عسا ان تنال على استحسانكم وترضي ذائقتكم
الشاعر / ناصر مناحي
يا مليك المشاعر ليه ما اكتب فيك = دام ماني على قصر الهوى مسبوق
وان تأخرت لا تشره على مغليك = للقصايد حقوق ولك معاي حقوق
منتظر خايف اكتب شي ما يرضيك = وانت حساس . ومدلّع . وذرب . وذوق
كان لي قدر ما يستقبل التشكيك .! = دمعتك . لا ينزلها ولا مخلوق
ولا يغيضك شعر هذا وشاعر ذيك = دامني شاعرك .! غرّد وراسك فوق
الوداعه مع حاضرك من ماضيك = قلب ما يستريح وذكريات وشوق
كمّ ليلٍ سهرته والسبب طاريك = لين زاد الغلا بين السهر والموق
في جبينك صباح الخير لمحاكيك = وفي عيونك عتم ليل . ومطر . وبروق
ليه ما اقطع مسافات التعب واسريك = دام لك صبح من خايل سماه يروق
في لقاك أحسد عيوني على عينيك = سلهمتها عذاب يركّد المطفوق
غير زينك معاك اخلاقٍ تحلّيك = وصدر ما يستضيق وفطنه ومنطوق
وش شعورك معه وكفوفه تحنّيك = يا جديلٍ عن شعاع النحر مفهوق
لا لفحك الهوى قلت الله يحيّيك = وزعتك الهبوب وصرت حوله طوق
يا شعور الوصل والشوق كيف اخفيك ؟ = سارق الشيّ ما يستاذن المسروق
وش بكمّل بعد غير اللّه يخلّيك = لي وقلبٍ وهو عندك عليك يتوق
العرض الشجري