لا سلهمت من ورا الغطوه مضاليله

[عيد بن شدقان]

الوقت طول ولا جتني مراسيله=الصاحب اللي علينا طال مرساله
ودي بشوفه واجي للزين واشكي له=من لهفتي له اجي له واتشكاله
لا لاح براق من يمة مداهيله=قلبي يبي شوفته لا شك ماحاله
خلن تولعت به وابعد منازيله=ابعد ولا ني بعرف اليوم منزاله
غرون سنا خده الطاهر ورا الشيله=بدرن يحفه ظلام الليل بظلاله
انعم من الورد ينثر في مناديله=ومدري هو البدر ولا البدر يبراله
ولا سلهمت من ورا الغطوه مظاليله=سودن وساع غدت للقلب غرباله
والفكر لا سج ساعه قام يطريله=في لذت النوم لحظات ايترواله
كني مع هجعت العربان اناديله=وكم واحدن لا بقاله شي ماناله
ياليتني رحت مالديت عيني له=ولا صدفني وهو رايح على فاله
واقفى عقب ماشبكني في محابيله=واصبحت عقبه مريض وحالتي حاله