حرش العراقيب..............

[عاشق المجاهيم]

السلام عليكم
هذه قصيده اعجبتني وحبيت انقلها لكم
ولكن لا اعرف الشاعر
واللي يعرف الشاعر يكتب اسمه الله لايهينه:

خلوني ارقى عاليـات المراقيـب=في تختخ ما حولـي الا الهبايـب
في عالي مدهال عكف المخاليـب=شقر الحرار اللي تعلـى الرقايـب
واسلى من هموم سواة المغاليـب=صكت علي ما بين مخطي وصايب
واشوف روض فيه حرش العراقيب=خطل الايادي زاهيـات الجنايـب
جرد الرقاب اللي عليها الكلاليـب=هزع الفقـار ونابيـات الترايـب
فجح من السيقان سود الحنازيـب=وساع النحور بشوفها البال طايـب
فنس الخشوم اللي ذنيها نواصيب=روس السهوم مركزات الحرايـب
ذود لنا من عاد وقـت المكاسيـب=ماجات في سوق الجلايب جلايـب
الى مشت تبري الجروح المعاطيب=كنها على الممشى تقود الكتايـب
يازينها في ساقة السقس والجيـب=في فياض نجد اللي سقته السحايب
والعمر مـره والليالـي مكاتيـب=والموت حـق والمنايـا سبايـب
وانا من الدنيا خذيـت التجاريـب=توني شباب وفالتجاريـب شايـب
اقدر اللـي يقـدرون المواجيـب=من قاصي العربـان والا القرايـب
وابعد مجالي عن ربوع العذاريـب=قلال الروابـع تابعيـن النسايـب
ياقربهم اليـا صفـن المشاريـب=ويابعدهم عنـد احتكـام النوايـب