لاجيت اغني ويش اغني وش آقول=أسأل وانا ادري عن جميع الطرايق
ياراس راسي وين قرص البنادول=تعبت من كثر الحكي والوثايق
واللي مهو بمعقول ماهو بمعقول=تبقى الحقايق في عيوني حقايق
ماني بناشد وش بلى الباب مقفول=ولاني بناشد ويش تحت الطبايق
ماني بعن رزق المخاليق مسؤل=رزق الخلايق عند رب الخلايق
دام الشنب في ساحة العز مفتول=الروس تكرم والعلايق علايق
خلوني ادله واطرب النفس وآجول=وسط الفياض اللي سوات الحدايق
الصدر أوسع من مساحات ابالهول=واللي مكذبني يجي ويتهايق
وان كان شفتوني مهوجس ومشغول=تراي مستانس وهادي ورايق
أرجي وصال اللي وصاله على طول=ماغاب عن قلبي وفكري دقايق
لجله نهيت القلب عن كل مجمول=أمسك معاليقه ولو كان تايق
أنا حبيبي كل مافيه مقبول=زاكي ومتواضع وبالحسن فايق
اعيون سود وخصر مايل ومجدول=والردف من ضيق الثياب يتضايق
مربوع لاقصير ولا فارع الطول=والموت في لبس الدلع والذلايق
أهدي له السلسال والعقد واللول=واهدي له ابيات القصايد بطايق
لأقبل علي فزيت وان راح ياحول=كني على الموت المصفى موايق
لوكيل الجزاله
سالم بن جخير
20-09-2008, 09:12 AM
العرض الشجري