منقووول: سالفة ( أم لحم ) لشايع الأمسح

[أبو الوليد]

نبدأ بسم الله والصلاة والسلام على نبينا محمد وعلى آله وصحبه أجمعين .. سالفة أم لحم لشايع الأمسح عليه رحمة الله وغفرانه وجميع موتانا وموتا المسلمين: كان شايع الأمسح رجل كريم وفارس وكل الصفات الحميدة يمتاز بها .
ودائما كان يحب الكرم والضيافة فحدثت له قصة عندما كان بين ربعه وجماعته عندما قالوا له ياشايع أنت قضيت على حلالك من زود كرمك والحين ماعندك شيء تأكله ورجعت على حلالنا وذبحته للضيوف وحنا مانتحمل أن حلالنا يروح من بين يدينا مثل ماراح حلالك واليوم خيرك الله بين أمرين ياأما نرحل ونخليك بالمراح أو ترحل عنا . وهذا الشيء حز في نفس شايع وقال لا بالله أنا برحل . وعندما رحل شايع سكن في منطقه بالنفوذ بين جبه وحائل . فربع شايع حبوا أن يشوفون شنو أحوال شايع فقرروا أنهم يلفون عليه متخفين بالليل علشان ما يعرفهم فإطلعوا عشره من ربعه متجهين لشايع قبل وصولهم لشايع نوخوا ركايبهم ( بالجرعا ) الجرعا هي منطقة منخفضة تحدها الطعوس من جميع النواحي . فلفوا عليه عقب المغرب على رجليهم فحيا بهم شايع يوم شافهم أقبلوا عليه . طبعا شايع ناره دائما شابه . فقلطهم وقهواهم ومن عادة العرب مايسأل ضيفه فشايع في ذلك الوقت لايملك أي شيء من الطعام على شان يعشي به ضيوفه .. فذهب للمحرم يم زوجته كعيب الظبي وسألها وش عندك لهضيوف من عشاء فقالت يا شايع ما عندي إلا نفسي قطع من لحمي وعشيهم .. فشايع من كثر ما هو محتار وش يقدم لضيوفه طرت فكره على كعيب الظبي وقالت ياشايع خذ هالحطب وحطه على النار وإشعم النار ( المعنى خلها النار تقب ) على شان من شدة اللهب يقمزون من أماكنهم وحط عينك على ثيابهم من الخلف إذا كانت متعفسه تراهم جاينك على ركايب وتراهم حولنا فشايع نفذ فكرة زوجته كعيب الظبي فحصل ( فوجد ) أن كلام زوجته كعيب الظبي صحيح يوم فروا من أماكنهم من شدة اللهب لقى ملابسهم متعفسه وبعدها طلع شايع وتتبع ( جرتهم ) أثرهم فوجد ركايبهم منوخه
, فحافهن شايع وذبح ركايبهم وأخذ منهم ( الشوايا ) القلب والكلا وجابهم لكعيب الظبي وقالها إطبخيهم عشاء للضيوف ويوم قلط العشاء وسمى بالضيوف على عشاهم .. وكان من عادات العرب إذا قلط العشاء يطفي الضو على شان الضيف يأخذ راحته بالأكل ويوم إجلسوا الضيوف على الصحن كل واحد يسأل الثاني وش عندك من اللحم يجاوبون بعض ما عندي إلا قلب وكلوا وكلهم على هالحال .. فعرفوا إن شايع الأمسح ذبح ركايبهم وقال واحد منهم أهربوا قبل ما يذبحنا شايع وسروا بليلهم وسميت بذيك المنطقة بإسم أم لحم لأن شايع تبارك على الرمال بكثرة اللحم في ذلك الوقت من ركايب ربعه وتفوق شايع بذكائه وبكرمه على ربعه ... وسلامتكم