عهدي بها قدام تلبس عبايه = وانا بعد قبل البس شماغ وعقال
طفلين نتهجى حروف الكتابه = الله يا ما جمل سواليف الاطفال
كانت لنا في كل شارع حكايه = وكنا نقول علوم ماهيب تنقال !
وكنت اتقاسم مامعاها معايه = من ( اسكريم التوت )للعك ابوريال
وكانت بعكسي شاطره بالقرايه= تقراء جزء عم وطه والانفال
وانا لك الله من مواري غبايه = مدري ابو نقطه هو الذال اودال
وكانت لابويه تشتكي من شقايه=وتعلمه كيف اربط الباب بحبال
ياما على ظهري كسر من عصايه= يقول لي خلك وانا ابوك رجال
وامي تقول : ادع لولدك الهدايه= خوفي يصيبه كثرة الضرب بهبال
لاشفتها مع اول الدرب جايه = مادري انا اللي ملت والا الوطا مال
احس قلبي يرتجف في حشاي = ماكنه الا الضيف لاهز فنجال
ياما عن ( السعلو ) تخبت ورايه = لاخوفوها فيه ثم شافت ظلال
تقول خلك : يامحمد معايه = واستانس العب عندها دور الابطال
واغار حتى من عيون اصدقايه = لا طالعوها قلت تكفون ياعيال !
الشاعر محمد النفيعي
العرض الشجري