مـدح فـى الـشيـخ / عـبــدالله بن فهــد الـدامــر و الــعــجــمــان

[هل الخيل الصفر]

السلام عليكم ورحمة الله وبركاته ..
الشاعر محمد بن ادهيم الغييثات الدوسرى قال فى مدح
الشيخ / عبدالله بن فهد الدامر رحمه الله و ابو فهد
يستاهل المدح والثنا جعله فى الجنه ..
يقول ابن دهيم ..



لا ضاق صدري ودّي اغنى اصوات
عند الضحى لاجيت روس العوالـي
دنو لنا جمـس ٍ جديـد الحركـات
من منوة السواق فـي كـل حالـي
تـوّه جديـد كامـل ٍ بالكفـالا ت
لامن نوينا البعد مـا ضـاق بالـي
ودّي نسير صوب حامـي الونيّـات
عيد الركايب اللّي حفايـاً أهزالـي
عبـدالله اللّـى يرتكـي للثقـيـلا
تو جزّاع لا شاف الخطا ما يمالـي
يرسي إلى كثرت عليـه الطلابـات
مثل هديب الشـام للحمـل شالـي
الكيف عنده فـي الـدلال العذيّـات
ولا جيت تلقا في محلّـه ارجالـي
يفداه من هو ما يشيـل الخسـارات
حافـظ بـلاه لحرمتـه و العيالـي
و يفداه من هو قاضب ٍ شيّه ومـات
قضا بهـا ايليـن خطفتـه اليالـي
انتم لنـا و حنّـا لكـم فالقديمـات
و مركالنا لا صك جـال ٍ بجالـي
من لابه ٍ يثنـون عنـد الرديـات
لا جـا نهـار فيـه فـك التوالـي
عجمان ما مدحي لهـم بالخرافـات
كم صبّحوا نشر الحفيـف الموالـي
مركاضهم يبرى الكبـود الغليـلات
الى ارتكز عج الرمـك و القتالـي
و لعل من جابـك تمهـد بجنـات
عسـاه يقبـل عنـد رب الجلالـي
و على النبى صليت انا بالتحيّـات
اعداد ما هبّـت جنـوب وشمالـي


وقال الشاعر هذه القصيده فى مدح العجمان لما تربطه بهم من محبه وصداقه وخوه من قديم وتالى ..
يقول بن دهيم ..






الله يعـزك دايـم ٍ مـن قبيلـه
قبيلة ٍ يلجـا بهـا كـل مظهـود
اهل القدايـم و العلـوم الجميلـه
يشهد لهم التاريخ ما نبغي شهود
عجمان لا ركبو على كل اصيله
خيّالهم لامن ركب يروي العـود
عجمان لابـار العميـل بعميلـه
لا عود النباب و الصلح مـردود
عجمان يبرون الكبـود الغليلـه
لا جا الملاقا و امتلا الجو بارود
اهل القنـازع مقحميـن الدبيلـه
لا جا نهار فيه طايح و مطـرود
صديقهم ما قيـل : يـا عزتيلـه
و حريبهم يصبح من الغبن ملهود
و صلاة ربى عدو بـل المخيلـه
على الرسول الهاشمي خير مولود


وسـلامتـكـم ...

[ناصر العسكر]

السلام عليكم ورحمة الله وبركاته


الله لا يهينك علي النقل الفاخر يا السنافي

وصح لسان قايله وتسلم يمنا ناقلها

وتم التثبيت

[أحمد منصور العجمي]

بيض الله وجهك عالنقل وصح السان الشاعر

لاهان المادح والممدوح والناقل

[هل الخيل الصفر]

بيض الله وجيهكم
والله لايهينكم
يسلم لي مروركم

[عـزوز]

صح لسان الشاعر / محمد بن دهيمـ

ولاهنت ع نقلها

يستاهل الشيخ / عبدالله الدامر

الله يعطيكـ العافيهـ

[هل الخيل الصفر]

الله يعافيك ويسلم لي مرورك يا الغالي