رساله الى كل فتاة .. هام جدا

[فيصل الدهمان]

بسم الله الرحمن الرحيم



رسالة إلى كل فتاة تحب من أخ :



اسالي نفسج مجموعة من الاسئلة مثل :

1- اهلي قصرو علي بشي؟

2- انا مصادقة اصدقاء سوء؟

3- هل انا كبيرة ف وجهة نظر نفسي او لا؟

4- هل بالفعل موجود (( اللــه )) في هالكون ولا هاذي مجرد اشاعة؟؟



مجموعة اسئلة اسالي نفسج اياها و جاوبي عليها بكل صراحة..

اصدقي ف لحظة جوابج على هالاسئلة لو انتي كاذبة طول عمرج..



شنو حاجتج للحب عزيزتي؟؟



نسمع عن الحب انه احلى ما في الوجود و نسمع انه الحب اطهر علاقة بين اي اثنين..



طيب سالتي نفسج يا عزيزتي اي حب؟؟



هل الحب المقصود انه طاهر و احلى ما في الوجود علاقتج مع اي شاب بشكل سري و محد يعرف عنه؟؟



او علاقة الزوج بزوجته الي كل الناس يدرون عنهم..



عارفين انه الناس تفهم غلط و تمشي على هواها..



و دام انج جاوبتي على الاسئلة بشكل صحيح راح تعرفين اي حب مقصود به الطهر و العفاف..



تحبين واحد و علاقتج فيه سرية و انتي عارفة انه هالشي حــــــــــرام لأنهم لو تركوج في خلوة مع هذا الشخص ما راح يكون لكم اي حق انكم تمارسون الحب مع بعض لأنه الي بينكم مو شــــــــــرعـــــــــي..!!



نفرض انج تحبين واحد ، و انتي عارفة انه هالحب حرام بغض النظر عن الشخص الذي يشوف بنت و تعجبه و يكن لها ف قلبه كل الحب و من بعدها يروح و يخطبها اذا بالفعل يحبها مب علاقة و خرابط..


و انتي عارفة مجتمعاتنا العربية و الخليجية بالتحديد كيف نظرتها؟؟



كيف بالبنت الي تدخل الشات و تتعرف على شباب و تكلمهم و تقول لهذا احبك و تاخذ رقمه و من بعدها تتعرف على واحد غيره و تكلمه؟؟



هاذي بالله عليكم ش تسمونها؟؟



(( خيـــــــــــــــــــــــــــانــة ؟؟ ))



أو



(( لعـــــــــــــــــــــــــــــــــب ))



او



(( تتحـــــــــــــــديــن اللــــــــــــه ؟؟ !! ))



خطاج تعرفينه و اذا تكابرين كابري جدام الناس بس جدام ربج لا تكابرين باجر شنو راح تسوين؟؟



اذا سالج ربج و قالج علاقاتج المشروعة لين ما نهيتيها و انتي عارفة انها مو في صالح و انتي تعصيني؟؟



تدرين شو تقولين لرب العالمين ؟؟



انا راح اقولج ؟؟



(( حطي ايدج على خصرج و خزيه بنظرة و قوليله والله يا رب العالمين انا ما عاندتك بس انا حبيته و عجبني ))



ههههه لا حول ولا قوة الا بالله العلي العظيم..



يمكن ما عجبتج العبارة الي نصحتج تقولينها لرب العالمين..



بس تاكدي انج لما تحبين شخص و علاقتكم مو مشروعة كأنج تمـــــــــامـــا اطبقين الي انا قلته اقصد العبارة ...!!



اسالي نفسج عزيزتي؟؟



قولي في خاطرج .. ، ..



(( هل انا اهلي ربوني على اني اتنقل من شاب لشاب او من الاساس اكلم شباب؟؟ ))



شنو ما كان جوابج ما يهم..



بس دامج من هالنوع انا اطلبج طلبة..



و لو صعبة عليج بس حاولي ترا كل شي بالمحاولة يصير..



روحي لأمج و طالعيها ف عيونها فترة طويلة..



قوليلي بشنو تحسين؟؟



خزي؟؟

خجل من اللي تسوينه؟؟

عار على روحج؟؟

انسانة فاشلة؟؟



مابي جوابج و يمكن ما راح تقدرين تسوين هذا الشي و السبب :



انج بالفعل حاسة بكل هالامور و اكثر منها..



حاسة بالخزي من نفسج و اهلج و قبلهم من ربج لأنج الي تسوينه كبير حيل..



حاسة بالخزي و العار من نفسج و هذا الاحساس تاكدي انه راح يقودج للفشل عمليا و علميا..



فكري تماما أختي ..



و تاكدي انه علاقاتج هاذي كلها مالها اي معنى..



تتسلين على حساب عناد ربج؟؟



غلطانة أختي..



اتركي كل علاقاتج و ارتاحي..



و سهر الليالي و كلام الحب اتركيه لزوجج..



تاكدي انه باجر يوم الحساب الله ما راح يسالج و يقولج ليش خنتي ؟؟



ليش غدرتي؟؟



ليش جذبتي؟؟



كل هالامور مو مهمة بس الاهم انج :



سويتي شي يهز عرش ربج؟؟



انتي من اذل المخلوقات و اصغرها نسبة لرب العالمين كيف تهزين عرش الرحمن بعلاقة غير مشروعة؟؟



راح تقولين حبيته و عجبني و ماقدر اعيش من دونه؟؟



انا راح اقولج لا تجذبين على روحج...!!



كيف ما تقدرين تعيشين من دونه و انتي انولدتي بلياه؟؟



كلام الحب الفارغ هذا اتركيه عنج؟؟



بس اذا ظامنة انج تعيشين اللحظات الجاية و عارفة متى راح يكون موتج و ودج تعاندين الله استمري ف معصيتج؟؟



و تذكري أختي لا يهمج اي انسان ولا قلبه..



لا تهتمين حيل للموضوع هذا..



المهم ترضين ربج قبل اي شي و ترضين نفسج و ترضين اهلج على شان تمشي كل امورج و تكونين مرتاحة انه اذا صادفج الموت بأي مكان تكونين طاهرة من الحب و الخرابيط..



تخلصي من ذنوبج بأسرع وقت و انسي كلمة (( ماقدر هذا قلب انسان ))

قولي في نفسج :



(( ويــــــــــــــــــــن كنـــــــــــــت و ويــــــــــن وصلــــــــــــــت؟؟ ))



راح تعرفين شنو اقصد انا...!!



اتمنى هالرسالة ما تكون لج مثال على (( لا حياة لمن تنادي ))..<<!!



خليها تكون لج كنقطة تحول و طز في اي انسان و انسي عبارة (( هذا قلب انسان ما اقدر اتركه ))..



تكذبين على نفسج ب هالعبارة ترا<<<<حاسبة نفسج كازانوفا من اسوأ السيئين<<..!!



ما راح اترجى و اطلب بس شوفي انتي في شنو تمرين..



تعب ، فشل ف العلم و العمل ، تفكير طول الوقت ، ما تنامين بالليل ، تصيحين ، و غيره مليون شي و شي تسوينه..!!



مصخـــــــــــــــــــــــــــــــــــــــــــــرة انتي يا صاحبة كل هالامور..؟؟!!



اذا نحن البشر نقول عنج هذا الكلام..!!



ما بالج ب اللي خلقج و حاب يشوف انج انتي بالفعل عبد من عباده..!!



اتركي اللعب و عيشي الحب على اصوله بعد الزواج..



هذا الحب الطاهر و العفيف و الي الكل يكون راضي عنه لأنه شرعي..



كلام الحب و اللعب ما ينفعج الحين..



لأنج مثل الجوهرة اذا شمخوها بشكل رهف و بسيط الكل يعوفها و ما يبيها..



انتي هاذي حالتج تماما..



لو تركتي هالمصخرة كلها راح ترجعين الجوهرة النظيفة اللي الكل يتمنى انه ياخذها و تكون ملك له..



ولا تنسين الحديث القدسي الي يذكرنا بأن الله سبحانه و تعالى خلقنا ف بطون امهاتنا و اكلنا و سقانا و بفضله طلعنا على هاذي الدنيا بكل صحة و عافية نقوم الحينه و نعصيه؟؟



لا حول ولا قوة الا بالله العلي العظيم..



ما راح تموتين بدون حب..



بالعكس راح تعيشين حياة افضل من دون خوف و قلق و توتر..



انتي عارفة في قرارة نفسج انج اكبر الغلطانين و اذا حابة تعاندين الله و ترفعين نفسج عليه استمري..!!!



الامر المخجل صج انج تشوفين نفسج محترمة و انتي ابعد من البعد نفسه عن الاحترام..



في ظنج و تقديرج شنو الاحترام؟؟



الاحترام لما تتكلمين بصوت منخفض او باسلوب راقي؟؟



لا عزيزتي ::



الاحترام انج تكونين محترمة بأفعالج و اقوالج و محترمة مع ربج قبل ما تلتزمين ب الاحترام مع اي شخص ثاني..



ما يحتاج اني اطول ب هالموضوع ابدا..



بس تاكدي مليار بالمئة انج راجعة لرب العالمين و الموت راح تموتينه ف الهروب من الواقع ابدا ماله داعي و التوبة لا محال منها..



(( قل يا عبادي الذين اسرفوا على انفسهم لا تقنطو من رحمة الله ))..



صدق الله العظيم..

[(( الفراء ))]

السلام عليكم ورحمة الله وبركاته


حييت ياشهم

مقالة راقية ومقنعة


نسأل الرحمن تعالى أن يحفظ الشباب والفتيات


شكري وتقديري وتحياتي

[alkhuzama]

قل يا عبادي الذين اسرفوا على انفسهم لا تقنطو من رحمة الله صدق الله العظيم

يا أخي هذي نصيحه ولا رسالة تفريغ ؟؟؟؟

وبعدين كيف تتجرأ على الله بفرضيات غير مقبوله مهما كان الهدف .. الغايه لا تبرر الوسيله ...

موضوعك واضح ما في داعي كثرة القيل والقال يقولج ربج وتقولين ربج.... هذا لا يجوز الخطبه اللي هي خطبه في امور الدين وللعامه تتم باختيار العبارات الدقيقه والاسلوب الصحيح
وبعدين ليش حصرت رسالتك للبنات ليه ما تكون للجميع اولاد وبنات ....؟؟؟
الله يهدي شباب المسلمين والمسلمات لما يحبه ويرضاه ويحفظهم من الفتن ما ظهر منها وما بطن
لك شكري وتحيتي

[صوت القلوب]

السلام عليكم ورحمة الله وبركاته

أخي الكريم ..

فيه تصاوير لا يحق لنا الخوض بها ..!

هذه نصيحة .. لا نخوض في كل الأمور ..!

تأكد أن من يُخطيء يعلم على الأقل بينه وبين نفسه أنه (مخطيء) ..


الزبدة :

المرأة عندما تُمدح يُقال عنها (أشهد إنها من ظهر رجال)

وعندما تُذَّم يُقال عنها (ما وراها رياجيل)

لم نُخلق رجالًا ونساءً للتكاثر فقط ..!

وإلا كنا كالحيوانات (مكرم القاريء) ..!

أخي (سندي \ عضيدي \ حمايتي من بعد الرب عز وجل)

أبوي ( تاج راسي \ عزوتي \ صديقي)

زوجي-بعد 20 سنة- ( أخوي \ أبوي \ ظلي اللي أحتمي به )

توقع لو كل رجال من هذول أدى دوره يكون (الوضع كذا) ..!

بقول لك سالفة :

طبعًا الغالبية العظمى من الشباب يمرون بتجارب (خربوطية)

الشاهد إن أحد رجالات العايلة كان يعاني من هذه المشكلة

فـ كان محيطًا بإحدى أخواته وكان (مدلعها) ..!

فـ مرة قال لها : تدرين ليش كل ما طلبتي شي ألبيه ..؟

قالت : ليش ..؟

قال لها : لأن أغلب البنات (اللي يخربطون) مو لاقين اهتمام ولا رعاية ولا حتى أحد ملقي لهم بال ..



لا أبرر أبدًا

فـ الخطأ خطأ لا يهم من يفعله ولكن ألا يُفعل من كلا الجنسين ..!

عندما تخوض في أعراض الناس قولًا أو فعلًا فـ كن متأهبًا لأن يُخاض في عرضك

كتبت شعارات ناديت بعبارات أكثرت من الدعوات ..!

ما يفرق ..!

ولكن واجبكَ كـ رجل أن تُحيط (شوفاتك) بعنايتك ..!

تتوكل على رب العباد ولا تتواكل ..!

بعد التوكل على رب العباد تبذل الأسباب بالتقرب من شوفاتك ..!

يعني :

ترك معصية الله

التوكل على الله

بذل الأسباب لـ يعينك الله

أخوي :

أول ما بدأ أخوتي بقيادة السيارة كان إبي شارط عليهم ما يروحون مكان إلا وأنا معهم

عشان ما يقحصون

وأنا عالريحة ما أصدق ..!

المهم كنا لا جاتنا (الفصلة) ودوني لو (للممشى)

وتعال شوف وجهي أتشقق كني مسافرة مو رايحة الممشى وبنفس المنطقة

شعور مختلف لما تتقرب من خواتك وتحسسهم دايم إنك حولهم ..!


أغلب شبابنا يعد شوفاته عار لو هم متغطين من فوق لي تحت ..!

امشي قدامي وروحي هذاك المحل وإلا خلش وراي وبعيد ..!

ليه عسى ما شر ..! مفاصيخ ..؟؟؟؟

الحمد لله إخواني مو كذا ولا أبوي .!

بس هذا اللي أشوفه في الأماكن العامة ..!

أخي :

قبل رأس أختك صغيرةً كانت أو كبيرة وامسكها من إيدها وقول تجهزي بوديش لو الممشى ..!

ترى سهالات ما من ضرر ..!

مر مطعم إخذ شي سفري وسولف معها سوالف عادية ..!

شوف وجهها شلون بيتغير ..؟!

سعادة لا توصف شي منك أنت كأخ غير عن اللي يجيها من زوجها لو كانت متزوجة ..!

والله لو كل رجل كسر الحواجز بينه وبين (بناته) ورحمهم .. كان يقل الـ (فسق) المنتشر


لستُ أضع اللوم على الرجال ..!

فـهناك نساء يبحثن عن هذا الأمر (لأنهن ناقصات) ..!

والأمر -الهداية- يعود لـ نفس الشخص إمرأة أو رجل وهو المكتوب له ..!

ولكن إحاطتك بنسائك وحنانك عليهن تُذكرهن دائمًا بأنك (لا تستحق أن تفعل بك مثل هذا) ..!


أتمنى أن تكون وصلت الفكرة

تقبل مروري

[نوال]

بسم الله الرحمن الرحيم ...

السلام عليكم ورحمة الله وبركاته ...

أخوي الله يعطيك العافيه ..

أنت حطيت على البنت حط والبنت أنسانه مو معصومه عن الخطاء تحتاج من ياخذ ويعطي

معها البنت اذا لقت من يوقف معها مستحيل تخون اهلها وجماعتها علشان شئ يغضب الله

ثم اهلها..