بارتي كريسمس في... بيتنا!!

[انتحار]

كل عام وانتم في ..دفا


من بعد الاجازه .."البارده " طقسياً "الدافئه" كسلياً... اجتمعت مع بعض الاصحاب المنتمين الى الطبقه الكادحه أمثالي انا..المزهويين بالاجازه خصوصاً من شبكها مع الاربعاء او الاثنين..وكأن بيت التمويل سافط له ..بناء بنايه استثماريه بالتقسيط المريح ..

تبادلنا الحديث ..والسؤال المعتاد من كل عام

شسويت "بكرسمس" كان حنا كاثوليك ولا بروتستانت ..لكن كرسمس رمز للاجازه ونلفظها بنيه طيبه وسليمه .. على ما اعتقد

_انا سافرت
_انا رحت للبر
_انا كنت محجوز (عسكري)
_انا كنت مقزرها بمنتدى العجمان
_انا..
_انا..

وهكذا ...
احدهم قص لنا حكايته مع الاجازه..يقول
"كنت طالع للبر رحله بريه مع الاهل ..كشته عائليه ..ومخلين الخدم في البيت..المهم يقول رجعت لحالي للبيت ..يبي يحضر عرس واحد من ربعه..رجع حوالي الساعه 11مساءاً ..

يقول دخلت البيت ..الا اسمع ضحك وبين فلاشات تصوير من تحت باب غرفة الخادمات..راح اخينا بالله وبطل الباب الا لقا خدمهم ..""مكرمسين"..ومسوين بارتي شغل عدل...تفافيخ وزينه وكاشخات وتصوير..يقول انصدمت ..وصب غضب "شركة التسهيلات" فيهم ..

لما حكا لنا الواقعه الكل قام يعلق ويتكلم عن تسيب الخدم ..والحرص منهم وغلطته انه مخليهم بالبيت بلا حسيب او رقيب.. الخ الخ الخ من هالكلام اللي نشوفه دايم في ..مساء الخير ياكويت قبل

"مسكت المايك انا"
وقلت له طيب ليش عصبت عليهم ؟؟ كانو مسوين شي مخزي؟؟ يعني كانو فيه رجال او مشروبات روحيه او شي مو مقبول؟؟

هو-ناقصه بعد يجيبون رياجيل ومشروبات بعد؟؟
انا-طيب ليش عصبت ومديتهم؟؟
-ياخي مايصير قلبو بيتنا بارتي كريسمس
-كانو يرقصون ومشغلين مسجل؟؟
-لا
-كانو بغرفتهم ولا معلقين زينات بالبيت كله؟؟ وصوتهم طالع؟؟
-لا بس غرفتهم ..وصوتهم ماتعدى الغرفه يالله لاحضت اصوات الضحك...انت شتبي؟؟
-ابيك تحترم غيرك
-شلون؟؟
-افرض انك بدوله ثانيه ..دوله غير مسلمه وتشتغل بمكان ما...وجا عيد الاضحى او الفطر.. وتبي تعيد..وجا رب العمل وساقك طراق على خشتك ..وقالك انثبر لابغيت اتعيد عيد في ديرتك ..شعورك شنو؟؟
(طبعا هو علق تعليق صعب اني اكتبه اهني)

بس ابيكم انتم اعزائي

تجاوبون بداله