قمت استحي لأبعث عليك المراسيل
اخاف من ظنّـك وسـوّ افتهامـك
لو كان ما قصدي بقطع المواصيل
بالعكس.. انا ليّ الفخر في سلامك
وانا متشرّف في معرفتْك بالحيـل
وافرح اليا منّه وصلنـي كلامـك
لكـنّ مـا ودّي تجيـك البهاذيـل
منّـي ولا ودّي يبيـن اهتمامـك
لقيت لك علـى مبـارك مداخيـل
وملكتنـي باسلوبـك وباحترامـك
وأقبلت لك بشعور ماهـو بتمثيـل
شيٍ يليـق بحشمتـك واحتشامـك
يا اعجوبة الخالق ويا فتنة الجيـل
مانيب قايل من غيابـك علامـك!
ان كان ما لك بالهوى والغرابيـل
هـذي قناعاتـك وهـذا نظامـك
تبقى ولو دار الفلك كنّـك سهيـل
وان ما ارتفع ما قل عندي مقامـك
وابقى على نهج الزحول الحلاحيل
والله يدنّي مـن دروبـك مرامـك
دارٍ سكنته يا عسى قاعـه السيـل
وقلبٍ ملكته جعل فالـه غرامـك
دعوه مُحبٍ كلّ ما طـرّف الليـل
قام ايتحرّا مـن سمـوّك سلامـك
19-12-2011, 01:15 PM
العرض العادي
