ذابلات الوشايم للشاعر حمد هادي ال دويس

[الليث]

السلام عليكم ورحمة الله وبركاته

مشاركتي عباره عن قصيده مختاره للشاعر حمد بن هادي آل دويس

مسنده لغانم بن صالح آل مسعد بغرض المشاكاه وليس الرد

وقد نالت اعجابي واتمنى ان تحوز اعجابكم

وإليكم أبياتها :



طال السهر والليل ما عقبه شروق = وامسيت يا غانم مع كل هايم
وأخيل انا حد الفكر رعد وبروق = وسمر السحايب خلت الجو غايم
هيضتني يا غانم وفوقها فوق = من رد مثلك يلحقه لوم لايم
وعجّلت همٍ في الحشا كان مفهوق = ونيران جوفي في حطبها ضرايم
أكتب على عوجا من الفكر طاروق = وإلى استوت نشّفت حبر القلايم
بالآحن الورقى على كل غرنوق = ولا لعلعت بالعصر قمري الحمايم
واون ونه تجعل النوم مسروق = واعوي عوى ذيبٍ عوى في الظلايم
هويت جادلْ عندها القلب مربوق = في عينها حد السيوف الصرايم
والمنحر اللي جيده أتلع ومعنوق = والقد غصنٍ ميلتْه النسايم
ووقت الشفق من بين الأكتاف مدلوق = أشقر من المتنين لين القوايم
تفرق عن الخفرات بأوصاف وفروق = فرق الجوازي عن وصوف البهايم
ضاعوا العذارى عندها مالهم سوق = ست البنات وذابلات الوشايم
قالت خلاص الذنب بالوصل مرفوق = وذا قسمنا في الحب يكفي قسايم
تاخذ عليْ حقوق ولي عندها حقوق = وفي وصلها انا بايع الروح سايم
أقنعت نفسي عن هواها وانا اتوق = ونار الهوى تِضْعف قوي الشكايم
حالي تلَف والجاش مكوي ومحروق = وبين الصحاح أمسيت مثل المهايم
ومن بعد مده جات والدمع في الموق = قالت تراني اعترف بالهزايم
عود لدربٍ بالوصل كان مطروق = و...............يداوي السقايم
قلت العذر يازين ما عاد لك شوق = ما عاد أعود لو حدَتني الندايم
ما اقبل عقال الفال لو كان ملحوق = وما يقبل العقبات كون الهلايم
أنا تعبت أعالج جروح وفتوق = وما هي تعاود كون راعي الغشايم
بالزم عنان النفس لو كان مطلوق = واقرّعه عن حب راخي الكمايم
من أولٍ حل الأمر كان بالذوق = وذالحين لو تِقبل كبار العمايم
رجلٍ مشت لك بالغبا جعلها العوق = وطرفٍ سهر في عشقك الحين نايم
جثيت حبك غصن واوراق وعذوق = ياما أنسقت بالدم والدمع دايم
روحي قفاك.. الصدر صندوق مغلوق = ما ودي إني افتحه بالشتايم
وراحت اتدرهم مثلما حايل النوق = تلفح صدرها حاميات السمايم
ويا غانم أحسن خلها طاق مطبوق = يكفي فضايح عند ربعٍ ندايم
هذا كلامٍ داخلي كان مخنوق = محفوظ عن نقل الحكي والنمايم
والسر ما يِبدى على كل مخلوق = الاّ على اللي تلزمه بي لزايم
وعجلت همٍ في الحشا كان مخنوق = ويا غانم النيران جوفي ضرايم
وطال السهر والليل ما عقبه شروق = وكلاً هجع وامسيت ياخوك قايم
وأخيل أنا حد الفكر رعد وبروق = وسمر السحايب خلت الجو غايم

تــــــــمـــــــــت

اخوكم

الليث