ألأيام تجري والعمـر مثـل ألأيـام
أعمارنـا محسـوبـةٍ بالدقيـقـه
نجري ورى هم المعيشه ولاحـلام
وننسى الحقوق اللي علينـا وثيقـه
ننسـى حقـوق الله كفـال الايتـام
ربٍ يضيـع مـن يضيـع طريقـه
ربٍ خلقنـا نطفـةٍ قبـل الاجسـام
من نطفةٍ ثـم علقـةٍ ثـم عليقـه
ويكسيه لحمٍ حافظه جلـد وعظـام
وعروق عجلٍ دمهـا فـي دفيقـه
واالـه مانقـدر وفـا حقـه التـام
سبحـان حمـاي البيـوت العتيقـه
ارجع يا مسلم لاتوهقـك الاوهـام
لاتغـرك الدنيـا بزينـة ابريـقـه
ألاقدار يابن آدم تـرا رمحهـا سـام
كم واحدٍ خذه القـدر مـن فريقـه
وين الرجال اللي لهم فعل واعـلام
وين الرسل وين الملـوك العريقـه
راحو من الدنيا بمترين مـن خـام
امتـار خـامٍ ربطـت بالسليـقـه
خلك على العليـا صبـورٍ وعـزام
روم المعالـي وعتنقهـا عنيـقـه
رافـق ارجـالٍ لابـدا لازمٍ هــام
يقضوم حاجات الزمـان الشهيقـه
ناسٍ لهم في ساحة المجد مرسـام
الـلازم الكايـد تـحـل أتعليـقـه
دون الخوي تاقف مواقيف الاكـرام
هل فزعةٍ تشفـي الكبـود الغليقـه
لاتحط نفسـك بيـن لايـم ولـوام
والفاسـد المفسـد تجنـب طريقـه
مريض قلب وفيـه غيـضٍ وكتـام
ونفسه على درب المنافـق شفيقـه
احـذر تغـرك ضحكتـه والتبسـام
وده يحذفك لو قـدر فـي حريقـه
مامـن ورا رفقتـه كـون التنـدام
وراع المثل قال المرو مـن رفيقـه
من طاح من رفقة هل السو ماقـام
الا درا أنك طحـت عجـل طقيقـه
واحذر تسمَع هرج واشـي ونمـام
مامن ورا النمـام كـون الحميقـه
الاسلام يابن آدم له أوصول واحكام
لازم تطبـق بـالأصـول الأنيـقـه
حافظ على الأحسان واركان الأسلام
واحرص على الأيمان وامش بطريقه
حنـا بوقـتٍ صايـرٍ لـه تلطـام
صار الأخو ماعـاد ينفـع شقيقـه
والله وصانا على وصـل الارحـام
ماقـال هملهـم وضـم العشيقـه
حقٍ عليـك مواصلتهـم والاسهـام
ومشاركتهم كـل فرحـه وضيقـه
تـراك مـا تبقـى نشيـطٍ وجـزام
الأعمار تسرقهـا الليالـي سريقـه
ترجع الا ضعفٍ وعجـز أوتحطـام
وتقول وين اهـل الكبـود الرقيقـه
الشوف يقصر والجفن بـه تهـدام
والجسم يتعـب ماتساعـده سيقـه
والسمـع يثقـل والظهركلـه آلام
اليد تنافـض والعصـا مـا تطيقـه
عمر الفرح والعـز والمـال مـادام
لابـد ماياتـيـه وقــتٍ يعيـقـه
نسهر على التلفـاز ونتابـع انغـام
ننسى الفرايض ونتسمـع موسيقـه
ونتابـع افـلامٍ بهـا عـادل أمـام
وحسين فهمي والبنـات الرشيقـه
ونوقت الساعه علـى حـزة الـزام
خوفٍ من التآخيـر لوهـي دقيقـه
ويرفع آذان الصبح ويقـوم الامـام
وحنـا نيـامٍ فـي حـلامٍ عميقـه
صلو وحنـا مـن ردا الحـظ نيـام
ومن قام منا مـا يصحـي رفيقـه
لو ياصل المخلوق منا ميـة عـام
ياتيـه لحظـه غرغـراتٍ أبريقـه
ماخلده مالـه وجاهـه والأوسـام
يرحل عن الدنيـا وجمعـا صديقـه
ويلف ويكفن أبلـه شـاش وحـرام
ويحط فـي قبـرٍ ألحـوده غميقـه
ويجيه من ينشـده وش حـط قـدام
ويكشف ملفـه عنـد رب الخليقـه
في ساعةٍ ياقف بهـا كـل آلانـام
ما ينطق الا مـن دعـي لتحقيقـه
ويشوف سجلٍ ما خطت فيه ألأقـلام
في ساعةٍ ماهـي تغيـب الحقيقـه
وسلاااااااامتكم 
21-11-2004, 08:11 PM
العرض الشجري