وغنيت بأعلى الصوت يوم القمر غاب ( يامل قلبٍ تله الود تلي ) .

[ام رشود العجمي]

جيتك بفطرة طفل في عصر الإرهاب
على سماحة دين أكبِر وأصلي
.
جيتك ألم دنيا عنيده على شاب
ليت الليالي تخبرك وش حصلي
.
جيتك كهولة شيخ يعكز بمشعاب
بين الرجا والياس عمره مولي
.
ماطعت بك حاسد وواشي وكذاب
ولا عذولٍ فيك قللي وقللي
.
مبطي ودمع العين مابل الأهداب
وأقفيت من عندك ودمعي يهلي
.
أقفي بحملٍ يكسر متون وإرقاب
مايقدره حيد الصفا المستقلي
.
ترحل طيور الجو في الهجره أسراب
وأنا وحيد اقفيت من عش خلي
.
ضاعت حقوقي بين جاحد ونهّاب
وانته حقوقك مانقص ربع ملي
.
ياما فتلت زنود واعضود واشناب
في جنتك مابين شمسك وظلي
.
وكتبت فيك أشعار وأعطيتك ألقاب
عبر الأثير وشئ عبر المحلي
.
وغنيت بأعلى الصوت يوم القمر غاب
( يامل قلبٍ تله الود تلي )
.
مدري صحيح إن الهوى صدق غلاب
والا انا المخطي وانا اللي وانا اللي .!


جمهور العصيمي