السلام عليكم ورحمة الله وبركاتة
قصائد مختارة , للشاعر / ماجد المهنا
..
.
.
( أذبح )
تباشري بي يالهنوف الترفه = لبى حًور عينك ولبى طرفه
وفلي جديلك كل ما شفتيني = خليني ألمح ذنبكم واقترفه
شديت لك من ( العيون ) ركابي = ماجيت لك جاهل قليل معرفه
( ابن مهنا ) لو جفته أيامه = ما ضيّع سلومه وخلا عرفه
عقب اسمعيني وابحري في قافي = قافٍ يعجز الصيرفي عن صرفه
عسرٍ على غيري وسهل اصوغه = كلن بمغرافه يكيّل غرفه
واللي رفع قدري , وعلا قدرك = نفسيتي من الجفا منقرفه
هيا اقربي ثم اقلطي في جوفي = وردي علي انفاسك المنحرفه
صديت عنّك والظروف اقصتني = لا بد يعذر شاعرك يا ظرفه
ابعترف شختي مابين ضلوعي = وعروق جسمي كلها معترفه
ولو اني اخبيّ عليك سدودي = ما كان يشبهني .. لبيد وطرفه
سكنتي براسي وخليتي لك = فالذاكره علم , وكتاب , وحرفه
رمشك طلايع جيش قد غرر به = وأنا دريك جنوده المحترفه
أذبح فدتك الروح يا ناقلها = على كفوف الموت قبل اعرفه
حبك مثل سيلٍ نحى من وادي = أقتادني خيرة , وخذني جرفه
..
.
( خير )
وش جاك مني يا رفيقي خير ! = وش مزعجك يوم اتقفاني !؟
تكذب علي وخانك التعبير = ويضيع علمك واتبلاني !!
ولو ان منت بضايع التفكير = ما كان جاني منك ماجاني
لكن نقول ان ذا الامور تصير = والله يحرسني وياقاني
بدمح خطاك وبتناسى مير = راجع ملفاتك على شاني
أنا موهبه تستاهل التقدير = حتى من خصومي وعدواني
لأن الحكي عني بلا تبرير = كثّر علاقاتي وصدقاني
حكاويٍ تبنى على التشهير = أكرم وتكرم عنها اذاني
انشد حساسيدي كبير صغير = عن وقفتي في زوغ الاذهاني
عدوا لي العدة وجيت مغير = وتساقطوا واحد ورى الثاني
بنات الفكر فرّع , وراسي زير = يا كثر ماستغفرت واغواني
يدوي به الهاجوس لي يسير = في حانة افكاري وقيفاني
مدامه , أجزل ما كتب لا غير = وعشيقته , بلاغة لساني
ركز معي سياسة التشفير = ماهي بساليبي ولا اداني
ماداني الألحاح والتكرير = ومافيه داع اعيد شرطاني
سهله ولا ظني تبي تفسير = ( أنا أنا .. قدري وميزاني )
من بورة الايام قدني طير = كفخت لا بارت بجنحاني
..
.
( بريت الحال )
بريت الحال يا سمح المحيّا = عثر بي في دجا حبك جوادي
حفت رجلي على درب الجفيّا = ولا قدرت جهدي واجتهادي
بغيت القلب يدْله عنك , عيّا = وعلى ماظن او حسب اعتقادي
( لقد اسمعت لو ناديت حيّا = ولكن لا حياة لمن تنادي )
ثمان شهور وصلك ما تهيّا = وانا مالي مثل صبر المهادي
لو اني بـ اتحمّل واتريّا = ما شمّت بي تجاهلك المعادي
تعال ولا تسوي بي كذيّا = وحقق منيتي واقصى مرادي
هذا بيتك / ومدهالك هنيّا = تنق بكل عرق وكل وادي
حزامك / قلب تاخذه الحميّا = وزهابك / عقل وعيون وايادي
..
.
( قلعة الآمال )
هجوس شعري دوم فـ أسترسال = تمنع عيوني من لذيذ النوم
يطحن رحاها فكري الشغّال = لين المعاني تبلغ الحلقوم
مالي معَ بدع القصيد اشكال = من دينمو الافكار للبلعوم
دايم على ذا الوضع والموّال = للجزل في قضيّتي مرسوم
صوتي يبي له حنجره واحبال = من سلك فولاذ وذهب وكروم
اربْ ناصية الشعر تحتال = فرايدن من دري المنظوم
اصعب على النقّاد والحبّال = من ساعته في يومه المحتوم
كم واحدن حدّر عليّ ومال = وأقفى عليه من الزمان ثلوم
كفي شطير وصكتي سلال = واسمي قلق واطلالتي جاثوم
طبعي كذا ماجامل الجهّال = من دون عمري مالحقني لوم
فـ انا عدو الذلّ والانذال = وانا رفيق الكايد الشغموم
ذكري معَ الوافين طيّب فال = والله مجنبني عن المذموم
لو ان جيبي مايضمّ ريال = ماجيت مستعطي ولا محروم
عليّ سرابيل الغنا سربال = ورثتها من (زايد الملطوم)
وإلى قصرني شيء بأية حال = ماكامل الا الواحد القيوم
للصبر في عيني شُعب واشكال = واجلّها صبري على المقسوم
ماكل شيءٍ فالضمير يقال = بعض الامور تشيّب المفطوم
خج الضلوع الطاري القتّال = خلا تحت عيني أثر ووسوم
ما وقّفتْ رجلي على الأطلال = حتى عصاني قلبي المكلوم
من كثر مادمعي يشبْ وسال = ماعاد عندي ثوب فيه اكموم
خلقت اجاهد راحل ونزّال = من وين ماوجهه لقيت هموم
أحسّ بالتهميش والأهمال = ماكن لي ديرة وربعي قوم
قد لي سبوعين وثلاث ليال = كل يوم وانا اقول هذا اليوم
بآسج وابني قلعة الآمال = واعيّن اطيور الضياع تحوم
لا حول صدق ومطولك يا بال = وَ حوم كبدي من سنيني حوم
واعدت لي عشرة وانا جمّال = مافيهم اللي زبن المضيوم
مافيه داع اشمّت العذال = واذيع سري واظهر المكتوم
لابد ياتي للفرج مدخال = واذوق من رحيقه المختوم
خوي السعه والقيل والجوّال = يقفي ماني في خوته ملزوم
وش خانته لا صك جالٍ جال ؟ = دام التفاهم بيننا معدوم
إلى دعيته جاري الأرسال = وأنا رهين الواقع المشؤوم
عجزنا نحايل حظنا البطّال = نبكي على ماضيينا المردوم
إلى اغتنت مدينة العمّال = راحت على راع العزوم عزوم
غدا الرئيس بكفة الحمّال = من يلتفت في سورها المهدوم ؟
يا رب أجرنا حزة الاهوال = جار الزمن وتغيّر المفهوم
تتعاقب الأحداث والاجيال = كنّا بذاكرة الليال حلوم
الناس تفنا , والقبور تهال = والوقت يمضي , والسنين تشوم
..
.
( عذاري )
الصدر زنزانة وخفّاقي اسير = والفكر عيّن للسان استشاري
والشعر ساحة حرب والشاعر مْغير = والقاف ذود وتحتميه الشباري
ولا يحصل حصته وافيه غير : = ( شوق العذارى لا بسات الخزاري )
وراسي معزب والطواري مسايير = يا مرحبا لبيه يا اغلى الطواري
تلفي علي وافز واصيح واشير = على كرامتها واقلّط فقاري
واشب ضو القاف وتشع وتنير = وتبحص معانيّه بجوف الغواري
وازلّها وسط الدلال المباهير = وامد فنجال الجزال الهراري
مثايلٍ فيها اعجاز وتصاوير = وأنا اتنقاها بحسّب اختياري
مثل الرفيق اللي يدوّر لي الخير = ويشدني عن هزعتي وانحداري
وادوّر لبعض السوالف معاذير = واحط لي منهج واحدد مساري
واحرص على نسل الرجال المناعير = اللي يماريبي وانا فيه اماري
(( فقير )) يحفظ لي وقاري ولا (( أمير )) = يحط من قدري ويضيع وقاري
ابيه لا دارت علي الدواوير = يكون لي عزوة وجبر انكساري
(( خوة شرف )) ماهيب (( خوة دنانير )) = وان غبت ما يرضى علي الهذاري
يا ملّ عينٍ تحبس الدمع ويحير = ويحدها عن الدموع اعتباري
كن في حشاي من الغبينه دوافير = وتحوفني في كل ساعه عزاري
إلى ذكرت الحظ .. فالثلث الأخير = وحبٍ عجزت اقدم إْلِه اعتذاري
تعبت من طول السهر والمشاوير = من جورها حطت بعيني مواري
وازريت للقى للمواجع تفاسير = وعانيت من كبت الحزن والعباري
وسيلٍ من النكبات مامنّه مْجير = لا صرت اداري والزمن ما يداري
ان جيت والأقدار وضح ومغاتير = هدّف مجاهيمه هزال وعواري
لكنّ ابسألكم احد شاف لي طير ؟ = خلا ضلوعي واخلِفتْه الحباري
اومي بملواحي وانا مشتحن .. مير = غدا وقفّت به هبوب الذواري
واصبحت مالي قلب يَروى من البير = من يوم ما شحّت بماها عذاري
..
.
( بصرك )
ياللي رفضت تحب واغليك وآحصرك = بعد الغياب المرّ بالله وش جابك ؟
وشلون ما كفاك جرحي واقنَعك نصرك = ماهوب حدك لو ان ماني من اقرابك
شيدت في جوفي مدينه , عان ذا قصرك = لكنّ اجي لك ضيف وتقفّل ابوابك
لا يا بري حالي من اياامك وعصرك = ويا شين فعلك معيّ وقل ترحابك
ظلمت مفهوم المحبه ظلمك لخصرك = يا ويل قلبي اشوف الموت بـ أهدابك
امن اولٍ يا طول وجهي وانت يا قصرك = معَ سلوم العِشق ماتجملت فـ أحبابك
كنت الغرام الكُلّ , ما كنت مقتصرك = تخطي عليّ واجيك واتحمل احرابك
واليوم قبل انتهي مجبور واختصرك = بقول لك شيء قبل اسكّر اكتابك
تبي تروح او تجيني عادي , وبصرك = ما عاد يفرق معي وصلك ولا غيابك
..
.
( ذهاب بلا رجوع )
أووف .. يا كبدٍ من الفرقا تلوع = ولّ .. يادمعٍ طغت همايله
كيف شمت وشنت ياذرب الطبوع ! = وكيف قلبي طاح وانت اتخايله ؟
بكره ابآكملّ معَ جرحك اسبوع = وآآه من جرحك ومن عمايله
كان السفر ما علّمك قدر الربوع = والا المدينه / والهوى < وبكاي له
كفّ عن هل العباري والدموع = ورد لي قلبٍ عجزت احايله
أنا لحقني من دهر لاماك جوع = سيلك ضميت ووقّفت مسايله
أن غبت عني كره والا غبت طوع = بقولّك شيءٍ ضميري شايله
العشق ماله في عيوني غير نوع = لو قسّموه وعددوا وسايله
ماعرف ألا انه ذهاب بلا رجوع = كم جرّع العشاق من هوايله
وادي مايسّكِنْه المغفل والجزوع = ولا اتعس امن شيوخه وقبايله
لو انّ دونك موت وسيوف ودروع = يطري علي ان (كل كربه زايله)
بآجيك ودروب المحبه ماتروع = مغامرٍ ماعددت جمايله
نذر وعلي رفقه وربي يا قطوع = ان كل بيتٍ من صميمي قايله
أمس .. بكْيِّت الرسايل والشموع = واليوم .. قافي ذكْيِّت مثايله
قسمتني من الجفا خمسة فروع = وكلبوها للمتاعب آيله
أبطيت وادميت المشاعر والضلوع = وريتني نجوم الضحى والقايله
..
.
( ماكو فكه )
يا بخت (باريس) وسعد (موناكو) = من عام واحزان (الخبر) تتصاعد
صدفةٍ جتني معك في (ساكو) = من دون سبق انذار والا مواعد
شفتك وصلفات الهموم تراكو = وقامت فرايص شاعرك تتراعد
جيتك أدوّر عطف قلتي : ماكو ! = وصدمت في وجه الزمان الجاعد
يا جادلٍ به من قسا (هولاكو) = وأضجّ من صوت الهزيم الراعد
شمّت عذالي علي وتحاكو = أنا أقرّب لك .. وأنت تباعد !
عقلي وخفاقي سببك اتشاكو = والعقل يبغاله خفوق يساعد
أنساك ! واعروقه عليك اتباكو !؟ = وأنت لك مده بصدري قاعد
مع فلسفة الأعماق مبدأ (داكو) = ماعاد تنفع فكري المتقاعد
ماكو فكه منك يعني .. ماكو = الا اني ارسلك مسج وتواعد
..
.
( ما على الدنيا عتب )
يا (هولقنز) الفكر يا سذاجته = يكفي شغب وازعاج وإيذاء وصخب
الهرج موذي واكثروا هراجته = والدم واصل من طعونك للركب
الله واكبر يازمن ولاجته = تولجتهم سكة العشق الخصب
لو بير عطفك تنشرب هماجته = بآجيك واعيّنْه مدمور ونضب
يا بكرتي شاعرك ملّ ادواجته = متّر التوباد وصحراء النقب
مافيه فجٍ واقدمي ما ساجته = ماقمت احسّب للخساير والتعب
لكن يا ليل ابرقت زجاجته = لازانت اظروفي ولاطاح الحطب
مايذبح الرجال غير أن حاجته ! = بايدين ناكر عشره وراعي كذب
وااا قلبي اللي ينتظرها وماجته = وااا دمعي اللي جرّح استار الهدب
الحب مشلول .. وعلى دراجته = مكتوب نصاً (ما على الدنيا عتب) !!
..
.
( مارد الشعر )
مارد الشعر انتهك حرُماتي = فأتيت أكتبُ ليتني لم آتِ
قد كنت أكتبُ مابدا لي شعراً = والأن أصبح مهنتي وصفاتي
ملكتُ مرجان المحيطِ ودرّهِ = وتهشُ قطعان القصيد عصاتي
صارعتُ جني القصيد وقومهِ = حتى نجوتُ بفعلتي بحياتي
وذكرتُ محبوباً تمادى بالجفا = حتى بدا دمعي على وجناتي
ألــِ بعدك طعنات سيف مهندٍ = كيف النجاةَ يا غايتي ومناتي ؟
قد كُنتُ أضدُ من الرجال رجالاً = مالي أرى في مقلتيك وفاتي
فلم اذق طعم الكرى يا فاتنه = ولم يعد حالي يسرُ عداتي
غُزيتُ من ليلي وحزني والسهر = ما حيلتي حتى أرُد غزاتي
فــ كيف أنساكِ ويغمضُ لي جفن = وأنا أراكِ في جميع جهاتي !؟
..
.
.
كثرت حماقات الزمان فطالما = أخرستها بعظيم فعلي , لافمي
ستنقل الركبان أخباري لكم = وستعلمون لأي قومٍ أنتمي
جردت من نسب الأسودِ لأنني = أسد وطأ البيدا بهيكل آدمي
تحياتي
11-10-2009, 04:34 PM
قصائد مختارة .. للشاعر / ماجد المهنا
العرض العادي
