أعضاء وزوار شبكة ومنتديات قبيلة العجمان
السلام عليكم ورحمة الله وبركاته
يسعدنا أن نقدكم لكم شاعر تنطلق منه الكلمات المتزنه بقوتها واجزلها
التي وصل بها الى قلوب محبيه ومعجبيه لتعبر عن جميع الطقوس بتألقه
وتميزة في أبيات قصيده المتمسك بالأخلاق الأدبية الشعرية الناشئه من بيئة شعرية التي يفتخر بها ولا يقل عن اي شاعر في الإبداع وتقديم الأنغام الشعرية .
الشاعر فهيد بن عصيدان
س : بطاقتك الشّخصيّه؟
فهيد بن محمد بن عصيدان
٢٣ سنه
س: ابو محمد حدّثنا عن بداياتك كيف كانت وهل تأثرت بأحد ؟
مااذكر متى بديت بالضبط وطبيعي أي شاعر في صغره لازم ايتعثّر بالوزن لكن معا الايام ايتعلّمه
ومن الطبيعي أن يتأثر بشاعر وانا من صغري احب قصيد ابن قضعان واحفظه ويوم عرفت القصيد
وتابعته بكثافه تأثرت بأكثر من شاعر خصوصاً ابن وسّام وابن جدلان.
س: قصيدك , موهبه .؟ ولاّ وراثه .؟
بجاوبك وانت إختار:
جدّي وجدّتي و4 من عمّاني شعّار لكنّ ابي مهوب شاعر , انت وش رايك .؟ موهبه والا وراثه (يضحك)
س : من يعجبك من شعراء العجمان؟
ماشاء الله شعّار قبيلتنا المتميّزين واجد لكن سؤالك محرج لأني بالتأكيد بنسا ناسن واجد لكنّي ببتعد عن التقليديه وأقولك على سبيل المثال :
ناصر البرغش ، فارس الحشّار , مساعد بن خشمان ، شبيب بن شبنان ، طاحوس بن طاحوس
س : من يعجبك من شعراء الساحه .؟
سؤال متفرّع , لكن عندي ان افضل الشعراء اللّي تميّزو بالغزل والشعر العاطفي:
ضيدان بن قضعان ، مدغم أبوشيبه , مطلق إبن شويه
وطبعاً هناك الكثير من الشعراء اللي يتميّزون بقوّة المفرده في مختلف الاغراض مثلاً:
سلطان إبن وسّام ، علي بن حمري, إبن شلحاط , إبن الذيب , إبن إعماره ,سالم بن جخير, إبن إعيينان وطبعاً الهرم سعد بن جدلان.
س : والشاعرات .؟
نيّافه , نوض , بنت هوازن , البنت الجزله
س : في أي غرضْ من أغراض الشعر تجد نفسك .؟
الحمدلله أنا كتبت على أغلب الأغراض ولوتخلّوني على كيفي كان ماكتبت إلا العاطفي(يضحك)
س : هل تستهويك المحاوره ؟
ماتستهويني إلا بعض الأحيان لاضاق صدري شفت أطرف واحد من الربع والله يخلي رسايل إلـ sms
س : لماذا تواجد شعراء المحاوره من قبيلة العجمان شبه معدوم ؟
بجاوبك بإختصار:
فن المحاوره ليس من فنون وتراث قبيلة العجمان فالمحاوره إنتشرت عند قبائل الحجاز والوسطى وهذا لايمنع خروج شاعر محاوره مبدع من قبيلتنا لكن المشكله أنه قد لايجد الدعم الكافي
س: كل شاعر مبدع قد تأتيه شهاده من شاعر علم فهل أتتك شهاده .؟
بالنسبه لشاعر في مبتدا دربه مثلي فشهاده من شاعر كبير مثل / محمد الخس تكفيني عن شهادة جامعة هارفرد (قالها ضاحكاً) فأبو خلف (بستان الشعر) كما أسماه الملك عبدالعزيز طيب الله ثراه , وذلك عندما قابلته في دوانيّة شعراء النبط وكلامه الطيّب وإشادته ونصحه أعطاني دفعه معنويّه.
س : أين فهيد بن عصيدان من الإعلام وأين ثبّت تواجده الإعلامي حتى الآن؟
مثل ماأسلفت مسبقاً أنا شاعر مبتدئ فمن الطبيعي أن يكون تواجدي محدود في البدايه وفوق ذا فأنا فيني كسل لكنّي أتواجد بشكل شبه منتظم في صفحة ملتقى الشعراء في جريدة الوطن وبرنامج دوانية شعراء النبط في تلفزيون الكويت
وقريبا ً إنشاء الله سوف ترونني في برنامج على قناة الساحه وقناة الصحراء
أما فيما يخص الإنترنت:
فتواجدي يقتصر على منتدى قبيلتي ومنتديات المرقاب الأدبيه
س : مارأيك فيما يسمّى (القصائد الغنائيّه) أو (شعر الحداثه) .؟
أوّل شيّ ., كلّنا نعرف أنّ الشعر النبطي وزن وقاف واللّي مايتوفّر فيه ذالشيين مايتسمّى شعر نبطي , مثل الحداثه اللّي هو أقرب إلى سالفه مرتبه .!
س : إنتشرت في الآونه الأخيره ظاهرة الأمسيات المختلطه فنجد شاعر وبجانبه شاعره على طاولة الأمسيه وش رايك .؟ وهل إذا جاتك دعوه بتلبّيها ؟
أنا بقول وجهة نظري اللي أعتبرها شخصيّه بحته :
بالنسبه لي من سابع المستحيلات فأنا محكوم بعادات وتقاليد ومحسوب على ربع , تخيّل إنه يشوفني شايب من شيبان العجمان وأنا موازن شاعره متبرجه عاد تعال دورني من تعليقات الشيبان (يضحك)
س : إنتشرت في الآونه الأخيره أيضاً برامج المسابقات الشعريه مثل (شاعر المليون)و(نجم القصيد )وقريباً (شاعر الشعراء) ، ماوجهة نظرك؟ وهل لك مشاركه؟
من وجهة نظري أن البرامج الشعريه سحبت البساط من الامسيات والمجلات المحسوبه على أشخاص معينين ، وإن وجدت فيها أخطاء لكنّها تخدم الشاعر والشعر الحقيقي ، وبالنسبه لي رشحت من بين ١٠ شعراء سيمثلون الكويت في برنامج (شاعر الشعراء).
س : هل لديك فكره عن برنامج (شاعر الشعراء) ، والجهه التي ترعاه ، وأين يقام ؟
برنامج شاعر الشعراء ترعاه قناة الـ NEW TV اللبنانيه وتبثه أكثر من قناه وسيقام في سوريا وتشارك فيه ١١ دوله عربيه وكل دوله لها لجنه مختصه ترشح ١٠ شعراء لتمثيلها أي أن مجموع الشعراء المشاركين ١١٠ شعراء وتقام تصفيات إسبوعيه على الهواء مباشره كل دوله على حدى بطريقة ٥٠% للجنه و٥٠% للجمهور برسائل إلـ sms أى أن تختار كل لجنه شاعر يمثلها في التصفيات النهائيه بحيث يتنافس ١١ شاعر من ١١ دوله على الفوز بجائزة المليون دولار المخصصه للبرنامج
خلّنا نبعد شوي من جوّ القصيد :-
س : صفه تكرهها .، وصفه تحبها .؟
أكرهها : الهياط والرسميه
أحبها : الوفا بالوعود
س : يوم من أيام الأسبوع تتفائل فيه ؟
كلّ أيام الأسبوع سوا بس الأربعا كلنا نحبه من عادنا بزران
س : وقت معين في اليوم يستهويك ؟
بعد صلاة الفجر , احسّ بالتفاؤل والراحه النفسيّه
س : مكان ترتاح فيه ولاتقدر تغيّره ؟
بدون تردّدْ الجهرا , إتصدق إني لاطلعت منها أتضايق وعلى ماقالو المربى غلاب (يضحك)
س : متى يكون موعد دخولك للحياة الزوجية ؟
أنا رابط زواجي بإثنين عيد بن شدقان وناصر بن دهام الأول خلصنا منّه والثاني بزوجه عقبن أعرس
س : أبيات لك ترددها , ودائماً على لسانك ؟
إذا جهلتْ الرّجلْ .؟ شف من خويّه .؟=لاطاب طاب ولاتردّا تردّا .!
ياليت ربّي خالقٍ لي معكْ عين=عشان لامنّي تضايقت .؟ أشوفك .!
تبي الحقيقه .؟ والله إنّي تغيّرتْ .؟=قبل أعشقكْ ., واليوم أنا ميّتٍ فيك .!
لوكلّ غالي لاهجرني ترجعهْ كلمة : (تعال) ؟=والله لصوتّ له بصوتٍ تسمعه كل الكويت .!
س: ابو محمد ماهي اقرب قصائدك الى قلبك؟
مادام للخوّه حْقوق ومطاليب=يبصم عليها أهل القلوب النّظيفه
للأخويا سلمْ وتبادل مواجيب=إمقسّمه مابينهم .، بالنّصيفه
والرّجل لاصاحب .؟ ينقّي الاصاحيب=وإيطقّ من عرفْ الخبلْ والهديفه .!
وإن جازله رجّال ., من عقب تجريب .؟=في (قائمة عرف النشاما) يضيفه
والطيّب اللّي وين ماتدرجه .، طيب .؟=هذاك منوة كلّ طيّب وكيفه
وأنا وريث أهل السّيوف المخاضيب=وأهل البيوت المزبنات المريفه
قّطاعة الفرجهْ على الفطّر الشيب=والا على ظْهور المهار العسيفه
قضبتْ منهم للمراجل مقاضيب=ومنهم تعلّمت العلوم الطريفه
أشفق على خوّة عريب المناسيب=أشفق من الطائي على شوف ضيفه
أوفيله أوفى من وفا الزير لكليب=وأوالفه ميلاف ولفْ لوليفه .!
وإلى نصاني يشتكي قاصر الجيب .؟=أمدّله لاكان حالي كسيفه
أعطيه مافالجيب .، والرّزق فالغيب=من عند خّلاق الطّوال المنيفه
مانيب أفرّح فأبن عمّي الأجانيب=أحمي قفاه إمن النّفوس الضعيفه
ولانيب أطلّع في رفيقي عذاريب=لأهلْ الحكي ., وأهل العقول الخفيفه
وإن جات طعنه من رفيقي .؟ فلانيب:=أسلّ سيفي كان هو سلّ .، سيفه .!
أرفع مقامي عن سواياه وآطيب=وأمدله كفّ اليمين الشريفه
وإن كان هو يغتابني كلّ ماغيب .؟=بواجهه بالحقّ ., في وجه زيفه
أطقّها بالوجهْ وإيخيب وآصيب=وأخلّي أعذاره .؟ بعينه سخيفة .!
وإلى ندبْ ؟ مانيب أردّ المناديب=يامرحباً به ., وإن بغا الصدّ .؟ كيفه
لكنّ لاوصلتْ كرامة الأشانيب .؟=عند الكرامه ., بتكرّم وأعيفه
أصدّ .، واقبالي عقب صدّتي عيب=ماأعتدتْ أردّ إقفايتي بالنكيفه .!
س : ماهي أخر قصيدة كتبتها ولم تنشر حتى الأن؟
فمان الله ., لوماودّي أرسلّه ., فمان الله=تراجف روس أصابع كفّي إن جيت أرسل إرساله
قبل لاأفارقه .؟ بسمع سواليفه , وزين إحكاه=بعدْها لويبي يغتال زول الحبّ .؟ يغتاله
أنا غلطان في حقه ., وجيت أحبّ خشم إرضاه .!=وصدمني بالرّساله والكلام اللّي بها قاله
تغيّر عقبْ ماكان إمتواضع والغرور أطغاه=ياسبحان الله اللّي عقب حبّي .,غيّر أحواله
تغيّر عقب خمس أيام قاطعته .، علي وش جاه .؟=انا جيت أعتذر , وأبيع صدّه , وأشري إوصاله .!
أبنسا ., بس قولو كيف لامنّي بغيت أنساه .؟=ودمّ القلب ينزف ., والدّموع الزُرق هماله .!
تمرّ أيام .,وإيجيبه غلاه اللّي قبلْ ودّاه=ويعرف إنّي خلقت إنسان.؟ لجل أموت وأحياله
أبمسح رقم جوّاله ., ولكنّ الغلا خلاه=وقلبي حافظه ., لاجيت : أبمسح رقم جوّاله .!
س : قصيده من جديدك تهديها لأعضاء وزوار شبكة قبيلة العجمان ؟
الجادل اللّي فجرْ قلبي عليها الحنين=ماسقتْ رجل الغرام .؟ إلاّ على شانها .!
يقوله التّايه اللّي توهتهْ السّنين=دخلْ ., ولادلّ مخراجه فبيبانها
ماكنت أَحسبْ إنّ فالي عقبْ شِينهْ يزين=إلاّ يومهْ صاح بذني : عانها ., عانها .!
جات إتخطّا على إضلوع الفوادْ الحزين=على الضّلوع الصّخاف إتكوسر ألحانها
جتني على غفلتٍ منّي ولاقلت ., وين .؟=تعزّبتْ قلبي اللّي صار ديوانها
وإن جيتها ضيف .؟ فالي بين سمنْ وسمين=عزالله إنها كريمه عند ضيفانها
بقطف فبستانها لوزه وتفاحتين=لوإنّ فيها مايغريني فبستانها
والله ماطاح العذارا من عيوني يلين .؟=قامت بدور السّفينه تحت ربّانها .!
ماأخاف فيها الحكيْ وإبغاضة الحاسدين=لكنّي أخاف من سطوة طيشانها
خلتّني ., أعرف وش يربط خدين بخدين=وخلّتني ., أحبّ ديرتها وسكانها
كرّمتها من حكي سمعهْ , ونظرات عين=ولخّصتها في قصيدٍ هزّ وجدانها
أحبّها حبّ علمه في ضلوعي يبين .؟=من دمعة إعيونها ., لاضحكة أسنانها
فإن قالت أحبّك .؟ أثني كلمة العاشقين=صح الله إلساني ., وصح الله إلسانها .!
وإن حلّ حِلّ الفراق .؟ بتنسكب دمعتين=دمعه من أعياني ., ودمعه من أعيانها
وإن قيل ويش إتمنّى .؟ قلت لي منوتين:=أعيش في قلبها ., وأموت بحضانها.!
س : ابو محمد كلمة في نهاية هذا اللقاء توجهها لاعضاء وزوار شبكة قبيلة العجمان؟
وجود مايقارب 20000 عضو بصراحه شيّ طيب وإنجاز والله يجمعنا على المعزّه وعلى صفاء القلوب , وأحبّ أشكرك انت يابوعبدالله , وأشكر أعضاء وزوار الشبكه اللي اعتبرها بيتي الاوّل.
وختاماً تمنياتنا للشاعر فهيد بن عصيدان بالتوفيق , ومواصلة دربه , ومن تميز إلى تميز ونشكره على هذا اللقاء سائلين المولى عز وجل أن يكون في طليعة المبدعين بجمال الكلمات وفي جميع جوانب حياته.
الشاعر مع الاخ فيصل بن حجرف
من اليمين / فهيد بن عصيدان , ناصر عامر بن دهام , مشعل عبدالله الجري
من اليمين / سالم بن حمادة, جالس بن مبارك , عجيل بن مصرقع
27-07-2007, 02:02 AM
الشاعر / فهيد بن عصيدان في لقاء مع شبكة العجمان
العرض العادي
