نــيـابة عــن يـام والـشـيـخ راكــان ( سالم بن جخير ) مرثيّه بالملك فهد

[مناحي الصميل]

السلام عليكم ورحمة الله وبركاته

سالم بن جخير

بسم الله الرحمن من كل شيطان = ومن الغدر ومن الحسد والعمايل
والا أبتدى ليل القصايد والألحان = بديت وأشفيت النفوس الغلايل
وانا ما أشوش الا على صهلة حصان = وعلى عزاوي ناقضات الجدايل
ماني بأخوض الحرب في كلّ ميدان = إلين أشعفني صهيل الأصايل
الله خلق لي فكر وعيون وإلسان = أقدر اميّز واتكلّم وأخايل
نيابةٍ عن يام والشيخ راكان = وقّفت امثّل لي شعوب وقبايل
وذبّيت في راس الطويله امسيّان = والحيل ما من حيل والدمع سايل
ومن البكا سالت ملازم ووديان = وحتى الطويله من دموعي تهايل
وبكوا على صوتي شغاميم نجران = وبكوا على صوتي شغاميم حايل
عليك يا عزّ العروبه كحيلان = عزّ العرب راع الوفا والجمايل
ملك ومتواضع وللعزّ عنوان = حذفك بعيد وشبر يمناك طايل
اسمك لحاله يرجح بكل ميزان = وذكرك ما بين الناس صايل وجايل
من لا انجبت مثلك على مرّ الأزمان = احسن لها تبقى على طول حايل
ومن لا نهج نهجك على سنان وعنان = ما ضنّتي يدعى صبيّ الصمايل
تركتنا في عزّ في امن وأمان = وانعام ما تحصى وخير وغبايل
موتك فجيعه حلّت بكل الأوطان = من هولها شفنا نجوم القوايل
يومٍ بدا مظلم تباشيره أحزان = تقول في يوم الحشر والهوايل
لكن عزانا في هل العزّ والشان = اخوان نوره مقدم عيال وايل
العزوه اللي لأكتسى الجوّ دخّان = افعالهم تلغي جميع الفعايل
نرسل عزانا صوب ذربين الأيمان = ونجددّ البيعه بكلّ الوسايل
ونرفع يدينا كلّنا سرّ وإعلان = وندعي لهم بالفرض والا النفايل
على العهد باقين انصار واعوان = ما خانوا العشره عيال الحمايل
ما عندنا باير وكاذب وخوّان = نصدق مثل صادق حقوق المخايل
لعيون عبدالله ولعيون سلطان = ناقف ونردع كل غازي وعايل
هذي عوايدنا مقلّع وخبلان = والى نوينا يعتدل كلّ مايل
حنّا نهار الضيق رئاسة اركان = حنا الكتايب واللواء والفصايل
حنّا لقادتنا محازم وفرسان = ضدّ الغدر ضدّ الجهل والتحايل
من عهدنا الأول الى عهدنا الآن = وحنّا على نهج الجدود الأوايل
والحكم لـ آل سعود والضدّ خسران = وعندي على قولي شهود ودلايل
ومن لا إعتبر .. يقلط على السيف شامان = وماله عن الموت المحقق بدايل
اقولها من قلب يغشاه الإيمان = وأعيدها لا قيل ويش انت قايل
ونوّدع بليهان وياتي بليهان = وحنا بأمن وأمان والشكّ زايل

صح الله لسان ابو نادر