& وأشــرب الفنـجـال وأكــب البيـالـه=تـابـعٍ سلـمـي سـلـوم الأولـيـنـي &

[ابوحمد الشامري]

شاعر هذه الابيات المشهوره هو راشد بن حسن بن ذيب رحمة الله عليه:

وسبب قوله لهذه القصيدة:
هي انه يوم من الايام أشرت له عجوز ومعها حمار قالت وصلني يا الأجودي قدام شوي قال ابشيلك بس الحمار لا قالت له خلاص روح الله يستر عليك بيجي الذيب ويشيلني انشاء الله تقصد راشد العجمي .. قال لها يا خاله انا راشد الذيب .. اركبي وابشري بالخير.

وقال هذه القصيده :

.

قالها إبن الذيب من هاجـوس بالـه=كلـمـةٍ يلـعـب بـهـا والـبـال زيـنــي
قالـهـا يـومـه طـرالـه مــا طـرالــه=من هواجيسٍ تشيـب المرضعينـي
غرّنـي بعـض الرجـال بكـثـر مـالـه=مادرى إن الموت في حبل الوتيني
كيف ينفعني وبعـض النـاس خالـه=ما يدوم البيت كان السـاس طينـي
ماش ويـن اللـي عوايـده الشكالـه=مثل إبن ظافـر حمـد ليتـه يجينـي
الثـنـا والـجـود دايــم فــي خيـالـه=علّـمـه ظـافـر سـلـوم الطيّبـيـنـي
جــــوّد الـعـلـيـا ولـزّمـهــا عـيـالــه=وأدركـوا مـن علمتـه دنيـا وديـنـي
واهنـي مـن بـاع حظّـه وإشترالـه=سار في درب النبي وأخزا اللعيني
مـوقـفـه مــاكــل رجّــــالٍ يـنـالــه=ومـن بغـا ممشـاه يقعـد مرّتيـنـي
وكم ذبح من حايـلٍ مـن حـر مالـه=وعادتـه لطمـة خشـوم العايلينـي
حالفٍ ماخـذ علـى الطرقـي ريالـه=وبالثـلاث محـرّم إنـهـا مــا تجيـنـي
لا لقيت اللي علـى السكّـه لحالـه=يلتفت ويقـول : ويـن المستحينـي
أوقـف الموتـر حيـا وأبـغـا الجمـالـه=يـوم ولـد الـلاش وجهـه مـا يلينـي
والطمع فـي كـرّوة الرجلـي رذالـه=خصّ به وإن جـا مجـال الغانمينـي
والـردي فـي حالـةٍ ماهيـب حـالـه=يــا عويـنـه مــن كــلام الطيّبيـنـي
الولد وإن طـاب قالـوا : مـن خوالـه=بالـخـوال يـسـال قـبـل الوالديـنـي
وأركـبـه لعـيـون مــن زيــنٍ دلالــه=مـا تحاكـوا فـي قفـاه الرامسينـي
مـا بغـى غيـري وأنـا مابـغـا بـدالـه=قاعـدٍ لـي بالـرجـا مــدّة سنيـنـي
مــا قعـدنـا فالعـمـل نبـغـا الـرذالـه=نـاخـذ العلـيـا طـريــق الفايـزيـنـي
وأشــرب الفنـجـال وأكــب البيـالـه=تـابـعٍ سلـمـي سـلـوم الأولـيـنـي

ابوحمد الشامري

[الـزيـر سـالـم]

الولد وإن طاب قالوا : من خواله *** بالخوال يسـال قبـل الوالدينـي

وأركبه لعيون مـن زيـنٍ دلالـه *** ما تحاكوا في قفـاه الرامسينـي

ما بغى غيري وأنا مابغا بدالـه *** قاعدٍ لي بالرجـا مـدّة سنينـي

ما قعدنا فالعمـل نبغـا الرذالـه *** ناخذ العليـا طريـق الفايزينـي

وأشرب الفنجال وأكـب البيالـه *** تابـعٍ سلمـي سلـوم الأولينـي



صح لسانك ولسانه

قصيدة جزله


وإذا ما خانتني الذاكره .. ان راشد بن حسن بن ذيب فصل من وظيفته بسبب الركاب اللي يشلهم على سيارة الشركة .. بعد أن انذره مدير الشركة بعدم تحميل اي راكب على السيارة الخاصة بالشركة .. إلا انه رحمه الله استمر على عادته اللي هي الفزعة للطرقي ...

لا لقيت اللي على السكّه لحالـه *** يلتفت ويقول : وين المستحينـي

أوقف الموتر حيا وأبغا الجمالـه *** يوم ولد اللاش وجهه ما يلينـي


وعلى فكره .. ما ياخذ ولا ريال واحد على الطرقي .. كما كان يعتقد مديره !!

حالفٍ ماخذ على الطرقي ريالـه *** وبالثلاث محرّم إنها مـا تجينـي

ويقول ايضاً ..

والطمع في كرّوة الرجلي رذالـه *** خصّ به وإن جا مجال الغانميني


رحم الله راشد بن حسن بن ذيب ..


ولا هنت يالقرم

[راكان اليامي]

صح الله لسانك يابن شايقه ولسان الشاعر
ولاهي بغريبه على ابن الذيب
اخيك

[نبض المعاني]

وكم ذبح من حايلٍ من حر مالـهوعادته لطمة خشـوم العايلينـي
حالفٍ ماخذ على الطرقي ريالـهوبالثلاث محرّم إنها مـا تجينـي
لا لقيت اللي على السكّه لحالـهيلتفت ويقول : وين المستحينـي
أوقف الموتر حيا وأبغا الجمالـهيوم ولد اللاش وجهه ما يلينـي


الله يرحمه رحمة واسعه ,,,,والله ان الشيبان يتعالمون بعلمه الطيب عندنا الى يومك

مشكور يا ابو حمد على القصيده الجزله من شاعر اجودي

اخوك:ابن زابن

[اديب]

نسئل الله ونرجيه أن يرحمه ويسكنه فسيح جناته هو وأموات المسلمين..

الأخ العزيز ابوحمد الشامري يعطيك ألف عافيه وياليت أن يكون هناك

أهتمام أكثر بقصيد هذا الشاعر ومن مثله ويكون لهم قسم ومثبت في المنتدى

حتى يتسنى للجميع الأطلاع عليه وفي نفس الوقت تحفظ مثل هالقصائد من الضياع...

مع العلم بأن له الكثير والكثير من القصائد النادره...فهو عليه رحمة الله من فحول

الشعراء....ولا أعلم هل له ديوان شعري...أذا مافيه فكلنا أمل بأبنه محمد لعمل ديوانه

وتجميع قصائده فيه....


تحياتي طال عمرك

[ابوحمد الشامري]

مرحبا الف بالاخ العزيز ( الزير سالم ) اسعدني مرورك يا السنافي وتشرفت به ولاهنت على التعقيب الرائع يا القرم.

ابو حمد الشامري

[ابوحمد الشامري]

مرحبا الف بالاخ العزيز راكان اليامي اسعدني مرورك يا السنافي وتشرفت به ولا هنت طال عمرك.

ابو حمد الشامري

[محمد آل نصار]

السلام عليكم

( غرني بعض الرجال بكثر ماله= مادرى ان الموت في حبل الوتيني)
ـــــــــــ
مشاركه اكثر من رائعه .
تقبل تحياتي.






ابن فادر

[ابوحمد الشامري]

مرحبا الف بالاخ العزيز ابن زابن اسعدني مرورك يا السنافي وتشرفت به ولا هنت طال عمرك.

ابو حمد الشامري

[العماني]

لاهنت يا بوحمد على القصة والقصيدتين الرائعتين

تقبل تحياتي،،