(( بسم الله الرحمن الرحيم ))
والحمد لله رب العالمين , مالك يوم الدين , إيــّـاه نعبد وبه نستعين , أحمده حمدا ً كما ينبغي ويليق بجلاله وعظيم سلطانه , وأصلي وأسلم على نبيه الأمين , قائد الغر المحجـّلين , محمد بن عبدالله عليه وعلى آله أفضل الصلاة والتسليم ومن إتبع هداه إلى يوم الدين0
عزيزي القارىء الكريم أضع بين يديك قصيدة لعلما ً بارزا ً من أعلا م قبيلة حرب وشاعرها الأول والغني عن التعريف وأشهر من نار ٍ على علم ولعلي أكون موفقا ً فيما سأتطرّق له من نبذة تعريفية عنه ومن ثم أتطرق لقصيدته المشهورة والتي قد حفظت في الصدور وبين السطور وهي بحق تعتبر
( ملحمة شعرية )وثامن المعلقات , لما إحتوت عليه من معاني سامية , ومن عزّة ٍ وكرامة ٍ وصدق هدف ٍ ومقصد , ولما بها من معلومات ٍ وأسماء بارزة لهذه القبيلة العريقـــة وهي قـــد قالها الشاعـــــر ردا ً على ( السديري رحمه الله ) تجاه مقاله عن قبيلة حرب 000 لن أطيل الشرح , وقبل ذلك أبدأ بنبذة ٍ تعريفية ٍ عن الشاعــــر وهـــــــــــــــــو :
الإسم : سبيل بن سند بن سبيل المزيني الحربي
من قبيلة الحصنان من مزينة من بني سالم من حرب 0
ولد سنة [[ 1356 هـ ]] في ضواحي مدينة محافظة الرس بمنطقة القصيم 0وقد إلتحق في سن ٍ مبكرة من العمر في اللواء السادس بالحرس الوطني في مدينة الرياض وكان أمير الفوج // ســلا ّف بن مفضــّـي البهَـيْمـَة وذلك في حدود سنة ( 1374 ) هـ وعندما إنتقل اللواء السادس إلى منطقة جيزان إستقال من الخدمة 0
وبدأ في ممارســة قيادة سيارات النقــل , وقــد مارس هــذه المهنة فــترة طويلة , ثــم تركهــا في سنــة ( 1399 ) هـ وإستقر في منطقة القصيم حيث إمتهن الزراعة , وذلك في منطقة ( دهيما ) الزراعية الواقعة جنوب مدينة عنيزة 0
وقد توفي ( علية رحمة من الله تعالى ) مساء الأثنين الموافق 13 من شهر محرم عام 1418 هـ , كما توفي إبنه سلمان في نفس الليلة 0
وله من الأبناء ستة وهم : سلمان وعقيل وثلاب وعبدالله وسند وحمد 0[1]
فرحم الله الشاعر // سبيل إبن سند وأسكنه فسيح جناته إنه هو أهل التقوى وأهل المغفرة0
ياأمير يا شين الخطأ منـك شينـاه
ياخوفتي عقلك هك اليـوم غايـب
يوم ٍ مثلك تزعل النـاس عوجـاه
رجّال عرف ومن حمولـه وشايـب
لاجا هل ٍ غي الجهل فيـه وأغـواه
ولا مسرد ٍ من كل الأطراف خايـب
أنته تقـول القيـل وتجيـد معنـاه
شالك هوى نفسك على غير صايب
لا كان حنّا مـن تحـدى إنتحـداه
من دون واجبنا نجيـد الصوايـب
ياشايب ٍ غي الجهل تـوّ مـا جـاه
يبى يعيب النـاس والعـود عايـب
يا ضريغط اللي شال همـن بدنيـاه
ياذيب بيـن معكرشـات الذوايـب
إن كان عنـدك للفعايـل إمجـازاه
حرب ٍ عمامك يوم مـسّ الجنايـب
غصب ٍ عليك وصامل العلـم تلقـاه
ان طاب لك وإلا على غيـر طايـب
أبـوك معطينـا الأخـاوه بيمنـاه
لـولا الأخـاوه راح مالـه نهايـب
يا من سواليفـه توسّـخ شفايـاه
ذيب العلوم ولا ذكـر لـك حرايـب
طوبى مقرّ اللي ولى الحكم وأرساه
يامآ رسى واليوم حـدر النصايـب
ورّث حبيب الشعـب عقبـه تـولاه
فيصل على كبد العدو سـمٍ ذايـب
بظلال أخو نوره مشى الذيب والشاه
خلّى الغنم والذيب تمشي صحايـب
وخلاّك يالنمرود تمشـي بحسنـاه
وتحط بالشعب السعودي عصايـب
والله يلو يدري عن العلم وأقصـاه
مالك شفاعـه لـو تشفّعـت تايـب
مغترّ فيك الله علـى الخيـر يقـداه
وش عرّفه لك عند مطلـق حلايـب
ماشاف نزل ٍ لـك يـدق الخونـداه
بمعيلـه مثـل الخجـز واللعايـب
نزل ٍ نشوفـه والمخاليـق تدهـاه
نـزل البـلاوي كلهـا والمصايـب
عن روس خلق الله وأنا أبـراي لله
عن ناس ترعى في طرفكم حبايـب
لو فيك خير ووجهك الشّين ينكـاه
مـا تعتـرض لمكمّليـن النوايـب
وأولاد وايل عـن سوالفـك مغنـاه
ماهـم بعـوزك يامـدوّه زرايـب
قطعانهم عشب الخطر غصب ترعاه
ترعاه أباعرهم لـو الـدم رايـب
وحرب ٍ قواطيع ٍ على الخيل وإرماه
عوق الخصيم مـورّدة كـل هايـب
وشريدة الفرسان وشلـون تنسـاه
وشلون تنسى يا طويـل الخبايـب
اللي على شيل الجماهـي مضـرّاه
يمناه والفسقـان سيـف العطايـب
وإبن نحيت اللـي نهـار المثـاراه
كم كبد حي ٍّ شـب فيهـا لهايـب
على أبلج خلّى الظـواري تعشّـاه
وبطوع إخو نوره تعشّـى كتايـب
وإبن جزاء يوم النضا جاه ينخـاه
وشلون تنسـى يالعيـن الصلايـب
يوم ٍ يشيب الراس من حس طرياه
بيـن الحناكيـه وذيـك الجذايـب
وفيحان إخو نوره تحت حد شلفـاه
كم فارس ٍ خـلاّ عظامـه حطايـب
اللي بجاهه يوم زاروا هـل الجـاه
رد الذويبي مـال رايـح كسايـب
ماخوذ غصب وضمّر الخيل تشعـاه
وشلون تنسى ياعجيـب العجايـب
ونسيت إبن ناحل مع الضيف وقراه
هيف السّمين اللي بها النّي سايـب
اللي يدسّم شارب الضيـف لاجـاه
الخيل يعطيها وعطا البـل وهايـب
ونسيت منور ذيب جمـع ٍ سرايـاه
مثل الدّبا الكتفان ريـف القرايـب
حرز الذليل اللـي يفـك المخـلاّه
نسيت إخو حسنا عطيب الضّرايـب
وذويخ بالعربـان تكثـر رزايـاه
إليا شان نطق إمّيْليـن العصايـب
كم هيّة ٍ زيزومهـا جـاب حسنـاه
وسعود من بعـده يفـك النّشايـب
وإبن جديع اللـي بهيّـه ضحايـاه
فرسان قـوم ٍ فـوق قـبٍ ربايـب
يبـون وضـحٍ بالأباهـر محنّـاه
افتكهـا ووّهـل جبرهـم نكايـب
ونسيت مانع حوض مـوت منايـاه
ماتأخـذ إلا محتمـيـن الدّبـايـب
كم فارس ٍ قرّب له أجلـه وغفّـاه
وعليـه خـلاّ للحوايـم لـوايـب
من كف إخو فـزه نواعيـه تنعـاه
عليـه هـلاّت العبايـر سكـايـب
ونويشي اللي بالخوي كل ٍ أوحـاه
بثرأ خويّـه عـن عوانيـه نايـب
قص أربعه وإثنين والسّابع أنجـاه
أنهى الملام وخاطره ماهـو طايـب
وأبوك يالهيباد مـن فـك بحمـاه
يوم الرصاص بنوع وبل السحايب
برّم عصب رجليه وإنّـا احتمينـاه
دونـه فعلنـا معجـزات ٍ غرايـب
واليوم عندك لـه محبـه وملجـاه
غوّال إبوك وحايب ٍ بـك حوايـب
والا ما تنسى وطيت ٍ فـوق علبـاه
وميقافنـا لا دفلجـن بـك ركايـب
جينـاه وإربـاع المبانـي ممّـلاه
في كل بيـت ٍ مكتّفيـن ٍ قضايـب
واللي نزل عنـده ثلاثيـن جمهـاه
بين الذرا والنار ضـم الحضايـب
من عرض من ربص هكاليوم بدماه
راع النقا والفوز يـوم الغصايـب
راسه سبق كفه على عرش ماطـاه
من كف إخو جوزاء وأبوك السّبايب
فعل ٍ على وضح النقاء ما إخترعناه
ما هي سواليف الوجيـه القلايـب
وأضحى جزاء ميقافنا اللي وقفنـاه
شبّهتنا ضيـن ٍ رثـع فيـه لايـب
ذيب ٍ يرد مـن أول الضّيـن لتـلاه
الشّكـوى لله ياكبيـر القطـايـب
والله والله واحـدٍ مـا أتمـهـزاه
بالكـذب..والله يالقلـوب اللبايـب
لولا القمر وسهيل والجـدي لـولاه
لأقول قـول ٍ مـا تعقبـه طلايـب
مار بذرا العنبـر تركـت العلنْـداه
ياللي تبي بالكـذب تأخـذ غلايـب
يالطّايش اللي طيّشه كبـر مركـاه
هلا هلا ياحوش بيـض التّرايـب
هذا جداك وغيـب قلبـك عرفنـاه
مار الغلط مرجوع وإنس الحزايـب
إما تعـذ ّر عـن مقالـك ومنشـاه
عبر الأثير ولا نبـي لـك نجايـب
يـوم المجلّـد كـل حـيٍّ ٍ تمـلاّه
تراك ما أنت من الإذاعـه نعايـب
دفترك ما خصيت به يـوم نقـراه
قاريـه أنـا ومسطّراتـه عرايـب
حتى تعـذ ّر لـك لنـاس ٍ مسمّـاه
كرّ النّظر وإحسب جميع الحسايـب
كرّ النظر وإضرب علـى ماتـورّاه
وعندك طريق العافيـه والعقايـب
إمّا حفرت البير وإقطن علـى مـاه
وإلا تدمّـه دام مـيّـه سـرايـب
مـادام كـل ٍ ماسـك ٍ مـاه بلـزاه
وإلا تعرّضت المحـن والصّعايـب
يمّـك ملاييـن المدافـع معـبّـاه
وأقفالـهـا قيّـادهـا بالكـرايـب
الطّيـش لايحرمـك لـذ المسـاواه
إعرف ترى للطيش غيب وغبايـب
إلا إن عندك للخزى ميـل مشهـاه
معجبك مالك من فعولـن ٍ رهايـب
فالله خلق للداء دواء وأنت مـن داه
ودواك للجـرّاح فيـه الطـرايـب
يامـا لعينـك مـن مغثّـه ومـاذاه
ياللي بحركم يامليـن الـذ ّهايـب
به حصة ٍ بيضـاء تـلالا مغطّـاه
غيّم سماها بين خضـر ٍ رطايـب
ماأدري ركبها غبار شيول ومسحاه
وإلا بهـا زدتـم إعـداد الجلايـب
لاوا قفيـن ولا بالأعيـان شفنـاه
حظـي بـري لله علينـا رقايـب
حظي بري ما قالوا النـاس قلنـاه
وبحظ من جاب الخبر لـي جايـب
ياطير إبن برمان مـدري حلايـاه
ياللي تبـي فينـا تحـط النّقايـب
ماهو هلا يالمنتسب عقـب عفنـاه
حنّا جبرنا مـا يحـوش القشايـب
ولا عندنـا لـك يامحمـد مناجـاه
خبل ٍ تومِّي فـي شنبـك الهبايـب
تبي تمثِّل عنتـر الخيـل جهجـاه
تمثيل وإلا مسـرد ٍ ماأنـت ثايـب
كلـــّـــي أمل أن أكون قد وفــّـقت بهذا التوضيح لهذا العلم , وبجزء ٍ يسير من نبذة ٍ تطرّقت بها عنه
وبقصيدته التي يعجز البنان أن يوفيها حقها , تجاه ذلك الموقف النبيل العزّة الشامخة 0
18-06-2007, 09:26 PM
العرض العادي
