السلام عليكم ورحمه الله وبركاته
الشاعران الرائعان الصديقان,المثيران للجدل ضيدان بن قضعان وسلطان الهاجري في محاوره جديدة متميزة, يتبادلان ورود الشعر...والمعاني الرائعة التي تبحر في تقلبات الحياة
ضيدان:
مرحبا في حلة دونها عشرين باب
المراوح فوقها..والهبوب تفرها
الحرار اللي مواكيرها روس الهضاب
حولت في نقرة ما تحمل حرها
سلطان:
والبقا يا صاحب ماوراه إلا العذاب
والجريره حسبنا الله على من جرها
صاحبي ضيدان غرب ولا أدري ويش جاب
يوم حصل خيرها ما كفاني شرها
ضيدان:
مايبرك للحمول الثقال إلا الركاب
احتمل وجنود الإسلام لله درها
وإن سرى ثلثين ليلك ونجم الجدي غاب
سل عيوني ليش حلو الكرى ما مرها
سلطان:
الفخر والعز بين الثريا والسحاب
والمطر لو ما يضر الدير ما سرها
مير قل لي ويش فرق المشالح والثياب
إن سبحت ببحرها وإن مشيت ببرها
ضيدان:
فرقها فرق ازرق الما على وضح السراب
والسراب يوهق الضاميه ويغرها
والبلا من شعلة ما حسبت الها حساب
واحد منا قدحها والآخر كرها
سلطان:
مابقى في حوض الاجرب طعام ولا شراب
والجنوب من الجرب كل ليل يعرها
لاتعاتبني عليها خطا والاصواب
في ذرى روس ماطار الهوى بـ اغترها
ضيدان:
كل أبينا لقمة بين ضر وبين ناب
مير يا سلطان دك الركاب وسرها
واضرب أم جلال بالهرش يامال الذهاب
لقحة أم جلال والا الجمل ما ضرها
سلطان:
احسب انك فارس ماتذل ولا تهاب
لين صرتك المقادير جوف امصرها
يحمي الله شذرة السيف مصقول النصاب
أما عدل ميلة الروس والا طرها
ضيدان:
لاتغيّر هقوتك في ولد غانم ذياب
لو تشوفه لابس جوخة ما زرها
وانت في دار ابن سفيان مطوي الكتاب
وكل نفس تاليتها على مقرها
سلطان:
رحلة الرحالة ماغير وقفة وانقلاب
مامسحها إلا يبي يصطبح من درها
من قرصه الداب حتى الحبل سمته داب
يامجرب حلو الايام جرب مرها
18-08-2005, 05:07 PM
رديه بين ضيــدان بن قضعان وســلطان الهاجري وهم في الســـجن
العرض الشجري