قـصـيـده الــيــتــيــم .. للشاعر / محيميد الحربي ,,

[سلمان بن ضيدان]

حالة يتيم





طفلٍ فقـد والديـه بـاول سنينـه
عاش الحياة بويل وبهـم واحـزان

محـدٍ يلومـه لـو بكـى والدينـه
صغير شاف الويل بشكال والـوان

لا عيشةٍ زينه ولا واوضاع زينـه
ماله خوال ولا لـه عيـال عمّـان

لازاد لا مصروف والبيـت طينـه
و لاهو لحاله عايشٍ مر الازمـان

كبر مصيبـه ياعسـى الله يعينـه
سبعة خوات اكبر منه ماله اخـوان

من شانهن رضـى بمـدت يمينـه
طلب يدين العون باصحاب الاحسان

همه خواته مـار وش فـي يدينـه
غير التوجد والبكاء احيان واحيـان

والحـال ياستـار حالـه حزينـه
لأمسن خواته بجوعهن صابه اجنان

يبكي خفاء ويخفـي دمـوع عينـه
ماوده يبيـن لهـن دمـع الاعيـان

والصبح بدري يلف وسط المدينـه
يسأل ويستنجد في اصحاب الأيمان

وياشيب عينه يـوم واجـه سنينـه
يلعب مع اخوانه ولا عنده احـزان

يقول ويـش الفـرق بينـي وبينـه
والله فرق خلقه من انسان لانسـان

ذوق الغبينه غيـر شـوف الغبينـه
من ذاقها يصبح للاحـزان عنـوان

صغير لكن شابت رمـوش عينـه
وخط شنبه والشيب في شاربه بـان

يـارب روف بحالتـه يامعيـنـه
صابر على بلواه لو كـان ماكـان

راض القدر ومكمل اركـان دينـه
يرجيك ياربـي تجازيـه باحسـان

وتغشى خواته بالهـدى والسكينـه
يالله يالمعبـود ياعالـي الـشـان






الشاعر / محيميد صالح الحربي