رجال يضرب ضيفه !!!

[جالس بن مبارك]

السلام عليكم

قرات لى قصة فى احد المنتديات و حبيت انى انقلها لكم

وجدت مثلا عند العوام يقولون مثل فلان يضرب ضيوفه .. وسموه .. لكن أنا أتصور أن تسمية العائلة مهيب صحيحة لأني سألت كبار السن منهم وقالوا ماسمعنا يمكن أحد زعل على واحد منهم وركب عليه القصة ..



هذا رجال كريم وكل ما صلى الفجر عزم له ضيف وخاصة اللي يجون من خارج الديرة ... لكن ما ياخذ شوي إلا والضيف منحاش وهذا لاحقه بعصى حتى اشتهر بأنه يضرب ضيوفه ....
جاء هاك الرجال الحكيم (( ملقوف شوي )) وقال أنا أبغى أعرف ليه يضرب ضيوفه ؟؟؟
عزمه وقلط معه ... قام الرجال وشب الضو وحط (شوي حب قهوة) في المحماسة وتركها على الضو إلين حرقت .. وهذا ساكت ماتكلم أبد .. وكب اللي محترق وحط ثانية وثالثة والرابعة قلبها وزانت الحمسة وحطها في اللقمة بعد مادقها في النجر ... وحط اللقمة علىوسط الضو وفارت وطفت الضو ... والضيف يناظرة ويسولف ولا كأن شي صار .. حمس ثانية ويوم ( حكمت القهوة ) زلها في الدلة وحط عليها المسمار والهيل ثم حطها في وسط النار وفارت وطفت الضو... وبدا من جديد ... وهالضيف ماحرك ساكن ماكن شيء صار ...وبعدما زانت القهوة تقهوى معه وجاب الفطور والمراصيع واللبن والعلوم الغانمة ..ولما أكرمه واستأذن للخروج .. سأله وقال : سمعت أنك تضرب ضيوفك .. ليه ؟
قال : إن الذين يأتونني فيهم عجلة وقل صبر اذا فاحت القهوة طمر ووخرها عن الضو ومن يوم أحط الحب في المحماسة يقول تراه بيحرف .. وماله شغل إلا يتنقد .. أنا كني صبي عندة .. وبعدين أتهاوش أنا واياه وأطرده وأحيانا آخذ حقي ...
أما أنت فرجل فيك حلم وصبر وتعرف علوم الرجال ... لذا أكرمتك .