل والقالي
أخلي النميمه عند حين مداكنها
حلاة الرجل مايساوي المر والحالي
جزيل المعاني بالهذيله ماأقارنها
يقوله على معناه الاول مع التالي
ولا فيه حجه دون تثبت رهاينها
أصافي رجال الطيب وأمشي على فالي
وبعض الحقايب خلها في مخازنها
أنا اصد واجنب ليا شفت الانذالي
ولا فيه سلعه غير تعرف معادنها
وسبحان رب خالق كل الاجيالي
من أجيالها الاولى الى اخر مكونها
02-10-2009, 01:59 PM
العرض الشجري