لآ جيت اسولف عن أولنا لـ تالينا//يضيق فيني المكان اللي على كبره

[Najla]

مسـآكـم خير يآ وجيـه الخيـر ..

للتوآصـل من جـديد ..

إسـلموا

..

لآ جيت أسـولف عن الذكرى بـ ماضينا=يضيق فيني الكلام بسبة العبره
ولآ جيت اسولف عن أولنا لـ تالينا=يضيق فيني المكان اللي على كبره
يا فرحة العمر يا ذكراه نادينا=من خلق ذيك السنين الموحشه الغبره
اللي عليها رمينا كل امانينا=حتى فقدنا الأماني بقلة الخبره
واللي عليها معاني الشوق تدعينا=صوت المعاني حزين ويحتوي نبره
أحلامنا اليخت والذكرى موانينا=نرسي عليها مع الأيام للعبره
و الحاضر المر ضاقت به فيافينا=بعيوننا الكون كنه (سم هالأبره)
أخاف الأيام لا مرت تنسينا=حب ٍ دبور السنين العوج تختبره
نعد الأيام لكن ما تعدينا=معها تعبنا ولا ندري وش الدبره
على طـريق الموادع تشر إيدينا=واللي على خبرنا ما هو على خبره
قلنا نتصبر عسى هالصبر يكفينا=يا صبر أيوب في بلواه يا صبره
هذي مواجع عليها الوقت ممدينا=من يوم قدت قميص الصبر من دبره
و الحافي أعظم عسى الله لا يورينا=مكروه الأوجاع و الهوجاس من سبره
(غول المأسي) إذا ما مر يشقينا=نحسب حسابه مع الأيام نعتبره
وما كل من صابنا بالكون يخطينا=و ما كل كسر الخواطر ينفعك جبره
أحيان الأشواق لا قامت تمنينا=من (مهد) الإحساس تاخذنا إلى (قبره)

لـ عبدالمحسـن الشآهـر ..