هذي قصيدة مرشد البذال
لا والله الا ذعذعن الصفاري=هب البراد وقربت نقلة الطير
ذكر الحباري له نخزر الحداري=اول عوانيها لقوها المداوير
كل اشقرآ في تلة السبق ضاري=متكسرآ قلبه على الطلع تكسير
ذكرتهم مسرى بهاك الغداري=مع جابر الاحمد طويل الاشابير
يابومبارك ماطرى لك طواري=تحيي الرسوم الاوله بالمظاهير
ياشيخ لاتنسى هذيك المساري=يومك تصلي الصبح فوقآ من الصير
تشوف فيه من العواين مواري=تلقى جرايدهم بروس العثامير
كلن ورى جابر بسيره يداري=اهل الطيور للشيخ جابر مناظير
ما أحلا مغداهم بعشب وخباري=بأول طلوع النبت عشبه دواوير
وما احلا معاياهم بصوتأ جهاري=الشيخ نشمي والجماعه مناعير
هذي طراة العمر قبل العزاري=دنياك من غير الطرب مابها خير
وهذا رد الشيخ جابر الاحمد عطاه الله الصحه والعافيه انشالله
قولك تراه اليوم صاير وجاري=الله يجزي ذيك الايام بالخير
ياما سرينا يم ذكر الخباري=مجهامنا كل يوم مثل النواظير
مانعرف التنتات هي واللواري=لهن دوي يشبهن الزنابير
نمر بالريضان خضرآ قفاري=زاه عشبها مع فياض مزاهير
لامن طلع مختار عقب المساري=في موقعآ مافيه جرة مظاهير
اوهد صوب الروض وسط النهاري=غمر وصفف ياحسين التصاوير
واليا نزل عينه تشعشع بناري=نشوفهم جنب الذواري مخامير
مثل الملك جالس وحوله جواري=والله ما أصخي به بخيشة دنانير
ماهمنا برد ولاهوب ذاري=يوم ان للمقناص بالنفس تأثير
واليوم كل واحد يصيد العفاري=وصاروا جميع الناس كلهم صقاقير
اصبر تشوف الطير فوق القواري=مطلعه راعيه مع سكة الجير
العرض الشجري