لگ في الحقيقه قلب كاسر جناحه.......ولگ في الخيال امال والام وطموح

[خالد بن نفل]

بسم الله الرحمن الرحيم
صباح // مساء الخير

الله حسيبك ياعدوّ الصراحه
ما انته مصدق هرجة الروح للروح
الجّو جوي والوسائل متاحه
وباقرى لك آخر ما نقشته على اللوح
صحيح انا ماني قليّل شفاحه
في شوفتك لاقلت مشفوح مشفوح
لك فالحقيقة قلب كاسر جناحه
ولك فالخيال آمال والآم وطموح
يشتاق لك ليل الخميس وصباحه
وياسرع ليلاته تجي معك وتروح
ولك دور يلعب بالزمن والمساحه
وحكمتك دايم كل مجموع مطروح
وان جبت لك برهان واثبت نجاحه
ماكنك الا منقذ الخلق مع نوح
أنا وانا لي فيك نظرة مباحه
استسمحك فيها ولاني بمسموح
غرك شبابك واذبحتك الفصاحه
لين انقضى عمرك على غير مصلوح
بكره ليا خالط هماجه قراحه
دور لك قلوبٍ تحضنك وجروح
إن كنت مسلم دين اهلنا السماحه
والتوبه من الله لها باب مفتوح
وان كان تعذيبك لصاحبك راحه
ماني مفزع فيك سالم ومسروح
يفداك قلب ما يدوّر صلاحه
يقضي حياته بين ذابح ومذبوح
وتبقى حبيبي ما تحب الصراحه
لوريحها من مجمرة قلبك يفوح
أغرقتني عذرك نظام الملاحه
ما هو مبرمج هرجة الروح للروح