الخطابة تمسيكم بالخير ياوجيه الخير - الصفحة 5

عبدالله بن عاتي · #41 18-07-2005, 02:04 AM

حياك اختي الخطابة .. وتمنياتي لك بالتوفيق وبعد:

بصراحة انا ابحث فعلا عن زوجة بس بشرط تكون عجمية وتقبل بالتعدد .. ومافي مانع تساعديني وحقوقك محفوظة ولتفاصيل اكثر حياك في الرسائل الخاصة.
.................................................. ...............................
أما بالنسبة للأسئلة فإجابتي عليها كالتالي :
**هل تقبل أن تتزوج عن طريق الخطابة ؟ هل من الممكن أن تلجأ يوماً للخاطبة لكي تبحث لك عن عروس ؟
نعم _
والسبب بسيط :
الخطابة منزلها مكان مثل اي مكان
قد يوجد فيه الطيب وغير الطيب ..الصادق وغير الصادق ..
وليس لها دور سوى ان تدل الشخص _ ومسؤلية البحث والتحري عن البنت واهلها ماهي مسؤليتها _ اعتقد هذي مسؤلية الزوج الخاطب وكذلك ينطبق على المخطوبة الزوجة ..والكل يتحمل مسؤلية نفسه.
وكثرة الخطابات في المدن نتيجة حتمية لمايسمى ب( القطاعة ) بين الجيران .فالجار قدلايعرف جاره وبالتالي قد يكون من اطيب الناس ولكن الجار لايعلم عن سمعته شيئا سوى مجرد ارؤيته صباحا ومساء دون تداخل عميق بين الأسر ..
وطبعا هذه نتيجة المدنية الزائفة في مجتمعاتنا..
بعكس البيئات البدوية نجد دور الخاطبة ينحسر نوعا ما بحكم قوة العلاقات والتداخل الأسري بين القبيلة او الهجرة او الحارة ...
...........................................
**ماهي الأسباب برأيك التي تدفع البعض للجوء إلى الخطابة ؟
السبب هو تخلي الاهل عن البحث لك عن زوجة _ وهذا غالبا في الزواج الثاني حمية مع الاولى طبعا.
وربما عدم ثقتك في ذوق الاهل ولذلك تبحث بمواصفات اكثر خصوصية عند الخطابة حيث ان الخطابات يتوافر لديهن مميزات لا توجد عند غيرهم من رؤية او صور او اتصال اوخلافه.
......................................
هل تحترم من تمتهن هذه المهنة ( الخاطبة ) ؟ إذا عرف عنها الدين و الإلتزام ؟
الخطابة إذا صدقت معك تعتبر امرأة تقدم خدمة جليلة فأنت قد تختار شريكة عمرك عن طريقها .. وبالتالي بغض النظر عن حقوقها المالية هي امرأة ذات فضل عليك اذا وفقت في اختيار زوجة مناسبة لذوقك ...وبالتالي الحكم على احترام او عدم احترام الخطابة هو حكم ذاتي وليس موضوعي فكل شخص يعكس مابداخله من شعور تجاه ماصادف منها .. فمن وفقه الله يمدحها ومن لم يوفقه الله يذمها .. مع أنها في كلا الحالين مجتهدة والمجتهد كما تعلمون له أجران .
تحياتي للجميع وارجو مايكون كلامي زعل احد .. هوفقط وجهة نظر شخصية .

قطر العز · #42 18-07-2005, 07:51 AM

أخوي عبدالله مشكور على الكلام الطيب الي قلته
معاك حق في الكلام الي قلته وهذا رأيك الشخصي بس إسمحلي أختلف معاك
على ان السؤال أو التحري عن البنت أو عن الولد مش من مسؤوليه الخطابه ..
لا ياخوي إلا هي مسؤوله عن جزء منه لازم تكون هي سائله عن الطرفين بالي تقدر عليه
والباقي على أهل المخطوبه والخاطب ..وبذلك تكون الخطابه وصلت جزء من المعلومات
عن الطرفين للموافقه المبدئيه وبعدين يجي دور الأهل.
يعطيك العافيه أخوي وأتمنى إن كلامي مايزعلك ..

كويتي · #43 18-07-2005, 09:55 AM

لووووول خوش ردود واحلى شي مال ابو رقم
والي احلى منه اختج الخطابه 2006 كووول

بنتظـار الجديد بسرعه

ابو ندا · #44 18-07-2005, 12:13 PM

اقتباس:

المشاركة الأصلية كتبت بواسطة سلطان

والله ماعاد تدري الصاحي من الخبل ... ولازم تسأل عن الخاطبه وسيرتها اكثر من زوجة المستقبل ...
ولا احب اعمم على الجميع لان فيه ناس منهم تدور الاجر في الاساس وهذي هي ركيزتهم في عملهم .. اما البعض منهم ان بغيت زوجه قالت ابشر وان قلت ابي صديقه قالت ادور لك وان بغيت احياء حفلة تنكريه ماهيب مقصره ابد
واجابة على السوال ماافكر اتزوج عن طريق خاطبه والله لا يحوجنا لهم .

انا مع الأخ : سلطان بي كل كلمه قالها

الخطابه · #45 18-07-2005, 01:48 PM

ياهلا مصلح
شلي حادك على النصرانية

لايبا أنا البنات اللى أخطبهم مسلمين بس
نصارى لا وألف لاااا

وعشان طلبك هذا

مابنخطب لك أبد

مرحبا عبدالله بن عاتي
مشكور على الرد
والله يوفقك ببنت حلال ترضى بالتعدد

قطر العز ، فيصل الحجرف ، كويتي ، هايف السفراني

مشكورين على المرورررر

أختكم
خطابة 2006

غـشـام · #46 18-07-2005, 01:54 PM

أجـــل البعـض جــاب العـيــد

هههههههه

الحمدلله ما جتني رســالة

شكراً للخطاااابة ولمن أكلوووا المقلب

بكل الود

هنااا

غـشـام

الخطابه · #47 18-07-2005, 01:59 PM

( .......... )

هلا والله

هلا والله اختي العزيزه الخطابه

الله يجزاك خير صرااحه مهنه عظيمه تجمعين بين راسين با الحلاال

والله انا ما اقدر ارسل صورتي خايف علي نفسي من العيوون

اجيك انا وشوفيني على الطبيعه

المهم تراني عزووبي وطلااب نصيب

في انتظاار ردك اختي الفاضله

-----------

( الرد )

ياهلا أخوي .......
الله لايهينك ، ماقلت لي شنو مواصفات سعيدة الحظ ..
ترى الموضوع جد ومايحتمل التأخير
.. تبيها موظفه ولاربة بيت
ترى ربة البيت تجي أغلا !!
وإنت بكيفك

ناطرة ردك ترى صندوق الرسايل مليان
بعدين يطوفك قطار الزواج

---------------------------

السلام عليكم ورحمة الله وبركاته

أنا أخت لكم متواجدة في المنتدى لا أرغب في التصريح عن إسمي فدخلت بهذا الإسم

أخي الكريم ، انا أشتغل خطابه
يعني لو حاب تخطب وتتزوج ، فأنا على استعداد لمساعدتك
فقط إرسل صورتك ومواصفات فتاة أحلامك ،
مع سيره ذاتيه مختصرة إن أمكن

في انتظار ردك

تكفا لاتعلم الإدارة على بعدين يقطعون عيشي

------

( أبو خالد )

اي ليه لا اصلا الزواج زين

بس ودي بوحده عندها فلوس وتبي الستر

ومايهم العمر ويفضل تكون كبيره حيل ومافيه مانع لو تكون تقط خيط وخيط يعني مخرفه

ويفضل لو انها تعاني من السكري والقلب او حتى الضغط

الوكاد الطلب الاساسي تتحمل جميع المصاريف ولا تنسى الرصيد اللي اصفاره واجد

اذا هالمواصفات متوفره ممكن ارسل الصوره لك

-------------

( الرد )

أيه طلبك هذا متوفــر
شوى وتتوكل على الله وتورث كل مالها وحلالها

ابعث الصورة لا تتأخر ، ترى الطلبات كثيرة

---------------

( أبو خالد )

الخطابه رجاءا انا كنت مفكر ان الرساله اللي ارسلتها جايه لي بروحي وانا واصله لي رسايل من اعضاء يتشكون منك

ورجاء عدم أرسال اي رساله الي اي عضو وهذا تنبية

-------------------------

( .......... )

هههههههه

الخطابه

شكرا

مخطوبه
وزواجي قريب

-----------------

( الرد )

خسارة والله ، مالله كاتب

-------------------------

( العجمي )

الخطابه حياك الله وسعداء بانضمامك لنا

وانتى حره باختيار الاسم اللذي تريدينه

لكن الخطابه بشكل علني في المنتدىغير مسموح به لان المنتدىغير مختص

ولم توضحي هلتخطبين لزواج المسيار او مايسمى بالعرفي؟

نريد ايضاحات اكثر

ولك كل الشكر

---------

( الرد )

مشكور أخوى
والله أنا أسعى لتزويج سعداء الحظ الزواج اللى الناس تعرفه ، المشهور لامسيار في السر
ولا العرفي أعوذ بالله ، هذا حرام

---------

( العجمي )

طيب هل من اثبات لصفتك هذه

حتى يطمئن

سواء لي انا او لاحد من الاخوان

---------

( الرد )

شلون اثبتها ؟؟

---------

( العجمي )

لا ادري بصراحه ولا ودي افرض ليك شى
انتى وطريقتك الخاصه

انتى عارفه النت ومشاكله وضعفاءالنفوس وانتحال الشخصيات ولا من رادع

------------------------------

( حبيبة أبوها )

وعليكم السلام والرحمه

حياج الله اختي معانا .. ومشكوره على رسالتج

بس انا مخطوبه على العموم يعطيج العافيه حبيبتي .

---------------

رد آخر لحبيبة أبوها

صباح الخير

السلام عليكم ورحمة الله وبركاته

صباح الخير ..

شلونج وشخبارج ؟؟

مبرووك عليج اللكزس

بشري شلون الشغل ماشي معاج ؟

الله يوفقج ان شاءالله .

خلينا نشوفج .. لا تقاطعين .

اختج .. حبيبة ابوها

----------------

( الرد )

السلام عليكم ورحمة الله وبركاته

أختي تقديرا لإهداءك اللكزس أقدم لك هذا العرض

أنا أخت لكم متواجدة في المنتدى لا أرغب في التصريح عن إسمي فدخلت بهذا الإسم

أختي الكريمه ، انا أشتغل خطابه
يعني لو حابه تتزوجين ، فأنا على استعداد لمساعدتك
فقط إرسلي صورتك ومواصفات فتى أحلامك ،
مع سيره ذاتيه مختصرة إن أمكن ، علما بأن هذه الأمور أمانة
يسألنا عنها الله يوم القيامه

في انتظار ردك

----------

(حبيبة أبوها )

وعليكم السلام ورحمة الله وبركاته

مشكوووره اختي على العرض

وانتي قدمتيه لي من قبل .. بس قلت لج انا

اني مخطوبه حاليا

--------------------------

( ........... )

ههههههه

أوكيه طال عمرس لاجيت ابخصب علمتس ..

بس البلا فوقي اثنين

-----------

( الرد )

كان الله في عونك
يمكن تفكر في المستقبل
لاحبيت تخطب علمنى ، مو تنسى
وإذا أحد من ربعك يبي يخطب ولاشى
دز لى سيرته الذاتية وعليها صورتين شمسيتين مقاس صورة الجواز
وياحبذا بدون شماغ
عشان نشوف يمكن صلعين ولاشى
عشان مانخدع البنات

الله يوفقك يارب

------------------------------

( كويتي )

يا مرحبـــا

اختي الكريـــمه حياج الله في شبكة العجمــان
واسعدنــي تواجدج ويــانه بس انا ما ابي اتزوج
مع ان عمري 28 بس مالــي نيه واذى نويــت ابشــري
راح اعطيج خبــر ..

كويــتي

-----------

( الرد )

ليه ماتبي تتزوج !!
الستر زين وانا أختك
فكر في الموضوع منت بخسران
وإذا قررت دز لى رساله
أوكي

سي يو

صحيح خطابه بس أتكلم لغاات

------------------------------

( السنافية )

عليكم السلام ورحمة الله وبركاته

هلا فيج ياالخطابه وحياج الله بمنتدى العجمان

نورتينااا

ماشاءالله خوووش شغله والله بس موكنه مكانها غلط بالنت

المهم انى تونى صغيره عالعرس لاحقه على عوار الراس مافكر نهائياا اتزوج اول ماقرر انى اعرس انتى اول وحده اقولهاا

--------------

( الرد )

طبعا أنت صاحبة القرار ، بس صدقيني ماتدرين عن المكتوب
يمكن نصيبج أحد اللي مسجلين عندي
والصغيرة تكبر ، الله يوفق الجميع
والنت أصبح جزء من حياتنا كلنا، المهم الفرصة بين يديك
والفرص لاتطرق الأبواب مرتين

------------

( السنافية )

مشاركة: السلام عليكم

مــــــــاأفكر بالعـــــــــــــرس ولاأبـــــــــــى اتـــــــــــــــزوج

-------------------------------------

( ذياب )

وعليكم السلام ورحمة الله وبركاته
صباح النور
حياش الله يا اخت خطابه
صراحه انا متزوج اربع ومكتفي والشرع لا يسمح بالزواج باكثر من اربع
يعني ماكو مجااال

اتغشمر

الصراحه يا اختي الفاضله
عاداتنا وتقاليدناا لا تسمح يالزواج عن طريق خطابه
وانا ما ني بمقتنع بالسالفه هذي
ليييه ما عندي ام اتخطبلي جعل ربي يخليهاا لي

------------

( الرد )

الله يخليلك أمك خيي ذياب
قلنا يمكن تبي تفيد وتستفيد
لاغيرت رايك علمنى

سى يو

----------

( ذياب )

الله يخليلش غاليش
وماضنيت او مستحيل اغير راي
واذا بغيت اغير رايي

وشكرااا

---------------------------

( على الجعيدي )

خلاص دزي لي صور البنات اللي عندج ونشوف يمكن تعجبني وحده وترى واحد من شيبان الجماعه يبي العرس وياليت تلقين له وحده فدعه لأن الشيبان يحبون المتينات يبون اللحم

---------

( الرد )

بنات الناس مو لعبه
دز مواصفات البنت اللى تبيها ، وصورتين شمسيتين حقك ، أحط وحده بالألبوم عندي
ابي أدخل موسوعه جينس في عدد اللى زوجيتهم
ووحدة نراويها البنت ، ياريت تتصور واقف ويمك مزهرية فيها ورد أحمر وبدون شماغ يمكن أصلع ولاشى

في انتظار سيرتك الذاتية ، عجل لايفوتك قطار الزواج
تراى مو ملحقة على الطلبات

باااى

----------------------

( العماني )

وعليكم السلام ورحمة الله وبركاته

ماقصرتي يالخطابه وانا ابشرك ألف بنت تمناني ولانيب بحاجة لخطابة ، روحي دوري لبوفيصل (العجمان) وابوخالد وجالس بن مبارك والربع المراقبين والمشرفين ترى حالتهم كسيفة

تقبلي تحياتي،،

----------

( الرد )

ياحليلهم
عيل ليش يقولون مانبي
خلاص رسالتك هي الدليل

----------------------------

في أمان الله

خطابة 2006

كويتيه · #48 18-07-2005, 02:24 PM

لووووووووول العماني شكله طب في الاداره عدل..
بس خوش ردوود..

تايه الغربه · #49 18-07-2005, 10:36 PM

ههههههههههههههههههههههههاي
اني ولد ابـــي وامـــــي الوعيلي صدق
(( ذيااب )) انت متزوج اربع << ذياب تراني زبطت الموضوع اللي انت خاابر

السنافيه ما الومش والله يوم تقولين ما ابي عـــــــرس

وين رسالتي يا الخاطبه ؟ عاادي طلعيها ما عندي مانع

مصلح · #50 19-07-2005, 03:58 AM

اقتباس:

المشاركة الأصلية كتبت بواسطة الخطابه

ياهلا مصلح
شلي حادك على النصرانية

لايبا أنا البنات اللى أخطبهم مسلمين بس
نصارى لا وألف لاااا

وعشان طلبك هذا

مابنخطب لك أبد

ليه ما تبين تخطبين لي؟ انا ابيها تسلم على ايدي انا افكر لبعيد الله يهداش بس.

بس صراحه وصراحه صراحه وبعد صراحه موضوع اقسم بالله روعه وانتي مبدعه يا اللي ورا الموضوع. خليتي في المنتدى حركه وضحك ووناسه ودقات وشوشره.

واحلى شي انش ما خليتي الروس الكبيره جالس بن مبارك وابو خالد وليت ابو عبدالله اللي قاعد يضحك عليهم معهم بعد.

يعطيش العافيه لاهنتي