ملــــح القصايد...

[مرتاح أحبك]

ملح القصايد حدني لشي مابيه=ووردت له حمل الركايب لحالي

له هقوةٍ فيني ولي هقوةٍ فيه=والغالي مايشره على غير غالي

اموت والله قبل اخيّب هقاويه=لو احتمل شيٍ يفوق احتمالي

انا من اللي ذراع الايام تلويه=جماعةٍ مافرقتها الليالي

العمر لو شانت بوجهي لياليه=اصبر ولا اشكي على الناس حالي

ناس اتذكرها .. وهي ماهي هنيه=وناس اتناساها .. ولو هي قبالي

اشد طعنات الزمان وبلاويه=طعنت ضهر بيد الرفيق الموالي

بيتٍ لفاه الضيف عيا يعشيه=يعل ماتلفي عليه الرجالي

الشعر تشتاق لخيالي معانيه=شوق القصايد للبيوت الجزالي

حقه علي .. مثل الخوي يوم اخاويه=ارفعه فوق النايفات الطوالي

لعيون من راسه على القلب راكيه=اللي فدا قربه حلالي ومالي

اني لسوي شي محدٍ مسويه=ان شافه العاقل يصيبه هبالي

وان عودت يم الغلا شلون مغليه=لا صار له كل الغلا اول وتالي

يخطي على قلبي ولا قلت له ليه=وكل ماجرحني قلت له لا تبالي

فداه لو تل المعاليق بيديه=ثم حط له بين الحنايا مجالي

لجل يتخطا عروق قلبي برجليه=ويعضد يدينه بالضلوع متعالي

دامي احبه حيل .. واعشق طواريه=خله يتل القلب كل ما طرالي

ملح القصايد حدني لشي مابيه=ووردت له حمل الركايب لحالي




وسلامتكم

ثامر شبيب الدقباسي