الله أحـد يامـا غزينـا وجينـا
وياما ركبنا حاميات المشاويـح
وياماعلـى أكوارهـن إعتلينـا
وياما ركبناهن عصير مراويـح
وياما تعاطـت الهنـادي يدينـا
وياما تقاسمنا حلال المصاليـح
وراك تزهد ياأريش العين فينـا
تقول خيال الحضر زين تصفيح
ترا الظفر ماهـوب للضاعنينـا
قسم على كل الوجيه المفاليـح
البدو واللـي بالقـرى نازلينـا
كل عطاه الله من هبـة الريـح
يوم الفضول بحلتـك شارعينـا
والشلف بأخوانك سواة الزنانيح
يوم انكسر رمحي جذبت السنينا
وادعيت عنك الخيل صم مدابيح
الصدق عندك كـان ماتجحدينـا
هيا عطينا الصدق ياهابة الريـح
هيا عطينا الحـق هيـا عطينـا
واما عطيتينـاه والله لا اصيـح
لا اصيح صيحة من غداله جنينا
وألاخلوج ضيعوها السراريـح
يا أبـو نهـود كنـه فرهدينـا
عنهن جديد الثوب غادة تشاليـح
ياعود ريحان بعـرض البطينـا
وامنين ما هب الهوا فاح له ريح
لاخوخ لارمـان لاطلع تينـا
لا مشمش البصره ولاهن تفافيح
وخد كماقرطاسـة فـي يمينـا
وعيون نجل للمشقـى ذوابيـح
صخف بلطف بانهـزاع ولينـا
ياغصن موز هزعه ناسم الريح
خالد الخالدي
31-05-2009, 11:50 PM
العرض العادي
