قصة&قصيدة فطـــــــــــوم

[سهوم بقعهـ]

السلام عليكم

كل عام وانتم بخير بمناسبة قرب شهر رمضان المبارك

يقول الراوي ياساده ياكرام 7
7
7
7
7

هذا واحد من الشعراء شاعر معاصر له قصائد جميله في الغزل وسوالفه زينة وذربه , وهو راعي سيارة وهذي السيارة

من السيارات الكبار كان يجلب عليها غنم يجيبهن مثلا من جدة يوديهن للدمام يبيع ويشتري ويترزق الله ويوم جا مرة من

المرات ولا هو محمل هالغنم من المينا وما شاء الله عليه ما يكل ولا يمل من طول الخط يمشي على راحته والين تعب وقف

ونام واستراح وصلح غداه وجمع حطب وصلح له شاهي في بريق معدن هاك الشاهي الناقع اللي طعمه يقعد الراس

ريحته وشكله لانه مصلح على حطب (ما ودك الا تذوقه ) الحاصل ان هالرجال وسيع صدر الى منه مشي وصار

الخط مستمر والاه يغني في الدرب وهو ماشي بقصيدة عاد هو راعي هوى ويقول ..



ياعيـــن هلــي دمــوعك ياشقاويـــه * * * وابـــــكي على جـــادل بالحب عنانــــي

تعبــــري كــل صبـح وكـل عصريـــه * * * لين الفلك يستديــر وينقضـــي شانــــي

حيل الله اقــوى تكسر عبرتــي فيــه * * * والوصل مقطوع والمـــوت الحمر جانــــي

ياوجد روحــي على المرواح والجيــة * * * واخــاف من واحــــد بالهـــرج يقفانــــي

ميـــلاف والقلب تشعــاه السنافيـــــة * * * شعيـــة قطيع شعـــوهن ركب كرزانــــي

اقفـو عليهن باهـــل تسعين منقيــــة * * * مع مربـــاع ما يجيــــه الذيب سرحانـــي

تقاسمــــوا جلهــن حمايـــة الهيــــــة * * * ومفـــرق ولفهــن تركــــي وسلطانـــــي

على هنوف لها في البيــض ماريـــــة * * * مــــاوقفــت تلتــفــت لفـــلان وافلانــــي

ياعيـــن شيهانـة ماهيـــب وكريـــــة * * * اومــى لها بالعشـــا رجــال ابن ثانـــــي

العنــق عنـق الغزال الحـــذر وادميـــة * * * اقفت مع الصبـــح يم هضــاب بسيانـــي



هذي من قصايده الجميلة الغزلية وراح مستمر في خطه يمشي يوم وصل مع العصر لرجال جايب له الغنم يبي ينزلهن

عنده يوم جا والا له بيتين الرجال ماشاء الله عنده حرمتين وله بني وعيال واجد ..

اقبل و وقف السيارة والى يوم لاقاه راعي البيت ياهلا ياهلا حيالله ابو محسن هو عاد اسمه محمد السليمان الحسين

ويلقبونه الدرم حيالله الدرم ياهلا اقلط اقلط متى وصلت قال هذي وصلتي وهو كريم عاد ويده رطبة جايب معه هدية

لراعي البيت وعطاه اياه في يده وقال اقلط وقلطه وخذاله فنجال والموتر لا يزال يشتغل قال ودي انزل الغنم لانها

محتجرات والقهوة لاحق عليها قال اجل رح رح نزل الغنم ونبي نولم العشاء لين تجي قال مافيه احد من العيال يساعدنا

قال الا كيف والا هاك البنت مصككه اسمها فطوم ناداها ابوها يافطوم روحي وانا ابوك افتحي الشبك وخليه ينزل الغنم

وعاونيه ساعديه قالت ان شاء الله ( جاك يا مهنا ما تمنى ) وتجي هكا لبنت العنقاء الي ماشاء الله عليها

ما خلت من الجمال شي لكنها طبعا متبرقعه ولا هيب بيضاء مرة الشمس لا سعتها ومخلية لونها لون برونزي وعليها هاك

الثوب الحمر عضودها حازمها الثوب منا ومنا متعافيه البنت وعراقيبها حمر من الفتوة ما فيها شقوق ولاشي وهي

نشيطة انشط من الرجال , المهم وتروح هناك وتفتح الشبك وهو يوم شاف ان الي تنزل الغنم البنت تلخبطت عدته وغدت

عشره وحدة يعني جاه مثل الرعشة شوي المهم يالربع راحوا ينزلون الغنم اللي فوق لان فيه طابقين نزلوا الغنم ويوم

نزلوها ويدلي يجدعهن عليها ما شاء الله كل ما جدع عليها طلي صكته بيديها ما عاد يتحرك المهم تخليهن يدخلن في

الشبك على واحد واحد , نزل اللي فوق وبقى اللي تحت حول عاد يبي يفك باب اللوري من ورا , هما هو له باب ثقيل

يفتح من ورا من تحت وقال تعالي يا بنت ساعديني منا لأنه خاف يطيح عليه او يطق ركبته , وهي تجي تبي تساعده

جت تبي تفك السلسلة ما قدرت , قال لا لا لا ما هيب كذا السلسة كذا وتقل ناش يدها وهو يفك السلسة ودلا يرهم قلبه

زيادة يوم ناش يدها ( الله لا يعديها من سلسلة ) طبعاَ ما ينلام مسكين بنت جميلة وقام ينزل الغنم ويناولها على

وحدة وحدة الين نزلوا كل الغنم ..

الحاصل قبل ما ترجع للبيت قالت رح رح عاد للمجلس تبي تجيك القهوة قال زين الله يعافيك يافطوم ( والله تو ما جا

يركض ) وقعد يناظرها وهي مقفية لين راحت والله اعلم وش يناظر على شانه ( ابراء الى الله ما احط في ذمتي شي

ههههههه ) المهم راح ويوم انه وصل حول البيت وقف الموتر دخل عندهم يتقهوى وقام عاد يمدح البنت قدام ابوها

ما شاء الله فطوم ما قصرت عاونتنا وساعدتنا ( اييه عاد بدينا في التميلح والتمصلح ) والله انها عن ثلاثة عيال

وانت صادق والله انها عن ثلاثة عيال واني معتمد على الله الكريم ثم عليها هي اللي تلاحظ الغنم وتواليهم الله يخليها

لي ويرزقها الرجال الصالح والى يوم طرخت اذنه ( هذا هو اللي يبي ) قال والله اني مستحي عاد ما يدري وين

يجيه معه وده يحاكيه من سنع الخطبه الحاصل انه بعد ما تعشا من عندهم هاك الليلة وامرح ويوم جا من باكر الصبح

وهو رايح في دربه .

راح وأبطى عنهم قعد له فترة ما جاهم ويوم جا السنة الثانية والاه مار من عندهم رايح لناس ثانين وتطري عليه أمرهم

والا ما أمرهم ( الى الحين ونوشة اليد في قلبه ما نساها ههههه ) خاف يتولع في فطوم مرة ثانية لأنه الحقيقة بعيد هو

هناك يم القويعية وذولا مثل ما تقول يم جهة الدمام بعيدين قال وش يجيبني لهم والله اني غلطان اخاف احاكيه ويقول ما

يخالف وانشب انا لا لا لا تدري ما يحتاج وهو يعود في سيارته ويغني ويقول ..



انا هالزمان مهـود عـن هـوى فطـوم
سمح خاطري مابـي عيونـي تخاليهـا
لا ياقلب بنت الناس مالي بهـا ملـزوم
ولا هيب من نجعـي ولا مـن قبايلهـا
انا شف بالـي جـادل جنسهـا معـدوم
تنثـر علـى حـد الردايـف جدايلـهـا
مداهيلها نجـد العذيـة سهـل وحـزوم
هضاب المـدارة كـل عصـر تـضللها
طعمها براسي ما تبي اللي يعبـي نـوم
نظيـف الملابـس كـل يـوم يغسلهـا
ينام الضحي والليل يسري بـه الجاثـوم
يشجع هـل السمـرة ويصبـح مقابلهـا
وانا فوق وارد بون حالي كما المسقـوم
علـى رقمـي النجـدة تكلـم بأناتلهـا
الى جيت عند الظابط اللي عليـه نجـوم
تعذرت منـه وهرجتـه صـدق يقبلهـا
وأودي علوم للنشامـى وأجيـب علـوم
وشنق هضبة الجولان في الحرب واصلها
ولا يا وجودي وجد من جـودوه الـروم
سجيـن تلـوت فـي يدينـه صناقلهـا
ولا يا وجودي وجد من طاح بين القـوم
ضرب ركبته مخباط مفـراص محلولهـا
قعد والطيور والجايعـة يدرجـن الحـوم
وشهب الذيابـه تسحبـه فـي مداحلهـا


منقــــــــــــــــــــــــــول مع التحيهـ*-*

[دوسري يحب العجمان]

وانتي بالف خير وعافيه اختي سهوم بقعه

سهوم بقعه لاهنتي على القصه والقصيده الرائعه

وعزالله راح فيها والسبب فطوم وسلسالها

قصة جميله والنقل ولاسلوب ارروع ولاهنتي على النقل

وتقبلي مروري ..........

[handsome]

انا هالزمان مهـود عـن هـوى فطـوم
سمح خاطري مابـي عيونـي تخاليهـا
لا ياقلب بنت الناس مالي بهـا ملـزوم
ولا هيب من نجعـي ولا مـن قبايلهـا

الله يسعدك أخوي ..

[Najla]

وإنتي بخييييييييييييير يا سهووم..

أربـّه يعرس عليها

يعطيش العافيه على القصه ولآآهنتىي فديتش

تحيآتىي ..

[سهوم بقعهـ]

يا هلآ ومرحبآ

تحياتيّ لكل من ردّ

اسعدنيّ مروركم العطر

[جطلي بن فهد]

السلام عليكم ورحمة الله وبركاته

لاهنت على ما اوردت من قصة وأبيات رائعه
والله يعطيك العافيه

[سهوم بقعهـ]

يا هلآ فيكـ سماويّ بن نجمّ

اسعدنيّ مروركـ

تحياتيّ لكـ

[كلاش]

مشكوره

على ما اوردت من قصة وأبيات رائعه
ولاهنت