طباشير..!

[فهيد بن سالم]

ما ذبح ( جرحي ) سوى طيحة ولد
.................طايحٍ , بـ أقصى حنايا ( عاشقين )

كل ما هانت ( جروحه ) .. إنجحد !
.................وكل ما طابت جراحه ( يستهين ) !

لين صيّح فـ ( البلاد ) .. وما وجد ؟
.................إلاّ ( جرحى ينطرون المسعفين ) !



.

[فهيد بن سالم]

البارحه عشت قول :- ( فراقنا خيره )
..............وعرفت , وشلون بُعدك يجمع إشتاتي !

العام لا أحترت جيتك تقتل الحيره .؟
..............والحين لاضقت تفرج لـيّ ( صلاواتي ) !

قرّبني البعد من ربّي , ومن ( خيره ) .!
..............وأبعدني عنّك وعن ( سكّة متاهاتي ) .!



.

[فهيد بن سالم]

بنيت ركني من ( غلاها ) طوب طوب
................يمكن ليا ( مرّت ) تشوف , وتعتبر !

تشوف كيف ( الحرف ) عيّا لايتوب .!
................أوراق نزفـه ( بوح ) .. وآهآته حبر .!

يـ الغايب الحاضر على جال ( الدروب )
................( صـدر الليالي ) ما بقى فيها ( صبر )

( لو يستحي ) وجه الخطايا والذنوب ؟
................نآحت ( الورقآ ) على غصن , وقبر !



.

[فهيد بن سالم]

يا ( موت ) أنا طالبك لا تثني الجيه
.............حتى يخف الجفاف اللي كسى قاعي

زولٍ خذيته بدون , وداع يا ( حيه ) !
.............ليته طراله قبل لا يرحل , ( وداعي ) !

يانفس ما أقولك كانك عقبهم حيه ؟
.............يا والله العيشه اللي ( مالها داعي ) .!



.

[فهيد بن سالم]

إذا طرالي زولك المترف أعاتبْك بـ ( سكوت ) !
..............لو ( السكوت ) أحيان ما يكفي , ولا ينفع أحـد !

وإذا طرالي ( صوتك ) المرهف أعايشك وأموت
..............مرّه على ( دفوة غلا ) مرّه على برد ( اللحد ) .!

ماهو قهر تمّرني ( طيفٍ ) وأغنّي دون صوت ؟
..............غير القهر إنّك جحَدت إنسان عمره ( ماجحّد ) !

[فهيد بن سالم]

كمّل جميلك معي فـ ( الحب ) ودروبه
................حسسني أنك تحب , وحبني ( أكثر ) !

مليت أعاتب هوى وأوضح ( عيوبه ) !
................مليت , أكون بدروبك شخص ( متعثر )

لو كنت ( محبوب ) حسّ بحب محبوبه
................كان ( الجفآ ) لا سمعته قلت لا يكثر !



.

[فهيد بن سالم]

( ذنبك ) عذر وذنوب الاحباب تنشاف
..............لا تعتذر .. ابعتذر لك ( واسامحك ) !

ماكنت اخاف من الخطا كثر ما خاف ؟
..............بعض الكلام اللي تشيله ( ملامحك ) !




.

[فهيد بن سالم]

لا تلمسين الجروح , ولا ( تخافيني ) ؟
.................العذر ( دمعه ) من عيون الخطا سالت !

ماقلت اشوفك على خير , وتشوفيني ؟
.................( احداث عمري ) قبل لا اقولها .. قالت !



.

[فهيد بن سالم]

تعلّم من المنطق إذا أسترسل بـ يحكي .!
...............لكن كيف تتعلم إذا المشكله .. ( ذاتك ) ؟

صريحٍ معك يا صاح ( لا تقفي , وتشكي )
...............بتزعل ؟ عسى تزعل لكن هذي ( سواتك )

من المضحك المبكي بأن تضحك , وتبكي
...............على شي مايسوا ( دموعك وضحكاتك ) !



.

[فهيد بن سالم]

يا ( عاذلي ) لا تناشبني , وتبلاني =العشق في خافقي قامت عفاريته

أحذر تعذرب ( غلاها ) , وأتحداني !=دامه تمثنى ضلوعي ثم بنى :- بيته

نصيحتلك مادام أن ( العمر فاني ) ؟=والرجل لا مات مايبقى سوا صيته !

اليا نويت أتعذلك ( واحدٍ ) .. ثاني ؟=تاكد ! أنه بليد أحساس لا ( جيته )

فديت ( صوتٍ ) ليا منه .. تفداني !=أحس أني ملكت الكون ( لوحيته )

فديتها لا لفت ( والشوق ) , ناداني=فديتها لا سرت ( والهم ) , ناديته .!

أحبها حب لو شافوه ( شيباني ) ؟=قالوا : أبيها متى يفتح ( دوانيته ) ؟

برايفت لـ الكل :- ركني مقزرينها لطش المنتديات الثانيه وأنا بايحهم لكن الأبيات هذي ما أبيح أحد فيها ..