رزق يجليني عن الدار مبغاه ......و الرزق ربي قسمه بالتساوي

[الصقور يام]

ان رحت من نجران قمت اتمناه=ون جيت في نجران شفت البلاوي
و اسبابها اللي حظي الشين عداه=.وانا معه لا زال قلبي هواوي
هذي الصراحه لغز مدري بمعناه =غطى على فكري وكل الهقاوي
ديرة هلي نجران ما والله انساه=.خلوا الكلام وزايدات الحكاوي
ولدت في نجران وشربت من ماه=و شربت من غيره ولا نيب راوي
انساه كيف وكل يوم اتمناه=وانا على الرجعه معزم وناوي
مانيب من ينسى مقره ومرباه=يا هل ضباء لا تكثرون الدعاوي
يا سعد من هو ضامن فيه ممساه=للبيت قد هو غيبة الشمس ضاوي
ويشوف من قلبه يحبه ويهواه =جمعاء الشمل من كل عله تداوي
ما هوب مثلي كل هم توطاه=. يمسي و يصبح عن دياره خلاوي
رزق يجليني عن الدار مبغاه =و الرزق ربي قسمه بالتساوي
ويلي على ذيك المداهيل ويلاه=ويل الغشيم اللي سرا الليل غاوي
قلب العناء وزعت باقي بقاياه=على ملفات الطرق والملاوي
بالهون يا دنيا كفى القلب ماجاه.=يا واسع الرحمه عليك الشكاوي
مانيب انا اول من زمانه تحداه =سود اليالي مخلفات المناوي
كم واحد قبلي رمى الصيد واخطاه=راعي الشقاوة في حياته شقاوي
يا من عليه القلب يرجف من اقصاه=رجف الرعد في جال غيم سماوي
ما كنت افكر يوم واحد بفرقاه=و اليوم قدني للتلاقي رجاوي
انا ان نساني صاحبي والله اغواه=احسن لي ابقى طول عمري جلاوي
اجنبه وانسى عن اسمه وذكراه=و المستحيل اعشق ولا عاد اهاوي

الشاعر / محمد مهدي ال مهذل الصقور اليامي

ضباء /مدينه قريبه من تبوك في شمال المملكه