ياعين هلي دمعش اليوم ياعين
لعاد يبقى من دموعش خزينه
هليه مثل الغيم ياعين تكفين
يمكن تداوين الجروح الدفينه
هلي دموعش كلها لا تحنين
اليا متى ودموع عيني رهينه
ادري عظيمه دمعتش لا تحاتين
محدن بشايف دمعتش يالرزينه
تبكين ياعيني ولا انتي بتدرين
وش حل في حقان واخر سنينه
بعلمش ياعين وشفيش تبكين
تزايدت بين النفوس الضغينه
تدرين وش ضيّعت من قبل يومين
ضيعت دولة عشق ماهي مدينه
تدرين ويش احس وسط الشرايين
كنها تقطعها رماحن سنينه
تدرين ويش احس مابيني البين
اني يتيم وفاقدن والدينه
تدرين ويش اشوف مابين جفنين
شفت الشقا وسط الحياة المهينه
تدرين ويش احس مابين ضلعين
قصر المحبه عزلو ساكنينه
تدرين؟ ماتدرين ولا راح تدرين
لانك مرايه للفؤاد وضنينه
ياسين يا سيد الغنادير ياسين
ايام ماقلبش تلاعج حنينه
اليوم في قلبي كما حد سكين
قلبي رجا لطفش وقلبش ولينه
ياشوكت العشاق وش عاد تتنين
وينش ترى قلبي يبيش وتبينه
اخذي الفؤاد اللي اهجروه القريبين
اهل الديار اللي ورى خشيم زينه
يالشوكه اللي تذبحين المحبين
وصاة قلبي من قبل تذبحينه
قولي لها من عقب ما اموت بعدين
خذيت روحه وانتي في وسط عينه
حقان العجمي
23-08-2008, 02:28 AM
العرض العادي
