غـزال والشـر زال..!!

[محمد بن منصور]

السلام عليكم ورحمة الله وبركاته


أنا تعودت على الكتابة ،ولي فيها بعض الكتابات ،وأنا لست بأحسن المجموعة لكن لي مجال ،وأحب الكتابة
بلهجة أهل الخليج كلهم ،وأحب أكتب عن دولهم حتى لو لم أعيش فيها ،لأنها لا تخفى على أكثرنا..


أحب الأسلوب السلس في الكتابة ،وأحب أحسس القارئ بأنه جالس يتحدث معي من خلال كتاباتي ،وحبي موزعه على الجميع هنا بدون تفرقة ولا تحيز ،وحتى زوار المنتدى لهم حق علينا أن نقدم لهم ما يسرهم ،وما يجعلهم يسجلون معنا والمحل لجميع المحترمين..

موضوع اليوم هو عن كلمة تقال في البادية ،ولكن أكثر الناس لا يعرفها لأنها شبه منقرضة ،وفيه لها بدائل تقال وتنوب عنها(وكلمة موضوعي هي غزال والشـر زال)..نعم هذه الكلمة قديمة وكانت تستخدم..

غزال والشر زال كانت تقال لمن يصاب بكسر أو مرض يحول دون قيامه بواجباته ،مثل سقي الحلال (الأبل والغنم)عند البادية ،والفلاحة عند الحاضرة ورعي الأبقار ،فعندما يزورونه يقولون له (غزال والشر زال)..تشجيعا له أي أنك اصبحت بعافية و صحتك مثل صحة الغزال ..

أما الكلمات المستخدمة الآن هي خطاك السوء وما ترى بأس ،أجر وعافية ،طهور إن شاء الله ،وقد يجوز أن فيه أكثر منها ،وودي لو فيه أحد يعرف كلمات أكثر يقولها في الرد وسوف أكون شاكرا له..

ختاما فيه كلمة مشهورة جدا ولها ثقلها ولا تقال إلا لشخص عزيز وهي (بي عنك)،يعني بلهجتنا (جعل الوجع في ولافيك)وين اللي يقولها الآن ؟،إذا شاف واحد على معاكيز شمت به.. هذا ما حبيت أن اعرضه لكم من الكلمات التي كانت تستخدم قديما ..كل الشكر والتقدير للجميع و يا هلا وغلا بكم..

بقلمي/محمد بن منصور (هذه من الأرشيف)..

[صوت الجنوب]

يعطيـــــــــــــــــــــــــــــــــك العافية موضوعك شيق ولطيف ...

كفيت ووفيـــــــــــــت ....يمكــــــــــــــــــــن ما يحضرني الآن سوى عبارة "خارج من الشــــــــــر "

أيضا ً هي تقال في مثل هالظروف ....


وأعـــــــــــــدك لو عرفت عبارات أخرى سوف أنقلها هُــــــــــــــــــــــــنا ...



كــــــــــــــــــــــــــــــــــــــل الشكـــــــــــــــــــــــر ...

[محمد بن منصور]

صوت الجنوب


ياهلا وغلا.. والله يعافيش..

أنا من هل الكلمة اللي ذكرتيها..

وفيه من يقول (الله يطعني عنك)..

وفيه من يقول(خذيت ضيمك)..

وهي كلها تؤدي نفس الغرض لكن حسب الشخص..

شكرا على المداخلة الجميلة..

[●• Ŝђǿǿq •●]

موضٌوع جميل جداً ..
وكذلك أذكر لك من العبآرآت التي لآزآلت تُقآل لنفس الغرض ( في عدوينكً إن شآء الله )
وإذا كآن الشخص عمل حآدث ونجآه الله منه أكثر عبآرهـً يرددهآ النآس له هي ( في الحديد ولآ في العبيد )
ألف شٌكر لكـً ..~

[الـعـابـر]

لاهنت على الموضوع

[محمد بن منصور]

●• Ŝђǿǿq •●


ياهلا وغلا ،وشكرا على المرور،وشكرا المداخلة الجميلة والإضافة..

نعم جملة مفيدة وذكرتيني بعد (لاسلم العود الحال يعود)وهي تقال لمن يشفى
من مرض..

كل الشكر والتقدير..

[محمد بن منصور]

الـعـابـر



ياهلا وغلا ،ومن قال مايهون..

[ابورامي]

الاخ محمد لاهنت على ماكتبت ودامت كتاباتك ولك تحياتي

[محمد بن منصور]

ابورامي


ياهلا وغلا ، ومن قال مايهون ،وشكرا لك على المرور..

[الذآهبه]

ماعاد بقى لي شي أقوله
كفيتوا ووفيتوا

لكن كانوا إليا أنتشر مرض وسمعوا به

يقولون "" سمعنا وسلمنا ""

مدري تركب على الموضوع ولا جايين من جنبه

يعطيك العافيه يامحمد