زواج البزران بين المراسم ولعب السياكل

[سعد القوي]

عقب شيخ زواج المسيار صار اي موضوع عرس يشد انتباهي
لذلك ..
كنت اقرا في الجريده اليوم عن زواج المبزره في افغنستان

الخبر كما ورد

أصغر عروسين في أفغانستان يمارسان عادة الزفاف التقليدية المتمثلة في تبادل شرب العصير الحلو
خلال مراسم زواجهما في حيرات يوم الاربعاء. وكان قد تم في هذا الحفل تزويج فتاة في الثانية عشرة لفتى يكبرها بعام واحد

انا بصراحه ما اتوقع انه ( عصير ) .. ( حليب ممكن ) سيملاك بالفواكه ممكن ؟

اتذكر يوم كنت في ثانية ابتدائي كنت اسمع عن الزواج المبكر ،
وكنت احسبه الزواج الذي تتم مراسيمه قبل ان تفتح المدرسه
وكبرت وعرفت ان الزواج المبكر هو:
الزواج ( اللي يدبسك ) بإمرأة تقف على اكتافك لتجعلك تغرق في الرمال المتحركه.



هالمزيون متزوج العام الماضي بالشمال ، وعمره 13 سنه ، ويقولون إنه إلى الأن يلعب حبشه ولكن مابعد احد صاد الثاني ..

اول ميزه يذكرها لك شخص يريد ان يقنعك بالزواج المبكر ... هي ( يصير عندك ولد كبير ) وبعدين يصير صديقك.
ما ابيه يصير صديقي ( اذا بغيت صديق بالقى اكثر ماكثر الله الاصدقاء احيانا الواحدينحاش منهم)
***

وهذي سالفه قد قالتها لي الوالده لواحد من اقاربها << الوالده كأنها ابن شرهان

اسمعو السالفه كما وردت من ثغر الوالدها حفظها الله ورعاها

هذا زوج عمتها مزواج ويقدر العرس ويعشق النساء وكل ماذكر بنت طيبه الا خطبها المهم ذاك اليوم ذكرو له وحده من بنات الرياض قالو انها مزيونه واسمها نوره بنت ماتفوت عمرها 17وهو عمره45سنه ..وصكت الفكره في راسه
ولااذن العشاء الا وهو عند ابوها ..
قال يابو نوره ..انا جاي اخطب بنتك نوره
قال تخطبها لمين..
قال لي
قال ابو نوره ..والله لوهي ذبيحه ماعشتك ولكنك كبير على نوره ..ونوره توها صغيره
قال اجل ابيها لولدي عبدالله ..<<عبدالله عمره 13 سنه
قال لعبدالله تم
قال بعد بكره العرس
رد ابو نوره تم
***
وصار الزواج
وابوعبدالله لبس عبدالله جزمه كعب علشان يطول المراه ..واللي زاد الطين بله
ان عبدالله كان يلعب مع العيال برا مع العلم انها ليلة زواجه ..ومن كثر اللعب والدوجه مع ذا البزران داخ و نام عبدالله في مقلط الحريم ..صار الوقت اللي بيزفونه على مرته ويدورن الولد لقوه نايم ويصكه ابوه بذاك الكف ..زفوه وهو يبكي ويناشق وهذا غير الكعب اللي مايقدر يمشي فيه ..وكانت هذيك الليله اقرد ليله مرت على عبد الله ..صكه ابوه بدرزن كفوف لين قال بس ..وتزوج وجاله 8 اولاد وبنات


بس عاد خلو عنكم الزواج المبكر له مزايا بالرغم من كل اللي قلته ...

اولا : المهر .. ما يكلفك شيء كلها كرتونين حلاو وكرتون حليب شيكولاته وفتاشه لامها ( علبة جواهر جالكسي )
والصباحه ( كيلوين شيكولاته من باتشي ) ... يعني كل العرس بخسايره ما يجي له 500 ريال ،
أما بطاقات العرس فما راح تتعب فيها ... تاخذها من اقرب محل Toy r us
7



ثانيا : قصر الافراح ... اختر لك حدا هالملاهي .. فانتزي لاند وإلا الحكير ...ودوخ المعازيم بالصحن الدوار
علشان ما يتعشون وتحوم كبودهم واجمع هالبزارين وكل من دخل عطه بــ 30 ريال اسواره
وخله يلعب لين تنتهي مراسم الزواج .بدال هالبوفيهات اللي بــ200 ريال الشخص
وتعزم لك 600 رجل وامراة .. ويصير الحساب 120.000 ريال.
ثالثا: الاثاث المنزلي ... واثاث المطبخ .. تمر ( اباحسين للالعاب وتلقط لك مواعين )
ومطبخ وتخلي المدام من الصبح إلى الظهر تلعب وتلهي عنك فيما انت معك ( نباطه ) تصيد عصافير على شجر بيتكم .

رابعا: المشاكل الزوجيه راح تكون خفيفه جدا .. لن تتعدى .. ( رح انت وجهك .. او لاتقبص .. او لا تطقنا ).
وان طالت وشمخت وصارت حرب ضروس .. فهي مخابط بالمخاد في غرفة النوم ..



برأيي ان الزواج مسئولية اكبر من ( لعب البزران ) ، وقد تتطور المشكله لان يكون لدينا اطفال ينجبون اطفال.ولسنا بحاجة لزيادة نسب الطلاق على رأي المثل الايطالي ( عساها بحملها تثور ).



عزيزي العضو/ـــ ة :

س1_ كم الحد الادنى / والاعلى المقبول لعمر شريك حياتك؟
س2 - هل الزواج مقترن بعمر محدد؟