يا طير عقبي كن خاطرك شاين = خاطرك شين و غيبتي عنك يومين
النقص فيك مبين له بواين = في لمعة الريشه و في ناظر العين
ياطير انا وياك كنا خداين = وبيني و بينك ولف ومعامل زين
يوم نتخاوى مع وجيه الضعاين = ونهمل سبوقك في مناكب خسيرين
ولاشمال الهضبتين القراين = شرقي طلال ومن سواحيق ويمين
والا عطينا سكة التابلاين = ولاقد عطيناها عليهن حراذين
نصبح على طارات شهب المكاين = بين العراقيين و الأردنيين
في خايع به كن عيني تعاين = ربد الحباري به أربع و ثنتين
وناخذ لنا أيام بذيك الدفاين = مابين برقع و الغدف و البسيتين
ونكسر على ماينحدر من ضواين = وناخذ هناك اسبوع والا اسبوعين
وننكف نشاط وسالمين الصخاين = ولوكان نتعب عدنا مستريحين
قدام يطلع للصقاره زباين = ناس تحوش القوبعه بأم روحين
ليا روحوا بمشحنات الخزاين = مافي نحاهم ذوقوه الأمرين
واليوم مابيني و بينك مداين = انا سعودي و أنت جاي من الصين
واما لقينا للحباري عواين = والا توادعنا وداع المحبين
الوقت ماتاليه معنا بزاين = والبر في حادور من حين لاحين
ادناه مليان كراتين فاين = واقصاه ضاق وضيقوبه هل الضين
وضاقت مناهج طيبين الضغاين = اللي على المقناص بالطير ضارين
واليوم كان اللي يحاكيك ماين = هذي سبوقك و انتهض بالجناحين
وهاجر مهاجر مبحرات السفاين = للصين والا اهبط على ضلع قزوين
لو كان عندي مافراقك بهاين = حنا عزاز ولانهين العزيزين
خلك تروح ولا تشوف الغباين = شاملك عفوا مثل عفو المساجين
وسلمتــــــــــــــوووا
الشاعر / عبدالله بن نايف بن عون العتيبي
24-11-2004, 02:59 AM
العرض الشجري