ودع منامك وازرق الدمع هاته=جاء للبكا حزه وجاء للدهر ميل
ماعاد لك يم النجوم التفاته=ياجفني اللي ضامته غيبة سهيل
كن السحاب اليوم جفت لهاته=وكل الدروب اليوم ضميا من الويل
وافهدنا اللي كفنوه بعباته=شيخآ ترجل وايتمت صهوة الخيل
جدي ولا يجبر عزا في وفاته=ابو الجميع الوافي بزايد الكيل
نظارته بشته مكانه عصاته=مروفته كله فقدناه بالحيل
ابوته مودته في سكاته=تدقيقه الكامل بكل التفاصيل
توجيهه الحاني غلاه ورضاته=بعده جرحني جرح وادي من السيل
اواه لو تفدى حياتي حياته=رمز الوفا والخيل والليل والهيل
والله ماتمحى سنيني وصاته=من قال ولم للمنايا فناجيل
ماتنتعدد بالدها غانماته=شمسآ كست في نورها حالك الليل
مثله بقت فينا فضايل سماته=لو راح يبقى له معزه وتبجيل
رجلآ يموت ولا يهمك مماته=ورجلآ يموت ويفقدونه رجاجيل
مرحوم يلي ماتماثل صفاته=رواه بالدنيا لجيلن ورى جيل
ابحل ماكن الخفوق عبراته=وماوحد المسلم لربه بتهليل
ومارتل القرأن شيخ بصلاته=ومابدل الخالق بالاحوال تبديل
اسألك ياربي تقوي ثباته=عند السؤال وتجعل الختم تسهيل
يارب تغفر له وتكتب نجاته=واجعل له الجنة ثواب ومحاصيل
فهد وتبقى راسخه منجزاته=اصدق من التاريخ والقال والقيل
يالارض وانقلبي سما من رفاته=يكفيك فخر انه رقد فيك حلحيل
الامير / فيصل بن خالد بن سلطان بن عبدالعزيز
العرض الشجري