كنه يقـول ان السكـوت أحيـان حاجـه كافيـه!!

[محمد بن سعود]

يا نجم يا سـاري علـى مسـراي تكفـى لا تبـان=قّـل للظـلام يلبّـس الدنـيـا عـبـاة ٍ ضافـيـه
مليت أشوفك ممتلـي بالنـور و تضـيء المكـان=و نجوم صدري داخل أضلاعي حزينـه .. طافيـه
يا أبن الحلال.. أرجوك طف النور في دربي عشان=ما عـاد أميـز فالوجيـه .. الخاينـه و الوافيـه
ليه أخسر اللي طاح من عيني او أكسب لي رهان؟=مـا عـاد تفـرق .. و النتايـج كلهـا متكافـيـه
ما عاد أبي صدمات تحت اسم التجارب.. و أمتحان=واحـد كفيـل بتعريّـة كـل العـلـوم الخافـيـه
الجرح واحد لو يجي .. من يد فلان او يـد فـلان=يتشابـه الهافيـن .. فـي فعـل الأمـور الهافيـه
نفس الوجع/نفس الضما/نفس الخطا/نفـس الجبـان=نفس السؤال .. و نفس اجابـات الشهـود النافيـه
يا نجم خلك فـي محلـك مالـك و مـال الطمـان=أقلط على صدر المعالي .. صحتيـن و عافيـه !!
مـا دام موتـك مستحيـل و فيـك للجـو اتـزان=لا تنـزل الـوادي و تضربـك الريـاح السافيـه
تدري لو أنك تسأل عيوني عن الحرمـان .. كـان=تشرح لك الحرمـان فـي نظـرة أجابـه شافيـه
حلمي كبير و سيدة حلمـي مـن السحـر البيـان=ما جابها الواقع و لا جتني علـى ارضـه لافيـه
من وحي فكري صاغها الحرمـان بعيونـي كيـان=أعيـش فيهـا و أحـتـرق لسنينـهـا المتقافـيـه
فأن كانها متفرده .. بأحساس و أوصـاف و ليـان=قصيدتـي متفـرده .. معنـى و بحـر و قافـيـه
بنت القصايد .. كل ما هب الهوى و الطـرق زان=غنيـت فيهـا ليـن اصحـي كـل فكـره غافيـه
مـا يكفـي انـي كـل مـا غنيتهـا ذاب اللسـان=كنه يقـول ان السكـوت أحيـان حاجـه كافيـه!!
أحيان أخاف الموت بيديها و لا أشعر فـي أمـان=و أحيان أحـب المـوت .. لكـن المنايـا جافيـه
ان سولفت في صدري الخايف من البـرد أستعـان=فيهـا.. و قامـت بيـن ضلعينـه تمشـا حافـيـه
فيها برود و ثلجها .. خلطـة رحيـق و زعفـران=تحالفـوا فيهـا علـى هيئـة ( عصابـة مافيـه )
هذا يجيـد الفلسفـه .. و هـذا يجيـب الأحتقـان=و انا مـع الأثنيـن نفسـي مـا تجـي متصافيـه
وش عاد باقي!! بنت عز/و بنت شيخ/و ذات شـان=مثل البحر و امواجهـا بأسمـى المشاعـر زافيـه
قالت : اذا مات الدفا .. من يثبت ان البـرد خـان=في صحبته .. قاطعتها!!قلت : أسمعي يا وافيـه !
لولا الوفاء مات الدفا ..و اصبح يهون و يستهـان=و أجراحنـا بأروحنـا صـارت مهـي متعافـيـه
الشكر لو ماله وجود .. ان كان مـا فيـه أمتنـان=وأكبر جفا .. وش ياسعه غيـر القلـوب الرافيـه؟
يا غاليه .. رغم الوجع رغم التعب رغـم الزمـان=جيتـك و قلبـي ينتظـر فرصـة حنـان موافيـه
حطيني بصدرك واذا قال الزمان: أظهـر و بـان=خليني ابقى داخـل ضلوعـك .. بخيـر و عافيـه
انتي عطيني من غلاك.. أحسـاس وشويّـة حنـان=وأعطيـك قلبـي.. والقلـوب أطباعهـا متنافـيـه
تدرين لو كان الدفـا دولـه و فيهـا .. برلمـان!=صرت الزعيم .. و قائد أحزاب القلـوب الدافيـه!
لا زلت عادي.. رغم كـل البهرجـه و الهيلمـان=صافي نوايـا.. فـي زمـن مالـه نوايـا صافيـه
ما هو خطا لو نفترق .. و يذوب شمع و شمعـدان=بس الخطـا لـو نجتمـع .. و قلوبنـا متجافيـه!!

بـ سكيــن / عبدالله ذويبـان ..