لا تساومني على نبل الشعور ..وطيب ساسي !!

[وكيل آدم]

@@
@@

( لاتساومني )
( على نبل الشعور ) و ( طــيب ســاسي )

@@
@@
يا بحر .. ما شدّني موجك .. و لا عفت المراسي
دام موجك ينحني ل / هل الطموحات الدّنيه
@@
@@
شف .. - على طول السنين الممحله - لازلت راسي
و افتخر في موقفي لو تشره احلامي عليّه
@@
@@
لا تساومني على نبل الشعور .. و طيب ساسي
دونهم مالي خيار .. و لا حياه .. و لا هويّه
@@
@@
بنطلق ..دام المسا ذا غير عن كل الأماسي
كنّه مقدّم لي امْن كفوف مشواري هديّه
@@
@@
فيه بان الصدق .. و الهافي خسا .. و ارتاح راسي
من تفاهات الكلام .. و من خبيثين السجيّه
@@
@@
وش علي .. لو زاد معْ بعض المخاليق احتراسي ؟!
بعض الافعال الكريمه ما وراها طيب نيّه !!
@@
@@

ما يوطّي طيّبين الوقفه كبار المآسي
و لا يعلّي زخرف الدنيا هل النفس الرديّه
@@
@@

و الحياه .. اكبر من هموم الدراهم و الكراسي
و الرجال .. تموت .. مير افعالها فالوقت حيّه
@@
@@
علّني ابقى - و انا طيّب - على ذيك المراسي
و لا بحر .. موجه يساومني على عزّ و هويّه
@@
@@