وندوج بأشقر صافي الظهر والذيل محمد بن فطيس

[ابن الصحراء]

بسم الله

السلام عليكم ورحمة الله وبركاته


اقدم لكم شاعر المليون محمد بن فطيس

في وصف الطير اتمنى ان تنال على ذائقتكم

راع القنص مسجون وفراجه سهيل=وشلون ما يبغون شوفه يشوقـه

اللي يعـدون الصقـاره غرابيـل=ما ذاقوا اللي فالصحـاري نذوقـه

انقوم صبح ونرقد مـن اول الليـل=في دار عشب ٍ تلحق الماء عروقه

انقـوم للمـذن مقـام ٍ بتهلـيـل=يوم ٍ طوال الليل نرقـب شروقـه

برض ٍ بها لبرق الدواغر مداهيـل=قد مرها الوسمي وشافت بروقـه

نسيمها كن فيه من نكهـة الهيـل=يكفخ بخفـاق ٍ قبضـه معلوقـه

ما شيف فيها الا ثر الصيد والسيل=وخاطي ثر ٍ للـي يـدور لنوقـه

الصيد فيها لـه مـداس ومقاييـل=كنك لها من كـل ديـره تسوقـه

وندوج بأشقر صافي الظهر والذيل=مطروح قد ريشة ظهره محروقـه

له هيبة فالجـو قبـل المحابيـل=فرخ العقاب ايخاشره في حقوقـه

على عيونه له قحوف ٍ مضاليـل=اقحوف شيخ ٍ تاج الامجاد فوقـه

يطلع وطلعه لا طلع.. طلع دربيـل=زود ٍ على طلعه وطبعه.. لحوقـه

لاقفت تغرف الجو وتجـر وتميـل=راع الحمامه دونهـا مـا يعوقـه

اذكر عليه اللي له الحول والحيـل=الى اتقت من تحت ذيلـه اسبوقـه

اطياره ايخلـي المقافـي مقابيـل=ارماش عين اللي قذى العج موقه

هاذي طراة العمر من دون تقليـل=بهواية اللي ذوقنـا غيـر ذوقـه

وهذا اللي يحبب هل الطير بسهيـل=وخوة رجال ٍ الخـوى مـا تبوقـه

موجز عن المقناص ماهو بتفصيل=وكل ٍ يمدح ربح سوقـه بسوقـه