ياقبـــــــر

[راكان اليامي]

وداعتك ياقبـر حـر سكـن فيك =وداعتـك ياقـبـر بالله وداعــه
ياقبر تدري منهو اليـوم راعيـك ؟= رمز النصر والمرجله والشجاعـه
ليتك تشوف الناس وشلـون تبكيـك= اليوم صار الدمع أغلـى بضاعـه
لا والذي يرحمك مانيـب ناسيـك =ودنياي عقبك كـن مابـه طماعـه
ماحسب كل الناس ياميـر تغليـك= لين شخصت لك كل الابصار ساعه
كلن يسولف بك ويلهـج بطاريـك =والبعض الآخر قال موتك اشاعـه!
كلن بكاك.. ونادي النصر يرثيـك= ومن الحزن يامير نـزّل شراعـه
يسألك وينك؟ وين مرسى شواطيك؟= وزعل ايحسب ان رمزه اليوم باعه!
صار يتذكر تالي الوقـت ماضيـك= يومـك تسـدد للرمايـه ذراعــه
مايدري ان الموت خلـص لياليـك =والا انت ماترضى تخليـه ساعـه
ربا بظلك وانت نصـرك مربيـك =به من طباعك وانت بك من طباعه
وشلون لاء.! لاصار نصرك وناديك= واليـوم عقبـك مايبيـن شعاعـه

منقول بدون ذكر اسم الشاعر وهي مرثيه في الامير عبدالرحمن بن سعود رحمة الله عليه