~¤§ موسوعـة العجمــــان للمـطبـخ §¤~ - الصفحة 3

روووووعه · #1 07-04-2004, 05:04 AM

حلى الفول السوداني امممممم طعمه يجنن

المقادير :

بسكوت أولكر

3 ملاعق كبيره فول سوداني سائل (( ساده ))

3 حبات جبن كيري

كأس سكر صغير

نص كأس حليب سائل

قشطة

الطريقة:
تغمسين البسكوت بحليب وتصفينه بالصينيه بعدين تحطين الفول السوداني

والجبن والحليب والسكر والقشطه بالخلاط وتخلطيهم بس نصيحه لا تحطونها كلها

مع بعض حطو شوي شوي عشان ما تتعبكم بعدين صبيها فوق البسكوت

وحطيها بالثلاجه ..

بالعافيـــــــــــــــــــــــه,,,,

رووووووووعه,,,

بخـــــــــــوت · #2 07-04-2004, 06:27 AM

المبرقعه ...... امممممممم سليق الطيق المفضل عتدتسسس

بس هذا فقط للحلوويات<<<<<مديره اعمال روعه

عزوف · #3 07-04-2004, 08:02 AM

صب القفشه يا سياتل اهو حلـــــــو (( اكيد بيكون حلو )) اقصد انه تقريبا مثل اللقيمات بس اكبر واعرض شوي

انتظر الطريقه لاني وللاسف بالدوام ودفتري بالبيت

اطباقي القادمه

لقيمات عزوف بس روووعه واتحدى اللي تقول ما تضبط معها

الجبنيه وهي عبار عن لقيمات محشوه بالجبن بس روعه مثل الحلو الجاهز

وصب القفشه علشان مراقبنا العزيز سياتل

طبعا كل الاصناف اللي ذكرتها انا مجربتها شخصيا فوق الامية مره يعني مضمونه
انطروا على الظاهر بشيل هالدفتر معاي وين ماروح

الـــصـــعــــب · #4 07-04-2004, 08:18 AM

والله اني مااحب البنت اللى ماتعرف شىء عن امور الطبخ والحلويات وهالاشياء الحلوه

مشكورين يابنات كلكم وعساكم على القوه (متى تسووون الطبخه هذى كلها )

هاااااا ؟؟ هاهاهاها
انشالله الله يرزقني بوحده تعرف للطباخ كله (كبسات . حلويات . معجبنات . ألخ)

تحياتي لكم

مجنونها

سياتل · #5 07-04-2004, 08:48 AM

سليق سياتل

انا حاولت اسوي السليق بس كان المقصود عيش ابيض

المهم سويت مرقة دجاج و كنت ناوي اسوي عيش ابيض بس الظاهر زودت الماي شوي
الحل كان بسييط جدا ( والسالفه كانت خربانه و الحظر الي معي ما يعرفوون السليق )
ف زودت الماي و صبيت عليه كوب حليب. وطلع شي كنه سليق بس موب اكيد .
ابشركم عجب ربعي ( طبعا يا هذا الشي الي سميته سليق او تووست )
و تعشينا و عينا من الله خير لا تسمم و لا هم يحزنوون

اذا كان اللي سوته هو السليق فعزالله اني اللي اخترعه ارفل و اذا كان لا ف ياليت تقولونلي شنو.

تحياتي

عزوف · #6 07-04-2004, 09:51 AM

نبـــــــدأ وعلى بركة الله

الفتـــــــــــــــــــــه (1)

باذنجان يقطع مكعبات ويقلى بالزيت

بطاط يقطع مكعبات ويقلى بالزيت

خبز يقطع مربعات ويحمص ممكن بالزيت او بالفرن (( يوضع لفتره بسيطه بالفرن لحد ما يتغير لونه ويصير بنى فاتح ))

3 علب روب (( وممكن نقلل الكميه او نزيدها حسب كمية البطاط والباذنجان ))

ا لبنة كويتيه حامضه صغيره وممكن نستخدم أي لبنه ثانيه انا ساعات استخدم بينار

3 ملعقة مايونيز (يعني لكل علبة روب ملعقه مايونيز )

بقدونس حسب الرغبه

نخي ((حمص حب )) علبة وحده كافيه

الصلصله : قليل من الليمون لان اللبنه حامضه +رشة(يعني شويه ) بهارات عادي أي بهار لو المخلوط + ملح زيت زيتون وطبعا مقادير هالصلصه بالعين يعني حسب كمية اللبنه اللي عندج تقيسين الملح وغيره

الطريقه
طبعا بعد ما نقلي البطاط والباذنجان ونحمص الخبز كل واحد بروحه نجيب ماعون يكون غويط شوي !! هذي شلون اترجمها بس اعتقد مفهومه او بايركس بيضاوي المهم نخلط الباذنجان والبطاط والنخي والبقدونس مع بعض . ونخلط باقي المقادير بروح يعني الروب واللبنه المايونيز والصلصه بعدها نخط المقدار الاول مع المقدار الثاني ونحطهم بالبايركس او ماعون التقديم ونزينها بالخبز المحمص وشوي سماق وبقدونس وشوية زيت زيتون

طبعا حسب شطارتكم بالتزين الطبق راح يكون كأنه جاهز ومن مطعم وطعمه لذيذ بس تراها دسمه شوي ..... لكن روعه انا مجربتها فوق عشرتعش مره

========================

الفتـــــــــــــه (2)
هذي اخف من اللي قبلها

نجيب ماعون بايركس ونحط فيه الطبقات التاليه

1 نخي

2 باذنجان بالقشر مقطع مكعبات ومقلي

3 خبز مكعبات محمص

4 طبقة كثيفه من الخس

5 طبقه خفيفه من الكزبره الخضرا او البقدونس

6 الصلصه

مقادير الصلصه

2 قفشة مايونيز +4 قفاش ماي النخي +شوية من عصير الليمون + قليل من الملح +كمون +روب او 2 + وهذي سر من اختراعاتي (( خاص بعزوف )) اضافة 3 او 4 قفاش جبنة كرفت للصلصه

=======================

سلطة الشمندر

4 علب شمندر انا افضل العلالي او قودي طبعا مو دعايه لكن مجربتهم ناخذ ماي الشمندر راح نحتاجه بالصلصه المهم نقطع الشمندر بالطول اما العرض اقل من عرض الشيبس الجاهز بشوي (( خوش وصف مو ))

فلفل اخضر بارد يقطع بالطول وبشكل رفيع جدا الكميه حسب الرغبه بس نص حبة الفلفل كافيه بالنسبه لي

بصل شرايح ضعيفه جدا وهم بعد نص بصله كافي وياريت اقل طبعا ممكن تستغنون عنه لكن له نكه حلوه مع السلطه
جزر مبشور وحده كافي
طبعا شكل السلطه راح يكون اكثره شمندر وباقي المقادير راح تكون قليله جدا بس علشان الطعم

ذره حسب الرغبه
حب الرمان حسب الرغبه بس بصراحه روعه مع السلطة تصير كأنها من المطعم مو شغل بيت

الصلصه

كوب ونص او كوبين من ماي الشمندر + قفشه كبيره سكر + شوي ليمون نص ليمونه ممكن + قليل من زيت الزيتون ممكن قفشه وحده + ذرة ملح + واذا توفر قليل من دبس الرمان ((طبعا هذا من اختراعاتي ))

نخلط جميع المقادير ونحطها بماعون ونخلط الصلصة بره ونصبها عليها طبعا لازم نسويها قبل التقديم بفتره ممكن اذا تبونها عشا تسونها العصر وممكن قبل التقديم بدقايق لكن انا افضل ان السلطه تتم فتره علشان يبين فيها طعم الصلصه

======================

سلطة الخيار المخلل روعه

لهانه (( ملفوف ابيض )) مقطع شرايح طويله ورفيعه

لهانه (( ملفوف احمر)) مقطع شرايح طويله ورفيعه

خيار مخلل مقطع شرايح طويله

باذنجان بالقشر مقطع شرايح طويله ومقلي بروحه

شوية نعناع طري مفروم

تخلط جميع هالمقادير وتوضع مع بعض

الصلصه

لازم نسوي الصلصه قبل لا نحطها على المقادير السابقه بساعه يعني ممكن نسوي الخلطه ونحطها باي غرشه (( علبه )) فاضيه ونحطها بالثلاجه لمدة ساعه او اكثر بعدها نقدر نستخدمها

عصير ليمونتين + زيت زيتون نفس كمية عصير الليمون تقريبا + شوية ملح +شوية سكر ممكن نص قفشه وسط +شوية خل + 2 قفشه كبيره نعناع ناشف (يابس) + قفشه كمون صغيره +مسترده (الخردل ) واهو اساس طعم السلطه طبعا الكمية حسب الرغبه لكن انا اكثر منه 5 قفاش تقريبا او اكثر

بعد ما نخلى الصلصه لمدة ساعه في الثلاجه ممكن بعدها نخلطها مع المقادير السابقه

====================

سلطة الباذنجان

باذنجان بالقشر مقطع شرايح رفيعه بالطول مقلي
فلفل بارد مقطع شرايح رفيعه بالطول ممكن يكون الفلفل الوان ( اخضر اصفر برتقالي احمر يطلع شكلها روعه )

لهانه ( ملفوف ابيض ) نفس الشي مقطع بالطول شرايح رفيعه

خبز محمص مقطع بالطول شرايح رفيعه

يخلط جميع ما سبق وتوضع عليه الصلصه

الصلصه

ملح + فلفل اسود +زيت زيتون + خل +عصير ليمونه كبيره + فص ثوم او اقل

تخلط مقادير الصلصة مع بعض جيدا وتوضع على ماسبق

=======================

مقبلات

طبعا هالطبق ماله اسم !!!! لكنه غريب وحلو وسهل بنفس الوقت
نخي بدون الماي طبعا

باذنجان شرايح طوال مقلي بدون قشر

فلفل بارد اخضر شرايح طوال (( يقلى بقليل من الزيت لحد ما ينشف الزيت ونرش عليه شوية ماي لحد ما يذبل ))

بصل شرايح (( يقلى بقليل من الزيت لحد ما ينشف الزيت ونرش عليه شوية ماي لحد ما يذبل لحد مايصير لونه بني ))

طبعا المقادير السابقه نقلي كل شي بروحه مو مع بعض

نجيب ماعون بايركس ونحط فيه هالطبقات

1 نخي

2 باذنجان

3 البصل كله

4 باذنجان

5 الفلفل كله

6 الصلصه

طبعا الصلصه راح نجهزها على النار قبل ما نحطها بالبايركس

2 قفشة تشيلي كاتشب (( كاتشب حار ))+2 قفشة كتشب بارد +صبار ((يكون جاهز من قبل وطريقة تجهيزه سهله يتم نقع الصبار في ماء دافي ثم يشخل ويؤخذ مائه ويوضع على النار لحد ما يثخن ))

7 نرش بقدونس

يوضع بالفرن ونشغله من فوق بس لحد ما يتسخن ويقدم ساخن

====================

بالنسبه لي يكون الصبار جاهز في برطمان ومتى ما بغيته استخدمته في أي شي وهذي طريقتي الخاصه

الصبار"""""""""

الصبار = تمر هندي
يتم نقع الصبار ممكن كيسين او اثلاثه في ماء ساخن وبعدها يشخل ونكون حطينا جدر او مقلا فيه فص او 2 ثوم وشوية زيت نحمسه ونحط عليه شوية معجون طماط يحفظ في الثلاجه ويستخدم مع أي طبق ممكن يوضع فوق الجريش او يوضع كصلصه مع العيش يعني الارز

======================
شوربة دجاج بالذره

هذي الطريقة حصلت عليها بطلوع الروح وطعم هالشوربة يطلع بالضبط نفس طعم شوربة مطعم قيصر

مسحب دجاج ناخذ منه الكميه المرغوبه ممكن ناخذ بحجم كف الايد عاد كلن وايده

علبة ذرة

ملعقة زيت

3 او اربع اكواب من مرقة الدجاج وهذي بعدين نتفاهم عليها

نص قفشة صغيره ملح
نص قفشة صغيره سكر
نص قفشه صغيره جينو موتو (( وهذا ملح صيني )) موجود ببهارات مجدي متوفر بالجمعيات مو شرط مجدي أي بهارات وممكن نستغني عنه بس انا انصح فيه
للامانه انا احط قفشه كبيره علشان يطعم فيها اكثر لكن جذي تكون لاباس وكلن وذوقه
بيضه مخفوقه

2 قفشة نشا مذابه بقلاص ماي

الطريقه
وهي سهله جدا جدا
نفوح الدجاج بعد غسله بماي ساخن مع شوية بهارات حب من غير ملح طبعااااا

بعد ما ينضج ناخذ الدجاج ونسحبه بيصير كأنه خيوط

نضع القدر على النار ونحط فيه الزيت وبعده الماي والدجاج والذره وباقي المقادير كلها مره وحده ماعدا النشا والبيضه

بعد ما تسخن نضيف لها قلاص الماي اللي مذوبين فيه النشا ونقلبه جيدا لحد ما يثخن (( طبعا الشوربه بتكون شوي ثقيله مو سايله ولا صاكه مره وحده بعد ما تثخن نقط البيضه المخفوقه بالوسط ونقلبها بسرعه علشان ما تستوي البيضه وتصير قطع كبيره من تكسرينها قلبيها على طول ))

وتقدم على طول
نصيحه اذا كنتي تبين تقديمنها في وقت اخر لا تخلينها على النار مده طويله علشان ما تصك ولما تبين تسخنينها مره ثانيه راح تصير ثقيله حيل اتمنــــــــــى من الجميع المشاركه

الأدوح · #7 07-04-2004, 10:15 AM

monamora · #8 07-04-2004, 12:51 PM

السلام عليكم .. قوه يابنياتي الحلوات شلونكم .. وشخباركم عساكم بعافيه .. ايي يابنات اليوم بنسوي مرقة الشبزي .. شحلاتها وشحلات ريحتها الخنينة .. طريقتها سهله وبسيطه مايبلها اي تعقيد بس فتحوا مخوخكم ال... و راح تفهمون كل شي وتستوعبون .. ادري المخ مييييييح لكن شسوي امري لله .. طريقة مرقة الشبزي نفس مرقة اللحم بالضبط مع بعض التغيريات وبعض الاضافات .. ويالله خلونا نبدي

بسم الله بدينا وعلى النبي صلينا .. نحتاج حق طبختنا .. 7 شدات كزبر .. 5 شبنت .. 5 كرفس .. 5 سلق .. شدتين بقل .. 3 بقدونس .. نص كيلو لحم مقطع .. 5 فصوص ثوم .. 3 بصلات ولميات .. حبتين طماط .. وطبعا بهار وملح

اول شي نفرم الخضره كلها ونخلطها مع بعض ونخليها على كتر .. وبعدين نقص البصل والطماط وندق الثوم .. وقبل كل هذا نكون غاسلين اللحم زين مفهوووووووووم مغسوووووول عدل .. الحين نبدي طبختنا

ناخذ جدر ونحط فيه شوية دهن وفوقه البصل والطماط والبهار .. ونحمسهم وبعدين نحط الثوم وفوقه اللحم .. ونخلي اللحم يتعرق بالجدر يعني ينز الماي اللي فيه وبعدها بشوي نحط نص كمية الخضار ونحمسهم مع بعض .. وبعدين نحط ماي فوق اللحم ونخليه يطبخ .. وهني عاد على حسب نوع اللحم اذا كان طلي صغير ماياخذ وقت واذا كان خروف هرم راح يطول شوي .. يعني انتوا شوفوا اللحم شلون يصير وقبل لا يستوي اللحم عدل .. نحط باجي الخضره ونخلي الجدر يقلب على نار هاديه .. وسلامتكم وعليكم بالعافيه

طبعا لاتنسون تحطون لومي سحاري تخرمونه وتقطونه بالجدر .. وتقدرون تحطون شوية معجون طماط ..وفي ناس تحب تحط لوبه مع الشبزي هم حلوه بس اللوبه لازم تنقع ساعتين عشان تنضي بسرعه .. وهم تقدرون تحطون بطاط . يعني على هواكم .. وبالنسبه للملح لاتكثرون منه مع البهار لان الخضره فيها املاح يعني حطوا شوية وشوفوا اذا تحتاج المرقه اكثر زيدوا

طبعا اكلتنا هذي تسونها مع مشخول ولا تنسون الفرقاعه .. والمعبووج تكثرون منه والخضره بعد المخيسات وربعها

هذي طريقة مبسطه عن الشبزي واللي امها تقول شي او تتحلطم ياويلها من امكم العوده وخلوها ادزلي على شسمونه هذا المنتدى

واليوم ماعندنا شعارات ..

يالله مع السلامه

امكم العوده

عادل الشمري · #9 07-04-2004, 01:25 PM

واوووووووو...

سعبلت منوووووه...

اليوم باجر آنا عزوبي...بأسويها....بس إن ماضبطت....

راح أصبها فوق راسج

وإن ضبطت يديدة...تراج معزومة عندي...

بس شدخل الهاجرية إهي وبرقعها بالموضووووووووووع؟؟؟؟

alajmiali78 · #10 07-04-2004, 05:09 PM

والله انكم طلعتوا ماش فييييييييييييييه احد ما يعرف بالق عينه ؟؟؟؟؟؟؟؟؟؟؟؟؟
الصراحه انا احيانا تسويه العجوز واكله لكن من مده بسيطه عرفت ان اسمه من اول عند البدو بالق عينه !!!!!!

وهو عيش مطبوخ بلبن ويغرف بصحن مرزوقه ( ولا ما يصير له طعم )! ويحفر من نصه ويحطون في الفتحه سمن .
وهات يا تغميييييس ههههههه وبس .وعليكم بالعافيه .

انا كتبته علشان ااكد انه صحيح فيه اكله اسمها بالق عينه وبس .