من عامل الناس في سابق خطياها ,, يقعد بدار ٍ خلا ماداج دايجها

[بتاااار]

سمعت لى كلمة ٍمدري وش اقصاها ,, حزت بصدري واناماني بهارجها
لوكل كلمه اليا جتنا طردناها ,, بعنا الثمينه بسعر ٍ مايخارجها
لومرت السمع ماكنا سمعناها ,, ونقفل الراس عنها لا يبرمجها
من يم هذا لهذا مانقلناها ,, والناس واجد وتلقى من يروجها
ومن جابها بين خلق الله وداها ,, لوبه مراجل ترى نفسه يسمجها
من عامل الناس في سابق خطياها ,, يقعد بدار ٍ خلا ماداج دايجها
في كنة ٍ تشوي الجربوع رمضاها ,, تابس غصون الشجر من حر واهجها
والناس بالحق حكم الشيخ مرضاها ,, ماترضى الناس لو انك تحججها
ياللى تبى الطيبه خذها وعطناها ,, وخل الطريفه طريفه لاتثلجها
واقضب طريق الاوادم وامش ممشاها ,, واتبع دروب العرب وادرج مدارجها
وارسم لنفسك حدود ولا تعداها ,, من حط نفسه بدرب الضيق يحرجها
وان كان نفسك هواها قام ينحاها ,, حط الا عنه بروس الخيل واسرجها
وفكر بمنكافها قدام مغزاها ,, وضرب حساباتها وتشوف ناتجها
وكل ٍ بعضده يموح الدلو برشاها ,, وتلقى كبود الظوامي من يبرهجها
وان كان توك على صدرك تهجاها ,, حنا ترانا ندرس في مناهجها
من يم مصباحها نبعد معشاها ,, اليا قعد راعي الضلع يدرجها
لوهي صعيبه اليا انعاجت عدلناها ,, واللي تجي مستقيمه مانعروجها
نهتم في وزنها وابرام معناها ,, ومن الكرستال واللؤلؤ نتوجها
مثل الجواهر ليا منا نضمناها ,, وسلوكها من جديد الزري ننسجها
مخايل ٍ ترتدم والصدر منشاها ,, ان دك بالبال داكوك ٍ يهيجها
واليا امطرت ضاقت الوديان في ماها ,, تاخذ اليا الحول مايبسة مدالجها
ان صدت الناس عنا ما اعرضناها ,, ماتقفى الناس عنا وانتولجها
وان جاتنا الطيبه بالطيب زدناها ,, الطيبه بالعسل والسمن نمزجها
وان جاتنا الثانيه نصبر ونرفاها ,, يمكن اليا فاق رعيها يعالجها
وان عادها عودة ٍ معاد ينساها ,, من حربة ٍ في صميم الصدر نولجها
مسمومة ٍ يبلش الدكتور بدواها ,, مايقنع الخبل لين انه يلامجها



لـ/شاعر عبدالله بن زويمل