يستاهل الفنجال شارب صنيتان

[هند]

السلام عليكم ورحمة الله وبركاته

هالقصه مذكوره في كثير من كتب التراث وخاصة اللي تذكر القهوه واصنافها.

القهوه انواع ولها طرق مختلفه حسب المنطقه ، وكان ولازال على فيه ناس تنقد القهوه المطروقه ولا اللي بها عذاريب!!

الشيخ ( صنيتان بن راجح ) من امراء ( حرب ) اشتهر بنقده للقهوه من لونها وريحتها

وكان بعض الناس بالاول ويمكن من الفقر او البخل يخلطون القهوه ومن شطارتهم تبين انها قهوه عادية عند معظم الناس ...
الشيخ ( صنيتان ) كان يعرف ان كانت مخلوطة او لا ويعرف اذا كان اللي مسوي القهوه حرمة والا رجال .. فاذا كانت حرمة ما يقربها (من اول الحرمه ماتقرب الدلال ، ومدري سمعت ان فيه كم قريه بحائل لهالحين عندهم هالعاده)

ومرة استدعاه ( عبيد ابن رشيد ) حاكم حايل ... وقال لعبيده (وكلنا عبيد الله) سوو قهوه من ثلاث اصناف
طبعا يبغا يمتحن ابن راجح (صنيتان)...
ساقوا الفنجال ( لصنيتان ) .. وساله ( عبيد ) : هاه وش رايك بقهوتنا؟
قال: زينه بس لو ماهي مسواة بثلاث انواع
ضحك ( ابن رشيد ) وقاله:

صدقت يـ ( ابن راجح ) وعز الله انك تستاهل الكيف وانت راعيه وصدق من قال انك ناقد قهوه
ويوم بغا ( صنيتان ) يمشي عيا ( ابن رشيد ) وقاله الليله منت برايح ومن اصبح افلح ،
ويوم اصبح الصباح وبعد صلاة الفجر جابوا ( العبيد ) القهوه وساقو الفنجال على ( ابن رشيد ) ثم على ( صنيتان )
فرفض ( صنيتان ) يشرب القهوه خذ الفنجال وخلاه قدامه
قاله ( ابن رشيد ) : اشرب فنجالك يـــ ( ابن راجح )
عيا ( ابن راجح )
فقال ( ابن رشيد ) : اما انك تشربها والا تقول ليش عفتها
قال ( ابن راجح ) : تعطي العهد انك ما تتعرض على ( العبيد ) والا ماني بقايل لو تقطع راسي ، فعطاه ( ابن رشيد ) الامان للخدم
فقاله : القهوه صايده (فيها طرق)
امرهم ابن رشيد انهم يرمون القهوه من الدلال كلها
وجابو القهوه مره ثانيه وبعد ما شربها ( ابن راجح )
قال : القهوه ما تغيرت
قاله ( ابن رشيد ) : رمينا كل الدلال الاولة والمباهر ؟
قال ( ابن رشيد ) : كل لوزام القهوه انثروها ويوم انهم نثروا المصفاة (القمقم )
وش حصلوا لقوا بهالمصفاة دبدوب (شبث)
فقال صنيتان يوم شافه هالمقوله اللي صارت "مثــل" بعدين ...
" أشرب مرق ونا بن راجح"

وكان من بين الحاضرين شاعر شمري فقال قصيدة منها هالابيات :

يستاهل الفنجال شارب صنيتان*** اللي يبين ما خفى من عيوبه
من شمته يعرف عيوبه كحيلان*** والناس من حوله حشى ما دروبه
ابن رشيد عبيد يشهد وسبهان*** واللي حضر هاك النهار اشهدو به


وسلامتكم
السؤدد