بيض الصبايا (لمحمد للسديرى)

[جالس بن مبارك]

بــيــض الـصـبـايــا

ذكرت لي عندك ثلاثـة عذاريـب=
والكل منهـن يـا محمـد نـودّه
بيض الصبايا وامهـات الدباديـب=
ولهلاه بـرد ٍ فـي ديـاره مجـدّه
فيها الزهر ريحه كما فايح الطيـب=
بارض ٍ مساسٍ للنظـر مجرهـدّه
يدله بها الريمي وتدله بها النيـب=
ويذكر لنا صيـأد العـذارا بخِـدّه
المترفـات الناعمـات الرعابيـب=
بيض النحـور مليّنـات المخـده
مثل المها الشرّاد رثـم ٍ خراعيـب=
عيون الوحوش وتوّهـا مستهـدّه
نمر العتيبي عقبهن فارق الطيـب=
زادن عنـاه وبيحـن كـل سـدّه
يجاوب العاوي بروس المراقيـب=
وعينه على سفك العبـاري تحـده
ويهرف من الفرقا كما يهرف الذيب=
ووده مع البـدوان نزلـه وشـدّه
لو ان طراد الهوى يشلق الجيـب=
محـد ٍ يلـوم المبتلـي بالمـوده
والدار عندي بين حـر ولواهيـب=
ولا عندنا كود الوجيـه المصـده
نصبر وهذي يا محمـد مواجيـب=
صبر الجمال اللي ضـرت للمكـده
ونشتاق للبيضا ونبعد عن العيـب=
ونبني كـلام ٍ كـل حـي ٍ يعـده
يوم الردي جنّب عن الطيب تجنيب=
واللي هفا به فعـل خالـه وجـده
ما خاض عركات تنابط بها الشيب=
وان ادبروا مـا قـال يالربـع رده


المرحوم/ محمد الاحمد السديري