المكتب الجديد...

[ليالي]

مرت شهور على الانتقال للمكتب الجديد بس ليما الحين اتذكر فرحتي وقتها

احساس بالاستقلال والحريه ليش ما ادري

يمكن لان صار لي مكتب بروحي

الفتره اللي قبل الانتقال عانيت من زميلة وضعت لفترة مؤقته وحاولت احتلال المكتب مؤبد بس محاولاتها باءت بالفشل وعادت الى مكتبها تجر اذيال الهزيمه

مثل جديد او يمكن قديم ما ادري

"لاحد يتحرش بالبدو"

يا فرحه ما تمت

طلعت عيوب المكتب الجديد من الايام الاولى

ماكو مصافط

الشارع كله حفر >>> بصراحه احس اني بالبر وراكبه وانيت

صارت النحشه صعبه لان المسئول مكتبه يطل على المصافط

وكل هذا يهون

المشكله اللي منرفزتني الصوت

اي احد يتكلم لو باخر الممر صوته عندك

تخيلوا ازعاج مو طبيعي

تسمع كل السوالف

اللي تتهاوش مع زوجها

واللي تخطط وين تودي عيالها

واللي واللي.....

واكثر شي ينرفزني صوت الضحك

بالعاده الضحك يعديني

لكن الاصوات اللي تطلع مو ضحك شي ثاني مرعب

بو طلال شوف لنا احد يحللنا شخصيات اصحاب الضحكات

هع هع هع

كع كع كع

كركركركر

الصداع بدأ يعرف طريقي والبندول بدرج المكتب

وبديت اردد

وااحلالاه يا المكتب القديم