قصتي مع غول الجن "صالح" ...قصة حقيقية..!!!

[اللي على الحكم عيا]

الله يسعد يومكم هذي قصة حقيقية وساسردها "بالعامية " لتكون قريبة


من قلوبكم


" يقول ابو فيصل غفر الله لة " ..لنا مزرعة في منطقة الخرج وهي قريبة


من الرياض .. واكثر اهل الرياض لهم مزارع يروحولها ويغيرون جو من وقت


لثاني , والمزرعة هذي فيها بيت وزراعة ونخل وحلال من غنم وابل وطيور وفيها


خيل منها فرس لي عزيزة على اسمها ( سمي ) وهي الي تخليني كل اسبوع في


المزرعة ما انقطع ...واحد من الايام رحت للمزرعة انا وصديقلي يقالة (خالد)


وهذا لاعب مشهور على مستوى السعودية ويمكن الخليج بس انة ما يركب خيل


خايف على رجولة (هو وجهة ) يقول هي رزقي اخاف اطيح وانكسر ...عموما


يوم جاء الليل شبينا نارنا بين النخل وركينا الدلة وقعدنا (نفشر ) على بعض


كذب من الي يحبة قلبك "هو يثبت وانا اشوت " وبالعكس" اثبتلة ويشوت"


وهو شويت بالكورة والكذب (الابيض طبعا للضحك فقط" ...شوي الا يوم جانا


بنقالي عامل وجلس يصيح ابي ارجع واذا تبون التذكرة على حسابي بس اروح


بنقلادش ...قلتلة وش السبب انت ما لك الا شهر ..قال انا خايف اجلس هنا


قلتلة ليش تخاف شف ربعك ما لين المزرعة وش يخوفك " قال مدير (كلهم


يسموني كذا وانا فرحان طبعا )..في الليل فية نفر كبير مرة ما في راس يدور


في المزرعة انا يشوف ثلاث مرة ..انا يسال نفر ثاني هو كلام هذا كثير موجود


هنا " التفت لخويي خالد لقيت عيونة طايرة كنهم قيليلة ضموك لمنتخب البرازيل


وعلامات وجهة تدل انة "بيستفرغ" ...قلتلة خالد وش فيك قال ما سمعت البنقالي


وش يقول ما انت خايف ..قلتلة يا الحبيب انا اخاف من كل ما جبل بني ادم من الخوف


منة بس الجن انا ما اخاف لاني بصراحة ما شفتهم ...وسالتة شفتهم انت قال اية


مرة كنت ما شي من جنب (قصور مقبل ) وهي معروفة بالجن الموذي " وهذا الكلام


سمعتة انا بعد " ويكمل وفي مقطعة طلع علي واحد قدام السيارة ما لة جسم ثياب


بس وصار يرجمني ومن بعدها صرت افز من النوم مفجوع ...ويقول والكلام لة


اني سالت قالولي هذا من الغيلان (سحرة الجن ) الي يتشكلون ويخوفون الناس


...قلت للعامل رح ناد (عبدالمنان) وهو اقدم الحراس في المزرعة ويوم جاء


سالتة عن كلام العامل قال اية هذا ما يطلع الا يوم السبت ويدور ولا يوذي وهو


بطول رجالين وكتوفة مغطية على راسة عشان كذا الي يشوفة يقول ما لة راس


وهو يلبس ملابس صوف .


قالي ابو خلود شفت قلتلك هذا معروف عند اهل الحوطة وسمعت عنة قصص


كثيرة ...قلتلة عاد ما لقى يعيش الا في مزرعتنا ...تدري هذا يهودي لانة


يطلع السبت بس وباسمية صالح لانة ما يوذي .


قلت لخالد حنا اليوم الخميس وش رايك نجي السبت ونجلس ونشوفة غدية


ينفعنا ويعطيك قدرة تسجل اهداف وانت احتياط .!!! ويعطيني فلوس بالهبل


عشان اشتري الفيصلية وعمارة المملكة و....قال ما عندي مانع ..اتفقنا


قلت اتفقنا ...يوم السبت العصر مريت علية ورحنا المزرعة وجلسنا الين


صلاة العشاء ثم شبينا النار وجلسنا نشوي وهو عيونة تدور ومتاهب وانا


منشغل في الشوي مو شجاعة بس شي ما شفتة ماني خايف منة بصراحة


...شوي الا يوم سمعنا صهيل الخيل وقفنا كلنا حتى قلوبنا وقفت..ما درينا


الا هذا( ناصر) صديق عرفني علية خالد برضة لاعب بس بالاسم لانة طول


عمرة احتياط بفريق درجة اولى (يقولون اول ما جاهم مدرب تونسي جمع


الاعبين في الملعب وسال خوينا ناصر اي خانة تلعب "قال كرة قدم" قالة


المدرب وانت شايفنا هنا نبي نلعب كرة ماء ...رح هناك ومن عقبها وخوينا


احتياط حتى انة بعض المباريات يجي بثوبة لانة ما في امل يضمنها)..


عموما جلس معنا (ناصر) قلنالة وش دراك انا هنا قال شفت النار وتوقعت


انكم هنا ..قلتلة من فتحلك البوابة قال لقيتها مفتوحة ..قلتلة غريبة على اني


منبة عليهم ما يدخل احد لين يعلموني ..عموما سالنا هو بدورة عن سبب وجودنا


يوم السبت وهو مو يوم عطلة خبرناة بالسالفة ..قال يا ابو فيصل انت صاحب


المكان وكل الي فية لك حتى الجن ...ويمكن هذا الي تحترية هو الي يحرس


المزرعة مو هزلايب العمال ترى فيهم حرامية لكن الله بياخد الحق منهم ..عموما


تسامرنا وخلصنا شوي اكلت انا و(خالد) ولكن ناصر عيا ويم جينا نمشي


جمع ناصر العظام وقال وهو يضحك خل هذي لصالح حققكم الله يصلحكم ...


ركبنا سيرتنا انا وخالد وراح ناصر ما شفتلة سيارة يمكن موقفها بعيد ...ورحنا


الرياض وحنا نظحك على تفكيرنا واحلامنا .


بعد ثلاثة ايام كلمني (خالد) زي العادة وقال تعال تقهو بيجي (رولندينو..العريجا)


يقصد(ناصر)خلنا نظحك ...جيتة وجا (ناصر) وجبنا سالفة( الجني صالح)وقلت


لناصر بالله ما خفت يوم جيتنا في المزرعة ..قال متى جيتكم في المزرعة ..!!!!!!


قلتلة يوم السبت واكد خالد على كلامي ..قال يالزيون انا في حائل لي اسبوع مودي


زوجتي ما جيت الا اليوم الصبح ..!!!!!


طبعا فق خالد افمة وانا شرحة والتفتنا على بعض ...بدون كلام لمدة دقائق ..وناصر


يقول وشفيكم سملة عليكم ويتفل علينا لين غرقنا ...تذكرت في هذة الحظة بريق عيون


الي كان جالس معنا ...وليش ما اكل ...وكيف دخل ...وكلامة ان صالح هو الي يحرس


مو الحراس ....وان فية واحد منهم حرامي وان الله بياخذ الحق منة "وكان جاني عصر


اليوم خبر سقوط عامل من الخيل وهو في المستشفى بحالة خطرة ...وجمعة للعظام "ونحن


نعرف ان العظام طعام الجن ..كما ورد عن الرسول (ص)




تمت ........ابو فيصل

[وطني]

يا زين ذا السوالف في البر تالي الليل عقب العشا وفيه واحد من اخوياك مهوب موجود يلبس له لبس يخلع ويدخل على اخوياه ههههههههه


لا هنت اخوي على القصه
بس انصح الجميع لحد يبين الخوف للجن ترى الجن جبناء

[Najla]

مـع إني مااحب ذالطآري لكن دخلت الموضوع وبكل شجااعه وقريته كله .. < قويه

يعطيك العآفيه ابوو فيصل قصه ممتعه و ونيسه و تخلع بنفس الوقت

تحيآتىي ..

[حلا العجمان]

الله يستر الظاهر ناوي تبيتني الليله عند امي
امحق ليل عجل طلع صاحبهم
وانا ووجهي ميته من الخوف وأقرا<<< بنت ابوها ماتغشمر
مشكور على القصه <فيها شكه
يعطيك العافيه.

[اللي على الحكم عيا]

شكرا اخي وطني والشكر موصول لاختي نجلا النواعس وباين عليك


شجاعة ....!!!


اختي حلا العجمان مثلك ما يخاف لانك من حمولة ما تخاف الا من الله


وانا بعلم صالح يجيك ويتعلم منك الشجاعة ابوفيصل

[شمس الأصيل]

معليش مرا اخاف من هالسوالف

بس حبيت اشكرك على الطرح

عجميه

[اللي على الحكم عيا]

ابد لا تخافين واذا حسيتي بشي علميني ....وانا اقول ما دخل


على الموضوع الا قليل اثر الناس خايفة وش اقول انا الي كل


اسبوع في المزرعة الي فيها صديقي صالح ........ابو فيصل

[مرهف إحساس]

السلام عليكم ورحمة الله وبركاته

قصه واقعية الله يكون في عونك ياابو فيصل كل اسبوع هناك ولله مالومهم لخافوا

تحياتي لك

[جطلي بن فهد]

ههههههههههههههههههههههههههههههههههههههههههههه

اشكرك ابوفيصل على الموضوع ولاهنت

[الشامري ...]

لا هنت على القصة
.
.
وشكرا...