فياض أنا بوصيك في شبتـ النـار((( نصيحه))

[هاجري خاله عجمي]

نصيحة الشيخ سعد بن جليد القرفي الهاجري رحمه الله لابنه فياض

يالله ياعالـم خفـى كـل الاسـرار=يادايـر الأفـلاك يـومـه وليـلـه
أفرج لمن جابه هواجيـس وأفكـار=وليلـه مضـى مايرقـد ألاقليـلـه
من شوفتي دنيا كمـا لعبـة قمـار=وقتاً تسـاوى فيـه عدلـه وميلـه
يالله بليلاً بأمـر ربـي لـه أنـوار=برقه عروض وفـي قنيفـه نخيلـه
يعـم نجـدً دار وافيـن الاشـبـار=ويخـص ديرتنـا حقوقـاً فضيلـه
علمه يسر القلب لاجـات الاخبـار=ويصبح غديره ناقعـاً غـب سيلـه
ويزوف عشب الوسم وتقوم الاشجار=وكـلاً علـى طاريـه قـدا رحيلـه
وترجع مراتع خد حسكـات الاوبـار=وديـار ربعـي كاسبيـن النفيـلـه
هواجراً من عصر نوحاً لهـم كـار=لاجا اللقى نروي السيوف الصقيلـه
هـذي طبايعنـا وكـلاً لـه أشعـار=وعاداتنـى نثنـي نهـار الدبيـلـه
وافعالنـا تعجبـك لاجـات الانـذار=لاقابلـت ضـو المعـادي فتيـلـه
ظفران لاركبو علـى قـب الامهـار=وخيالنـا بالهـوش ينطـح قبيلـه
وعدونا نسقيه من كـاس الامـرار=ويموت من عوقـه وكبـده عليلـه
وصليحنا يامن وخيرًا علـى الجـار=ونزبـن المجـرم وحملـه نشيلـه
مثل أبن شبعاناً وجدنـا لـه أذكـار=ماراح ذكره فـي السنيـن الطويلـه
فياض أنا بوصيك في شبتـة النـار=واتعب على العليـا بكـل الوسيلـه
اللي يبي الطالات يصبر على الحـار=تـرى المراجـل ماتهيـا بحيـلـه
وخلك على ربعـك حليمـاً وصبّـار=ترى أبـن عمـك ماتعيـن مثيلـه
وكثر من الترحيـب لاجـاو خطـار=ترى كريـم النفـس ربـي كفيلـه
من لااستشارك لاتخصه بالاشـوار=أمش أبطريقك وتركه فـي سبيلـه
ولاتسمع قـول عمسيـن الانضـار=قـولاً بـلا فعـلاً قليـلاً حصيـلـه
لاتجهـل أبدنيـاك والوقـت بـوار=كم من خليـلاً فرقـه مـن خليلـه
لحذار ماتمنعك من سـوء الاقـدار=ماكتـب لـك بيجيـك ولا تجيـلـه
واليا تبين لـك خصيمـاً بالاسـرار=فالطم أسبـال اللـي يعمـدك بعيلـه
بعض الحكي كنه على الكبد مسمـار=لاجـى مـن اللـي مايثمـن لقيلـه
من طاح داسـوه الرجاجيـل ماثـار=لاطــاح ماشـالـوه ياعزتيـلـه
ون جيت في المجلس فللصمت مقدار=حتاك تبخـص عاقلـه مـن هبيلـه
ولاتسمّع قـول مـن شفـت هـذار=كثـر الحكـي مايـرث الا الفشيلـه
أنـا لاشيبـت ماهـوب لـي عـار=الشيب حـق وكـل وطـراً وجيلـه
أنا سعـد لامـن ردي العـزم حـار=يفرح بي اللـي بايـراً بـه عميلـه
دمّـاح زلـة لابتـي لوهـي كبـار=واللـي عليهـم معتـدي نلتقيـلـه
ورفيقنا لاحـط بالسجـن باوسـار=أقطع عليـه الخـط ويطيـب ليلـه
ون جاو أهل هجناً من البدو ظمّـار=غـب النكايـف حاديتهـن هزيلـه
أجري لهـن بالبـن مانيـب زمّـار=لامن غلى سوق الهرافـى وحيلـه
ودلال رسلانـاً بهـا بـن وبهـار=ونجراً ليـا حـرّك تزايـد عويلـه
خذيت لي في مقبل العمـر مشـوار=صعباً على راعي اليميـن البخيلـه
هبيت فيها يـوم ولـم السعـد دار=وخليت طـراد السـراب بصميلـه
وتعبت أنا للمرجلـه سـر وجهـار=وحصلـت فيهـا مايسـر القبيلـه
أغنيتهم مـن حاجتـاً عنـد حقّـار=يوم الردي كسبـه علـوم الرذيلـه
حنـى حـرار وكـل داراً لهـا دار=ماحنّ من يرضـى ونفسـه ذليلـه
آلآد قرف اللي لهـم فعـل وأذكـار=وعلومهـم عنـد القبايـل جميلـه
ألفين رجـالاً مـن كبـار وصغـار=لاراح رجـالاً بيضـهـر بديـلـه
مراكزاً وأفعـال وعـزوم وأنظـار=ودرب العلى يرجـع لمـن يرتكيلـه
ذا قول منهو لابغى اللعـب يختـار=أحـب زيـن القـول وأخـذ دليلـه
مثايـلاً يطـرب لهـا كـل بيطـار=اترك هزيل الهـرج واخـذ جزيلـه
وصلاة ربي عـد همـال الأمطـار=علـى النبـي محمـداً بالفضيـلـه