سلّم على البحرين
الشاعر محمد بن ارتيان يشاركنا بهذا النص الأكثر من متميز في احداث البحرين ويوجهه للشيخ ناصر بن حمد آل خليفة فمع ابن ارتيان وهذه النادرة.
شعر محمد بن ارتيان العرجاني
ياشيخ ناصر صباح العز بانواعه
تحية الطيب راع الطيب يكرمها
من هاجسن ينسف الدنيا على ذراعه
والراس مرباعها والقلب موسمها
مضمونها يقطع اللي موطنه باعه
والعدل بختامها والخير مِقدمها
ياشيخ دنياك فيها الأمن والراعه
وبعض البشر الانظمه عجزت تنظّمها
من جهلها تشرب المجهول من قاعه
وأعدائها تدعم الباطل وتدعمها
واللاش كانه ركز فالضيقه كراعه
فزعة خوالك تجي من قبل تزهمها
ترى (ال عرجا) نهار الضيق فزّاعه
يعجبك بارودها ويعجبك محزمها
شراية الموت والاعمار بيّاعه
تكسر اعداها وتخزمها وتكزمها
والعز ماتقبل انصافه ولا ارباعه
اما يجي كله أو الموت مغنمها
من صلب يام الظفر وحماه وشراعه
ودون الكرامه قيامتها تقوّمها
وارواحهم دونكم للموت ملتاعه
ولو راحت تروح جعل الله يرحمها
حكم الخليفه الين تقنبع الساعه
ماغيرهم سدة البحرين يحكمها
هذي الحقيقة وراس الشر واتباعه
يقطع ويخسى وتبع الروس نشكمها
رمز البلد ماله السمع والطاعه
وروسن تطاول على البحرين علّمها
ان البلد عاد دونه وقفة اسباعه
اسباعن تقيّد اعداها وتخطمها
وخليجنا أمنه بصيفه ومرباعه
أهم الأهداف والواقع يترجمها
والراي مفتوح مصراعه ومصراعه
الأفواه حكامنا ماهي تكمّمها
وحنا مع العدل لن العدل مرجاعه
للدين والفتنه الاسلام يعدمها
وحنا مع الخير لن الخير مطلاعه
ترقى به شعوب وتواصل تقدمها
وحنا مع العز لن العز وتلاعه
نوماس والناس تكره شي يظلمها
وحنا مع الأنظمه والروس جزاعه
مادامها تخدم الدولة بنخدمها
ومادامها الجرح تعرف سبّة اوجاعه
وتحاول تعالجه فالله يسلّمها
جاتك بيوت الشعر ياشيخ منصاعه
وابيات شعري تكلمني واكلمها
لين الشعر يبتهج ويبيّن ابداعه
وتليق باللي على شانه اهندمها
سلام يابو الظفر والعز بانواعه
ياشيخنا اللي متون الطيب يدحمها
واسلم وسلم على البحرين وارفاعه
لو المنامه نقدّرها ونحشمها
الشاعر: محمد بن فهد بن إرتيان العرجاني
30-04-2011, 04:07 PM
العرض الشجري